O MATIUS 12
12
O loleha mangale o Yahudioka manga Puji mawange
(Mark. 2:23-28; Luk. 6:1-5)
1 #
Ul. 23:25
Mamoiuku o Yahudioka manga Puji mawangeoka, maöraha o Yesus wakaino o gandum madumule madatekino, de iwinö ninïki yautuku o gandum gënanga, deʼ yo ol̄omo, hababu önanga yähahini. 2Maöraha o Farisi manyawa yämäke, önanga iwitemo o Yesusika, ”Namäke! ininöninïki yatilakuru nanga agama matita, de yodiai ilara-laranga o Yahudioka manga Puji mawangeoka.”
3 #
1Sam. 21:1-6
O Yesus wohaluhu, ”Komaiwahi ngini niabasa mangale okia o Daud wodiai maöraha ünanga deʼ ainyawa yähahini? 4#Im. 24:9 Una wowohama ma Jou Madutu ai Tauika; deʼ waol̄omo o roti ihihuba-huba ma Jou Madutuika. Enahioko imoteke nanga agama matita, o Daud de ainyawa yakunua yaol̄omo o roti gënanga – duga-duga o imam-imam dika yakunu yaol̄omo. 5#Bil. 28:9-10 Ekola komaiwahi niabasa o Musa aititaoka, kiaka o Yahudioka manga Puji mawange magetongo o imam-imam yomanarama ma Jou ai Tauoka, yatilakuru o Yahudioka manga Puji madatoro, mä yahihowonua? 6Nia takihiri okia Ngohi totemo nënanga: nengoka naga iholoi ilamoko de ma Jou ai Tau. 7#Hos. 6:6; Mat. 9:13 Ma Jou Ai Demo ma Buku magoronaka itulihi: O hayanga de o dora dika Ngohi tömau, mä o aiwani hihuba-hubaua. Nako naga igou-goungu nimangarati o demo nënanga, marai ngini aha niahihowonua o nyawa yahowo-howonua. 8Karana o Nyawa manga Ngohaka wakuaha o Yahudioka manga Puji mawange.”
Womatëngo aigiama mahononga ihonenge
(Mark. 3:1-6; Luk. 6:6-11)
9O Yesus wamal̄a o ngï gënanga deʼ woiki o pupuji matauika. 10Genangoka naga womatëngo aigiama mahononga ihonenge. Yamuruono naga yomau yalingi-lingiri o Yesus aihowono, yoleha Unangika, ”Yakunu o nyawa hahitogumu o Yahudioka manga Puji mawangeoka?”
11 #
Luk. 14:5
O Yesus wohaluhu, ”Hohiade naga niahidogoronaka womatëngo aiduba gahumu moi, deʼ o Yahudioka manga Puji mawangeoka o duba gënanga itifa o baiti maluku-lukuku; sarakia maduba madutu gënanga wohidailakoua, wohihupu o duba gënanga o baiti magoronail̄e? 12Aa, o nyawa iholoi iragane de o duba! Hoʼ, nako hokogënanga, yakunu o nyawa häriwo o Yahudioka manga Puji mawangeoka.” 13Ipaha o Yesus wïtemo o nyawa aigiama i hone-honengika gënanga, ”Nohi döakino anigiama.”
O nyawa gënanga watöakika aigiama, deʼ aigiama gënanga i togumu, hokä aigiama mahonongali. 14Mä o Farisi manyawa yamal̄a o pupuji matau gënanga deʼ ima teke fakati la iwitoma o Yesus.
O huhuloko ma Jou Madutu wï iri-iriki
15O Yesus wohiöriki o Farisi manyawa manga adekati itorou Unangika. Hoʼ Unanga genangokadau de womäjobo deʼ manga ngöe o nyawa iwinïki. Deʼ Unanga wahitogumu mata-mata o nyawa yopopanyake. 16Mä Unanga wäduhunu önanga ihingahu o nyawa mahomoaika mangale Unanga. 17Deʼ hokogënanga idadi hokä okia ma Jou Madutu wotemo, de ma Nabi Yesaya wohi ngahu,
18 #
Yes. 42:1-4
”Ne Unanga Ahi huhuloko ti irikoka,
o nyawa tïdora-dora deʼ Ahi hininga yadäene.
Ahi womaha aha tihidöaka Unangika,
Ahi adili aha wohingahu hagala o hoana manyawaika.
19Unanga aha woributuua ekola wopöaka,
ekola wopidato o ngëkomo maago-agomoka.
20O tiba ipugi-pugiluku aha koitobikua
o posi kai rongouku aha koihonengua.
Una aha wogegoto hiädono o adili ihi gogere;
21hagala o hoana manyawa aha imahi nganono Unangika.”
O Yesus deʼ o Beelzebul
(Mark. 3:20-30; Luk. 11:14-23)
22Ipahaika iwiao o Yesusika womatëngo wopiloko deʼ womou karana o womaha madorou iwikuaha. O Yesus wihitogumu o nyawa gënanga hiädono ünanga wakunu wotemo deʼ womahi öriki. 23Mata-mata o nyawa yohëranga deʼ yotemo, ”Boteka Unanga nënanga o Daud ai Ngohaka inahi jäjaji gënanga?”
24 #
Mat. 9:34, 10:25 O Farisi manyawa yoihene gënanga, de önanga yohaluhu, ”O nyawa nënanga wakunu waduhu o womaha madorou duga-duga, karana o Beelzebul, o womaha madorou manga häeke, iwihidöakoka o kuaha gënanga Unangika.”
25O Yesus wanäko o Farisi manyawa gënanga manga dibanga. Hoʼ Unanga wätemo onangika, ”Nako o negara moi imakokitingaka, o doomu-o doomu magoronaka imateke roributu, o negara gënanga aha itedekanua deʼ ikiliangoka. Deʼ moi o kota ekola o taumoi madol̄a, de imakokafara, de imakokalawani aha iwedere. 26Kogenangoli oIbilihi mapopareta magoronaka; nako o doomu moi yaduhu o doomu mahomoa, done o Ibilihi mapareta gënanga itinga-tingakoka, deʼ aha iruba. 27Ngini nitemo Ngohi taduhu o womaha madorou karana o Beelzebul makuaha. Nako hokogënanga de o nagona manga kuaha, inïnöninïki yaduhu o womaha madorou? Inïnöninïki mahirete, ihinyata igoungu ngini niahowono! 28Mä Ngohi taduhu o womaha madorou de ma Jou Madutu ai Womaha makuaha. Deʼ genanga mamangarati ma Jou Madutu womulaengoka wopareta niahidogoronaka.
29Sarakia o nyawa yakunu yöngohama womatëngo wokua-kuata ai tau magoronaika, de yaora aiarata, nako ünanga ihiraua iwi liko o nyawa wokua-kuata gënanga? Iwi likoka, daha unanga wakunu waora aiarata.
30 #
Mark. 9:40
O nyawa Ngohinoua yoböa, igoungu ihilawani Ngohi. Deʼ o nyawa ihiriwoua Ngohi, igoungu yakilianga Ahi manarama! 31Hababu gënanga, la nihiöriki, nako o nyawa o baradoha yodiai ihi demo o hikauku, önanga kayamäke o apongo! Mä nako önanga ihikauku ma Jou Madutu ai Womaha, önanga yamäkeua o apongo! 32#Luk. 12:10 Nako o nyawa yotemo okianaga iwilawani o Nyawa manga Ngohaka, önanga yamäke o apongo, mä nako önanga ihikauku ma Jou Madutu ai Womaha, önanga yamäkeua o apongo, kayaoa o örahanënanga de mabahaka!”
O gota mautu de toena mahohoko
(Luk. 6:43-45)
33 #
Mat. 7:20; Luk. 6:44 ”Nako homau hamäke mahohoko yaoa, kokiani magota mautu iburere. Nako magota mautu iburereua, mahohoko mai torou. O gota o utu moi iburere de iburereua, hanäko mahohokoka. 34#Mat. 3:7, 15:18, 23:33; Luk. 3:7, 6:45 Ngini o nyawa madorou, sarakia ngini yakunu nihidemo okia naga maoa, nako ngini itorou? Okia niauruiha o demo ihupu, genangala niahiningaka de ihupu ikopoa! 35O nyawa maoa, ihidemo okianaga maoa, karana önanga yäomanga de o oa. Ho de o nyawa madorou ihidemo okianaga madorou, karana önanga yäomanga o dorou.
36Hoʼ, niohohininga: o Kiamati ma Wangeoka, o nyawa moi-moi kokiani imahitagongo yohaluhu moi-moi mangademo mafaidä koiwa-iwa. 37Hababu niademo-demo mahirete, aha yapäke de yaputuhu ngona nahowono ekola kowali.”
O Farisi manyawa yogahoko o Yesus wodiai o nonako ihëra-hëranga
(Mark. 8:11-12; Luk. 11:29-32)
38 #
Mat. 16:1; Mark. 8:11; Luk. 11:16 Ipahaino yamuruono naga o agama maguru deʼ o Farisi manyawa yotemo, ”Bapa Guru, ngomi mio mau mia mäke Bapa nodiai o nonako i hëra-hëranga.”
39 #
Mat. 16:4; Mark. 8:12 ”Duru itorou deʼ yotoba lawani, o nyawa o örahanënanga!” o Yesus wohaluhu. ”Ngini nigahoko Ngohi todiai o nonako ihëra-hëranga? Ngini aha kamoiö de inihi döakua o nonako ihëra-hëranga, duga-duga moi ma Nabi Yunus ainonako ihëra-hëranga. 40#Yun. 1:17 O Yunus wogogere o wange hange de o hutu hange o nawoko maago-agomo mamämata magoronaka. Kogenangoli o Nyawa manga Ngohaka aha wogogere o wange hange de o hutu hange o dunia mamämata magoronaka. 41#Yun. 3:5 O Kiamati ma Wangeoka, o Niniwe manyawa aha yomomiki kamamoi imakutuono de o nyawa o öraha nënanga deʼ yahihowono önanga. Hababu o Niniwe manyawa yotoba yodiai okaua o baradoha, maöraha o Yunus woriwayati onangika. Mä orahanënanga nengoka naga iholoi wolamoko de ma Nabi Yunus! 42#1Kok. 10:1-10; 2Taw. 9:1-12 O Kiamati ma Wangeoka, makoano ngoheka o Koreharauku aha momomiki kamamoi imakutuono de o nyawa o öraha nënanga, deʼ munanga mahihowono. Hababu mangale momau moihene ma Koano Salomo wobobarija aidodötoko, makoano ngoheka gënanga madiai o dodagi magogurutika, o dunia mabobahaka de maino. Mä örahanënanga nengoka naga iholoi wolamoko de ma Koano Salomo!”
O womaha madorou ilioli
(Luk. 11:24-26)
43”Orahaokia o womaha madorou iwimal̄aka womatëngo, o womaha madorou gënanga yakokiloliti o ngï madüdudungu imahi lingiri o ngï la imahibatongo, mä imahimäkeua o ngï. 44Hababu gënanga ënanga itemo, ’Ngohi aha togilioli o tau kiaka ngohi tatinga-tingakoka.’ De imahi adonika dokengoka, o tau gënanga ihomoa, itebini, deʼ ihidiaioka. 45Deʼ enanga ioiki, deʼ yaooli o womaha tumidi mahomoa iholoi itorou de ënanga. Ipaha o womaha madorou gënanga iwi ngohamoli manyawaika gënanga, deʼ igogere genangoka. Deʼ mabaha o nyawa gënanga iholoi itorou de madodihiraka. Kogenangoli aha idadi de o nyawa madorou o öraha nënanga.”
O Yesus ngoi ayo deʼ ai riadödoto
(Mark. 3:31-35; Luk. 8:19-21)
46O Yesus kama gogiriahi imakoketemo de o nyawa manga ngöe gënanga, ngoi ayo deʼ airiadödoto yoböa. Onanga ihigokoino maporetoka de ihidailako la yakunu imateke ade-ade de Unanga. 47Womatëngo yowöe-wöe manga hidogoronaka gënanga wïtemo o Yesusika, ”Bapa, ngoni ayo deʼ aniriadödoto naga doka maporetoka. Onanga yömau imateke ade-ade de Ngona Bapa.”
48Hoʼ o Yesus wohaluhu, ”O nagona Ngohi ayo? O nagona Ahi riadödoto?” 49Daha Unanga wätumutu iwinö ninïkika deʼ wotemo, ”Nenangala Ngohi ayo deʼ Ahi roriadödoto. 50O nyawa yadodiai ahi Ama o horogaka Ai mau, geönanga Ahi riadödoto o nauru, de Ahi biranga, deʼ Ngohi ayo.”
Currently Selected:
O MATIUS 12: TLB
Highlight
Copy
Compare
Share
Want to have your highlights saved across all your devices? Sign up or sign in
