O MATIUS 6
6
O nasihati mangale o hadakä
1 #
Mat. 23:5
”Nimä hohininga, uha ngini nidiai o agama mamau-mau, o nyawa yowöe-wöe manga himangoka, hupaya o nyawa yamäke. Nako ngini hokogënanga nidiai, nia Ama o horogaka wohidöakua o hewa nginika.
2Hoʼ, nako ngini nihidöaka niahadakä o nyawa mihikinika, uha gënanga nihingahu-ngahu, hokä o nyawa yoelu-eluku yodiai. Ona yoigo yodiai o pupuji matauoka, deʼ o ngëkomo maamokoka, hupaya o nyawa yähigiriri. Niohohininga, önanga yatarimaka manga hewa. 3Mä ngini, nako nihidöaka nia hadakä, kokiani kania pongono, hiädono moiua ihiöriki. 4Mal̄aika la niamanarama gënanga o nagona dika maihiorikua, duga-duga nia Ama o horogaka. Una wapulono niamanarama iiu-iunu gënanga deʼ aha wohi döaka nia hewa nginika.”
O nasihati mangale o hubayanga
(Luk. 11:2-4)
5 #
Luk. 18:10-14
”Nako ngini nihubayanga, uha hokä o nyawa yöigo imadodiai. Onanga yöigo yohubayanga ihigokoino o pupuji matauoka deʼ o ngëkomo madupukoroka hupaya o nyawa yämäke. Niohohininga, genangala o hewa önanga yatarimaka. 6Mä nako ngini nihubayanga, niwohamika niakamari magoronaka, deʼ o ngorana niabenoino, deʼ nihubayanga nia Amaika niwimäke-mäkeua gënanga. Done nia Ama wapulono niamanarama iiu-iunu gënanga, aha wohi döaka o hewa nginika.
7Nako ngini nihubayanga, uha niogogilio, hokä o nyawa iwinäko-näkoua ma Jou. Ona yatobote manga gogahoko aha woihene, hababu manga hubayanga gënanga ikurutu. 8Uha hokä önanga. Nigahokowahi, nia Ama wanäko okia niaparalu. 9Hö nihubayanga hoko nënanga,
’Mia Ama o horogaka:
Ngona ma Jou Madutu noma tëngo-tëngoka.
Tanu Ngona ini huba deʼ ini horomati.
10Ngona mia Koano.
Tanu Ngona nopareta o duniaka, deʼ Ani mau yamoteke hokä o horogaka.
11Nomihi döaka o wange nënanga mia inomo ngomi mipöparalu.
12Nomi apongo ngomi tongomi miahowono,
hokä ngomi miahiapongoka o nyawa yahowo-howonoka ngomino.
13Uha nohiguma
l̄a ihihanga miangongaku maöraha ngomi imï taili
mä o Dorou makuaha nomihirehene.
[Ngona o Koano nokokuaha deʼ nomulia kahi ado-adonika. Amin.]’
14 #
Mark. 11:25-26
Nako ngini niahiapongo o nyawa yahowono nginika, nia Ama o horogakaö aha waapongo niahowono. 15Mä nako ngini niaapongua o nyawa mahomoa manga howono, nia Ama o horogakaö aha wa apongua niahowono.”
O nasihati mangale o puaha
16”Nako ngini nipuaha, uha niabiono ihuha, hokä o nyawa yöigo imadodiai. Onanga yangali manga biono hupaya mata-mata o nyawa ihiöriki önanga yopuaha. Niohohininga, genangala o hewa önanga yato tarimaoka. 17Mä nako ngini nipuaha, nimamahau, deʼ niatadauru niawuhioka, 18hupaya moiua ihiöriki ngini nipuaha, nia Ama iwi mäke-mäkeua dika. Una wamäke niamanarama i iu-iunu gënanga, deʼ aha wohidöaka o hewa nginika.”
O arata o horogaka
(Luk. 12:33-34)
19 #
Yak. 5:2-3
”Uha nimä doomu o arata o duniaka, kiaka o buteteke deʼ o pariama aha yabodito, deʼ yotohi-tohiki yaino yatohiki. 20Koaho yaoa, niatoomu o arata o horogaka, kiaka o buteteke deʼ o pariama yaboditoua, deʼ yotohi-tohiki yainoua yatohiki. 21Karana kiaka nia arata, genangoka ö niahininga.”
O röehe madararono
(Luk. 11:34-36)
22”O lako gënanga o röehe mahilo. Nako nialako itararono, nia röehe magahumu itararono. 23Mä nako nialako igawa, niaröehe magahumu ihuhutu. Hoʼ nako nialako niadirioka gënanga ihuhutu, done duru i huhutu o huhutu gënanga!”
Ma Jou Madutu deʼ o arata
(Luk. 16:13, 12:22-31)
24”Moiua yakunu yomanarama o tuanga hinotoika. Hababu ünanga aha iholoi wïdora womatëngo deʼ womatëngo ikuranga wïdora. Ekola ünanga aha iholoi wosetia moika de moika ikuranga wosetia. Kogenangoli ngini. Ngini yakunua nimanarama mangale ma Jou Madutu deʼ mangale o arataoli.
25Hababu gënanga niohohininga; uha nihawatere mangale niangango, enagënanga okia aha niaol̄omo deʼ okia niaokere, ekola okia aha niapäke. Mode koigoungua o ngango iholoi de o inomo, de o röehe iholoi de o pakeanga? 26Nia pulono o totaleo o gitawaka. Enanga idatomua, iutukua, deʼ yatoomu madumule mahasili matauika makowali. Ngarokö hokogënanga nia Ama o horogaka ënanga wapaliara! Mode koigoungua ngini iholoi ikurutil̄e niaija de o totaleo? 27O nagona nginioka, de manga hawatere, yakunu yakurutu manga umuru ngaroka kama huhutulu?
28Yadodoaho ngini nihawatere mangale niapakeanga? Niatailako nihidodiai o bunga-bunga iwango o gol̄owaika. O bunga-bunga gënanga imanaramua, deʼ o pakeanga idiaiua; 29#1Kok. 10:4-7; 2Taw. 9:3-6 mä ma Koano Salomo hoko gënanga aikaya ma, wapäkeua o pakeanga, mahailoa hokä o bunga gënanga! 30O momo o gol̄owaika o wange nënanga iwango deʼ yarehino yatuhuku hokoiwaka. Mä ma Jou Madutu wapäke wohidodiai o momo gënanga hoduru ihailoa. Holoi ngini! Mä ngini kuranga ningaku! 31Uha nihawatere deʼ nitemo, ’Okia aha haol̄omo’, ekola ’okia aha haokere’, ekola ’okia aha hapäke’? 32Mata-mata o hali gënanga o nyawa iwinäko-näkoua ma Jou Madutu salalu yakinïki. Enahioko nia Ama o horogaka wohi öriki mata-mata gënanga ngini niparalu. 33Hoʼ, ihira nihi dailako hupaya niawowangoka ma Jou Madutu wapareta, deʼ niadiai Ai mau. Done mahomoa mata-mata aha ma Jou Madutu wini hidöaka nginika. 34Hababu gënanga, uha nihawatere mangale yarehe mawange. Hababu yarehino nagaoli toëna mahawatere. O wange nënanga yaoaka toëna mahuha, ngaro uha hodogooli.”
Currently Selected:
O MATIUS 6: TLB
Highlight
Copy
Compare
Share
Want to have your highlights saved across all your devices? Sign up or sign in
