O MIKHA 2
2
Manga bodito hagala o nyawa ya tö tuku-tuku o mihikini manyawa
1Yobodito hagala o nyawa ihi dato-datoro o dorou magogiria ima rubaiha manga dangiroka maöraha o hutu-hutu, daha yadiai maöraha o ngorumino karana toönanga manga kuata mangale yamanarama. 2Nako önanga yömau o dumule, önanga ya ora. Nako önanga yö mau moi o tau, önanga ya l̄e ima hihininga ma huka. Yaoa manga arata yaoa manga tau manyawa, koiwa yo tumuloa.
3Karana gënanga ma Jou wotemo, ”Ngohi tohi datoro o hangihara nginiuku, hiädono ngini niakunua niotana. Maöraha o bodito gënanga ngini aha niakunua nimä dagi deʼ nia edengoli. 4Nia bodito aha yapake o nyawa hokä o hehedu ma ade-ade, deʼ önanga aha yodiai o hininga mahuha manonako ma nyanyi nënanga,
’Ma Jou wodohigorakoka tongomi mia berera nënanga
deʼ wahi döaka imï tago-tagokika ngomi.
Ngomi miwederoka kamamoiuku.’ ”
5Karana gënanga, nako iboa maöraha o berera gënanga ihi gilio ma Jou Ai umatika, moiua ö nginiino aha wa tarima ai hidoku.
6Hagala o nyawa yoriwayati ngohino, yato, ”Uha niriwayati ngomino. Uha niriwayati ya korona mata-mata gënanga. Ngohi aha mia makeua o mal̄eke. 7Uha nia tobote o Israel ma umati ma Jou wa lolaioka! Ma Jou aha wadiaiua hagala o hali hoko gënanga. Unanga ko maiwahi i hihanga Ai sabari. Koigoungua Unanga wotemo deʼ ka yaoa-oa hagala o nyawaika ya mo manarama o diai?”
8Ma Jou wo haluhu, ”Nginila nia parangi Ahi umati hokä o haturü. O nyawa yo lio o parangoka deʼ ya ino deʼ manga nganono aha wa mao wo sanangi ai tauoka, ena hioko dokengoka koaholi ngini ni wi damä mangale nia ora ai tau. 9O ngo ngoheka Ahi umati manga hidogoronaka manga tau yo igo-igoka deʼ ngini nia duhu, deʼ ngini nia ora mangale kahi ado-adonika o barakati Ta hi dö doa-doaka toönanga manga ngoha-ngohaka. 10Ni momiki deʼ nioiki; nenangoka isananguaoli. Hagala nia baradoha ihi boaka o hangihara hoboborohono o ngï uku nënanga.
11Ngini nia igo o nabi yo igo yo elu-eluku deʼ yotipu ikali i hi dodemo ti ngini aha nia angguru deʼ nia sopi deʼ ma boboloi.”
O jaji mangale o halamati
12Ma Jou wotemoli, ”Hei o Israeloka ma umati ma hou-houohi! Ngini, maraioka Tinï toomu deʼ Ti nihi rimoi hokä o duba ilio ma kurungaika. Hokä o momo o tonaka ma lua-luasoka iomanga deʼ o duba, hoko genangoli ni aberera aha iomangoli deʼ o nyawa manga ngöe.
13Ngohi aha tahelenga o ngekomo deʼ tinï ao ngini o tabuangoka deʼ tinihihupu. Ngini aha nia kilianga hagala o ngorana ma ago-agomo deʼ nioiki deʼ ni woro-woro. Ngohi, o Jou mahirete, ganga nia Koano, deʼ Ngohi aha tinï tuda ngini ni hupu.”
Currently Selected:
O MIKHA 2: TLB
Highlight
Copy
Compare
Share
Want to have your highlights saved across all your devices? Sign up or sign in
