O MATIUS 8
8
O Yesus wihi togumu womatëngo iwi pado-pado
(Mark. 1:40-45; Luk. 5:12-16)
1O Yesus o doporonoka de wouti, deʼ manga ngöe o nyawa iwinïki. 2O öraha gënanga waino womatëngo iwi pado-pado. Unanga watilabuku o Yesus aihimangoka, deʼ wotemo, ”Bapa, nako Bapa nömodeke, Bapa yakunu nohihi togumu ngohi.”
3O Yesus wipal̄anga o nyawa gënanga de wotemo, ”Ngohi tomau. Notogumu!” Oraha gënanga dika aipanyake ihihanga. 4#Im. 14:1-32 Deʼ o Yesus wïtemo, ”Nohohininga! Kamoikaö de uha nohi ade-ade. Mä noiki maimamika, deʼ nogahoko ünanga wohigoungu ngona notogumoka. Iböto gënanga nohihuba o huhuba o Musa wohipopareta, hokä manonako igoungu o nyawaika, ngona igou-goungu notogumoka!”
O Yesus wihitogumu womatëngo o Roma matentara manga kapita aigilaongo
(Luk. 7:1-10)
5Maöraha o Yesus wowohama o Kapernaum makotaika, womatëngo o Roma manga kapita waino imamäke de una, deʼ wogahoko wïriwo. 6Ma kapita gënanga wotemo, ”Bapa,” ”wohilö leleani wopanyake ahi tauoka. Una woluluiha aidangiroka, wakunua womädagi deʼ duru kaihiri.”
7O Yesus wato, ”Ngohi aha toiki tihitogumu.”
8”Ngarouha Bapa,” makapita gënanga wohaluhu, ”Ngohi topatutua, Bapa tonitarima ahi tauoka. Bapa nopareta dika. Done aha wohilö leleani gënanga wotogumu. 9Hababu ngohiö nënanga kata moteke ahi l̄okuil̄e manga pareta. Deʼ ahi timiuku naga o tentara-tentara kokiani yamoteke ahi pareta. Nako ngohi tïhuloko o tentaraoka womatëngo, ’Noiki!ʼ unangö woiki. Ngohi tätemo mahomoaika, ’Naino nengino!ʼ Unangö waino; deʼ nako ngohi tïpareta ahi gilaongo, ’Nadiai nënanga!ʼ unangö wadiai.”
10O Yesus woihene okia makapita gënanga wotemo, una duru wokiriri. Deʼ una wätemo o nyawa iwinöninïkika, ”Goguleua o nyawa nënanga. O Israel manyawa manga hidogoronakaö de komaiwahi Ngohi tamäke o ngongaku hokonënanga maämoko! 11#Luk. 13:29 Igoungu! Manga ngöe o nyawa aha yoböa o wange mahiwariha deʼ o wange madumunoko la yomore-morene de o Abraham, o Ishak, deʼ o Yakub, ma Jou Madutu ai Dunia ma Hungi magoronaka. 12#Mat. 22:13, 25:30; Luk. 13:28 Enahioko o nyawa kokiani yodadi ma Jou Madutu aiumati, aha yäumo mahohuhutuika, doka maporetoka. Genangoka önanga aha yoari deʼ yohangihara.” 13Deʼ o Yesus wïtemo makapitaika gënanga, ”Nolio, okia ngona nongaku gënanga aha idadi.”
Deʼ o öraha gënanga dika wilö leleani gënanga wotogumu.
O Yesus wahitogumu manga ngöe o nyawa
(Mark. 1:29-34; Luk. 4:38-41)
14O Yesus woiki o Petrus aitauika. Genangoka una womi mäke o Petrus ngoitoroa magogiriaka imigogama amidangiroka. 15O Yesus wapal̄anga amigiama, deʼ amipanyake ihihanga. Münanga momomiki deʼ muläenge mïleleani o Yesus.
16O öraha muläenge bimaoa, o nyawa yä ao o Yesusika, manga ngöe o nyawa yangohamika o womaha madorou. Deʼ o demo döaka moi dika, o Yesus wadühu o womaha madorou gënanga deʼ wahitogumoli mata-mata o nyawa yopopanyake. 17#Yes. 53:4 O Yesus wadiai mata-mata gënanga, deʼ hokogënanga idadi hokä okia ma Nabi Yesaya wotemo hokonënanga, ”Unanga womahi tagongo, nanga huha de nanga hangihara, deʼ wohitogumu nanga panyake.”
O nyawa yomau yodadi iwinö ninïki o Yesus
(Luk. 9:57-62)
18Naga duru manga ngöe o nyawa o Yesus iwikilolitino. O Yesus de wämäke önanga mata-mata, Unanga wähuloko iwinöninïki, yoiki o taaga mahonongaika. 19Deʼ o agama maguru womatëngo waino Unangino deʼ wotemo, ”Bapa Guru, ngohi tomau toni nïki Bapa kiaika dika!”
20O Yesus wohaluhu, ”O kaho honganika de maaruku, deʼ o totaleo de maigutu, mä o Nyawa manga Ngohaka koiwa aingï womahi ruba-ruba.”
21Deʼ womatëngo iwinöninïki mahomoa wotemo, ”Bapa, nohihi gumal̄a toliohi la ahi ama tilungunohi.”
22Mä o Yesus wohaluhu, ”Nohi nïki Ngohi, deʼ mal̄aika o nyawa mahonenge yälungunu mahirete manga nyawa yohone-honenge.”
O Yesus wohirïdi o rato
(Mark. 4:35-41; Luk. 8:22-25)
23O Yesus deʼ iwinöninïki yoharene o ngotiril̄e yoiki o taaga mahonongaika. 24Mahoanika o Yesus womäiduoka. Itodokanino o rato duru kahagiria yöduguti o taagauku, hiädono manga ngotiri o lulu hiboha-boha. 25Iwinöninïki yoiki Unangika, deʼ iwitömanga. ”Bapa! Nonä riwo! Ngone hobodito!” önanga yopöaka.
26”Yadodoa hongini nihawana?” o Yesus wotemo. ”Ngini ikuranga ningaku Ngohino!” Ipaha o Yesus womaokoil̄e deʼ wataaere o hidal̄oko deʼ o taaga gënanga. Deʼ o taaga idadi duru irïdi.
27Iwinöninïki o Yesus yohëranga. Onanga yotemo, ”O nyawa okia ne Unanga, hiädono o hidal̄oko deʼ o lulu mayamoteke Ai pareta!”
O Yesus wahi togumu yahinoto, yangohamika o womaha madorou
(Mark. 5:1-20; Luk. 8:26-39)
28O Yesus womahiädono o taaga mahonongaika, o Gadara madaeraoka. Dokengoka yahinoto yangohamika o womaha madorou. Yaino Unangino o nyawa yahinoto gënanga duru yokinïki, hiädono moiua yämoroëne genangino yakaino. 29Onanga o jere mabai-baitino de yohupu, deʼ yopöaka, ”Jou Madutu ai Ngohaka aha Ngona nomï sarakia ngomi? Boteka Ngona nomï mauoka nomihangihara ngarokö koma orahowahi?”
30Genangoka de hokokiaua magurutika, naga o ode duru kahangöe magogiriaka o inomo imälingiri. 31O womaha madorou gënanga igahoko o Yesusika, ”Nako Ngona nomau nomïhuloko mihupu, nomï huloko ngomi miwohama o odeika gënanga.”
32O Yesus wotemo, ”Nioiki!” O womaha madorou gënanga ioiki yätingaka o nyawa yahinoto gënanga, deʼ iwohama o odeika. Deʼ o ode mangöe gënanga ipiringana deʼ imangumo o taaga mabakoruku, deʼ yalutu.
33O ode yogöa-göana gënanga imapopäta o kotaika, deʼ hijarita mata-mata idädadioka gënanga, de okia idadioka de o nyawa yahinoto o womaha madorou yangoha-ngohamika gënanga. 34Hoʼ mata-mata o nyawa o kotaoka gënanga yoiki imakamäke de o Yesus, maöraha önanga iwimäke o Yesus, önanga duru yogahoko hupaya wamal̄a manga daera.
Currently Selected:
O MATIUS 8: TLB
Highlight
Copy
Compare
Share
Want to have your highlights saved across all your devices? Sign up or sign in
