O BILANGAN 1
1
O Israel manyawa yodiai o sensus madodihiraka
1 #
Bil. 26:1-51
O mede mahinotoka mawange moioka o taongo mahinotoka ipahaika o Israel manyawa yamal̄a o Mesir maberera, ma Jou wï temo-temo o Musaika ma Jou Ai Tauoka o Sinai matonaka ikokaka haka. Wato, 2”Ngona deʼ o Harun kokiani nia diai o sensus o Israel ma nyawa mata-mata, imoteke o hoana deʼ o tau moi-o tau moi madol̄a. Nia tulihi mata-mata o nau-nauru manga romanga 3manga umuru o taongo monaoko deʼ ihi kail̄e yaku-akunu yo dadi o tentara. Onanga kokiani nia hitulihi imoteke moi-moi manga doomu maduduono. 4O hoana moi-o hoana moi ino nigahoko womatengo o hoana matutuda mangale inï riwo ngini.”
5-16Neönanga doka manga roma-romanga yä iri-iriki o kawaha ino mangale yariwo o Musa deʼ o Harun deʼ yodadadi o hoana moi manga tutuda, enagënanga:
| Ai hoana | Manga tutuda |
|---|---|
| O Ruben | O Elizur o Syedeur aingohaka |
| O Simeon | O Selimuel o Zurisyadai aingohaka |
| O Yehuda | O Nahason o Aminadab aingohaka |
| O Isakhar | O Netaneel o Zuar aingohaka |
| O Zebulon | O Eliab o Helon aingohaka |
| O Efraim | O Elisama o Amihud aingohaka |
| O Manasye | O Gamaliel o Pedazur aingohaka |
| O Benyamin | O Abidan o Gideoni aingohaka |
| O Dan | O Ahiezer o Amisyadai aingohaka |
| O Asyer | O Pagiel o Okhran aingohaka |
| O Gad | O Elyasaf o Rehuel aingohaka |
| O Naftali | O Ahira o Enan aingohaka |
17De o nyawa yangimoi de yahinoto gënanga manga roriwo, o Musa deʼ o Harun 18wä huloko o kawaha yongodumu ima toomu o mede mahinotoka o wange mamoioka, de toönanga manga silisila yatatoro daku deʼ yauku imamoteke manga hoana madoomu naga moi-moi toönanga manga hoana magoronaka. Mata-mata o nau-nauru manga umuru o taongo monaoko de ihikail̄e manga romanga nia tulihi deʼ niä etongo, 19hokä ma Jou wohi popareta. Genanga mata-mata o Musa wadiai o Sinai matonaka ikokakahaka. 20-46O nau-nauru manga umuru o taongo monaoko deʼ ihikail̄e yaku-yakunu yodadi o tentara, manga romanga nihi tulihi imamoteke manga hoana deʼ manga tau madol̄a, o Ruben deʼ imulaenge, o Yakub aingohaka mariaka hiädono o Naftali. Onanga naga manga ngöe.
| Ai hoana | Manga ngöe |
|---|---|
| O Ruben | 46.500 |
| O Simeon | 59.300 |
| O Gad | 45.650 |
| O Yehuda | 74.600 |
| O Isakhar | 54.400 |
| O Zebulon | 57.400 |
| O Efraim | 40.500 |
| O Manasye | 32.200 |
| O Benyamin | 35.400 |
| O Dan | 62.700 |
| O Asyer | 41.500 |
| O Naftali | 53.400 |
| Mata-mata manga ngoë: | 603.350 |
47O Lewi manyawa uha nia hitulihi kamamoi de o hoana ma homoa, 48karana ma Jou wotemoka o musaika, 49”Maöraha ngona nohi tulihi o nyawa manga roma-romanga yaku akunu yodadi o tentara, o Lewi ai hoana ngarouha nia hi tulihi. 50Nähuloko önanga ihi dailako Ahi Tau de hagala ma pakakaha. Toönanga manga manarama enagënanga yamoku Ahi Tau de toënanga mapakakaha ikali ihidö dailako. Onanga kokiani imä tau ihi gilolitino. 51Nako ngini nimatagali, o Lewi manyawa gënanga kokiani yakilianga Ahi Tau, daha ihi diai ihi gokoli o ngïmahi gëtongo nimä tau ma hungioli. Mahomoa de önanga, o nagona dika yatigi-tigika o Tau gënanga kokiani yahukumu yahohonenge. 52O Israel manyawa mahomoahi kokiani ihi goko manga tau o doomu moi-o doomu moi, o nyawa moi-nyawa moi manga doomu magoronaka moi-moi ihi gilolitino manga paji-paji mahirete. 53Mä o Lewi manyawa kokiani imä tau Ahi Tau magilolitino. Onanga kokiani yogoana hupaya o nyawa moiua imahi tigika hiädono idadi o hababu Ngohi tongamo deʼ Tä hukumu o Israel ma nyawa.” 54De o Israel manyawa yadiai hagala wohi popareta ma Jou o Musaika.
Currently Selected:
O BILANGAN 1: TLB
Highlight
Share
Compare
Copy
Want to have your highlights saved across all your devices? Sign up or sign in
