O MATIUS 11
11
O Yohanis Woohi-ohiki aihuhuloko
(Luk. 7:18-35)
1Ipaha o Yesus wohidöaka o hidumutu-hidumutu yangimoi de yahinoto iwinöninïkika gënanga, Unanga wamal̄a o ngï gënanga. Unanga woiki wodotoko deʼ wohingahu ma Jou Madutu aibehehongo, o kota imakokadateke wögetongo.
2O Yohanis Woohi-ohiki naga o bui magoronakahi, woihene mangale o Kristus aimanarama. Deʼ unanga wähuloko iwinö ninïki yoiki o Yesusika la iwileha, 3”Bapa Ngona nënanga aha noböa imoteke ma Jou Madutu aijaji, ekola ngomi kokiani mia damä o nyawa mahomoa?”
4O Yesus wohaluhu, ”Nima kilioro o Yohanisika, deʼ niwihi ngahu okia niamäke deʼ okia niihene: 5#Yes. 35:5-6, 61:1 O nyawa yopiloko imahi öriki, o nyawa yolugu-lugu imädagi, o nyawa yäpado yotogumu; de o nyawa yätopongono imahihene, o nyawa yohonenge yowango okali, deʼ o Abari ma Oa ma Jou Madutuoka ihingahu o nyawa mihikinika. 6Youtumu o nyawa yomau ihi tila Ngohi de mahababu ihi mäkeua!”
7De o Yohanis aihuhuloko gënanga yopahaka, o Yesus womuläenge wätemo o nyawa manga ngöe-ngöeika mangale o Yohanis, wato, ”Ngini nioiki o tonaka ikokakahaika okia niolega? O momo o utumoi o hidal̄oko yawüwuwu? 8Ngini nioiki okia niolega? Womatëngo wapäke o pakeanga mahöhailoa? O nyawa yapäke-päke o pakeanga mahöhailoa gënanga yogogere o kadatoka! 9Hoʼ yadodoa hongini nioiki o tonaka ikokakahaika? La niwi lega manabi womatëngo? Itiai, iholoioli de o nabi moi. 10#Mal. 3:1 Hababu o Yohanis genangala Ma Jou Ai Demo ma Buku ihingahu,
Ma Jou Madutu wotemo, ’Ne ünanga Ahi huhuloko,
Ngohi tïhuloko ünanga wohira de ngona
hupaya ünanga wonï belenga o ngëkomo mangale Ngona.’
11Nio hohininga! O duniaka nënanga moiua naga o nyawa iholoi yolamoko de o Yohanis Woohi-ohiki. Ngaro hokogënanga, o nyawa duru yoeteke ma Jou Madutu aiumati mahidogoronaka, önanga gënanga iholoi yolamoko de o Yohanis. 12#Luk. 16:16 Madero o Yohanis wohiabari aidodötoko hiädono o örahanënanga, o nyawa ihidailako yakuaha de yätatoko ma Jou Madutu aiumati. 13Hiädono o Yohanis aiböa mata-mata o Musa aitita de o nabi-nabi manga dodötoko, ihiraka ihingahu mangale o hali-o hali kokiani idadi. 14#Mal. 4:5; Mat. 17:10-13; Mark. 9:11-13 Deʼ nako ngini nimau ningaku o Yohanis genangala o Elia, kiaka aiböa ihi ngahuoka ihira. 15Nako de nia ngauku niihene!
16De okia kokiani Ngohi tahitero o nyawa o örahanënanga? Onanga hokä o ngoha-ngohaka yogogeruku o paharoka. O doomu moi yäböaka o doomu mahomoaika, 17’Ngomi mimusikoka miarame-rameoko, mä ngini nironggeua! Ngomi mihinyanyioka o duka manyanyi miainga-ingara mä ngini niariua!ʼ 18O Yohanis waino – ünanga wopuaha deʼ wokerua o angguru; deʼ o nyawa yato, ’Unanga o hetanga iwï ngohamika!ʼ 19Oraha nanga o Nyawa manga Ngohaka, waino – Unanga wol̄omo deʼ wokere; ho o nyawa yato, ’Niamäke o nyawa gënanga! Wokal̄il̄u, wotoba daluku, o soungu yogaho-gahoko manga dodiawo, deʼ o baradoha manyawa manga dodiawo.’ Ngarokö hokogënanga, ma Jou Madutu aisawaro to ëna mahasiloka aha inyata igoungu.”
O kota ingaku-ngakua
(Luk. 10:13-15)
20Deʼ o Yesus womuläenge wöngelo o kota-kota, kiaka genangoka Unanga iwöe wodiai o nonako ihëra-hëranga. Hababu o kota manyawa genangoka yoluku yotoba, mangale o baradoha. 21#Yes. 23:1-18; Yeh. 26:1–28:26; Yl. 3:4-8; Za. 9:2-4 ”Nibodito ngini, Korazim! Deʼ ngini Betsaida manibodito! Hohiade nako o nonako ihëra-hëranga idiai o Tirus deʼ o Sidon makotaka, hokä idiaioka ngini niahidogoronaka, marai o Tirus deʼ o Sidon manyawa, madekanoka yotoba mangale manga baradoha deʼ yapäke o huha mapakeanga inoli yogelenga o kafo manga häekuku. 22Niohohininga o Kiamati ma Wangeoka o Tirus deʼ o Sidon manyawa de ngini, ahao o Tirus deʼ o Sidon manyawa iholoi igapanga ma Jou Madutu wä apongo! 23#Kej. 19:24-28; Yes. 14:13-15 Deʼ ngini, Kapernaum! Boteka ngini aha inïtede hiädono o horogail̄e? Kowali! Mä ngini aha inïumo o narakaika! Hababu ade-ade nako o nonako ihëra-hëranga, idodiaioka niahidogoronaka gënanga de idiai o Sodom makotaka, o Sodom gënanga kanaga ohi hiädono o öraha nënanga! 24#Mat. 10:15; Luk. 10:12 Niohohininga, o Kiamati ma Wangeoka, o Sodom manyawa de ngini, ahao o Sodom manyawa iholoi igapanga ma Jou Madutu wä apongo!”
Niaino Ngohino
(Luk. 10:21-22)
25O örahagënanga o Yesus womä niata, ”Ama, o Jou nakokuaha o dihanga deʼ o dunia! Ngohi totemo tarima kasi Ngonaika karana mata-mata gënanga Ngona narahasia o nyawa yososawaroika, deʼ o nyawa yohohakolaika, mä Ngona nahidumutu o nyawa yohohakola ikaua. 26Genangala Ama anihininga isanangi.”
27 #
Yoh. 3:35, 1:18, 10:15 Deʼ o Yesus wotemo, ”Hagala moi-moi o Ama wohilapahioka Ngohino. Mahomoa de o Ama, kamoiö de o nyawa iwi näkoua ma Ngohaka. Mahomoa de ma Ngohaka, moiua iwinäko ma Ama, deʼ o nyawa o nagona ma Ngohaka wahinäko ai Ama geönanga iwi näko ma Ama.
28Niaino Ngohino, ngini mata-mata inïbole-boleoka, deʼ nia mäo niagina madubuho; Ngohi aha tohidöaka nginika o röehe maguwini. 29#Yer. 6:16 Niamoteke Ahi pareta deʼ nimädotoko Ngohino. Hababu Ngohi nënanga Ahi hininga ibole deʼi poluluku, de ngini aha niamäo niaröehe iuwini. 30Karana To ngohi ahi pareta nisanangi, deʼ o gina Tinihi tagongo nginika iuwini.”
Currently Selected:
O MATIUS 11: TLB
Highlight
Copy
Compare
Share
Want to have your highlights saved across all your devices? Sign up or sign in
