O IMAMAT 8
8
O Musa wä tabis o Harun deʼ aingoha-ngohaka
(Kel. 29:1-37)
1Ma Jou wïtemo o Musaika, 2”Nä ahoko o Harun deʼ aingoha-ngohaka deʼ yao o imam ma pakeanga, o upacara maminya, o hapi magö o dutu moi mangale o baradoha ma apongo mahuhuba, o duba manauru o dutu hinoto deʼo roti maragi koiwa-iwa o karaja moi. 3De nä huloko o Israel manyawa yongodumu ima toomu Ahi Tau mahimangoka.”
4O Musa wadiai okianaga ma Jou wohipoparetaka. Maöraha o kawaha yongodumu imatoomuoka o ngïoka gënanga, 5o Musa wätemo onangika, ”Okia naga tadodiai o öraha nënga ganga ma Jou Ai tita.”
6De ünanga wä huloko o Harun deʼ aingoha-ngohaka yotagi ma nga himangiha deʼ yaihoro manga diri. 7De iböto ünanga wihipake o imam mapakeanga o Harunika: o kameja, o gorona maninikutu, deʼ o juba. Inoli o kutanga ihilö liko-liko ai goronaino deʼ o liliko o ngoëre ma aluhu. 8Daha wihipake o alu madadamunu o Harunika, deʼ o alu ma dadamunu magoronaika wohingohama o Urim deʼ o Tumim. 9Daha wogelenga o haëke madadamunu o Harun ai haëkuku, deʼo haëke madadamunika gënanga wohitodengika o pake-pake o gurasi, ihi nonako o Harun wodadioka to ma Jou. Mata-mata gënanga o Musa wadiai imoteke ma Jou Aipareta unangika.
10Daha o Musa wal̄ë o upacara maminya deʼ wohinauhu ma Jou Ai Tauika deʼ hagala mapakakaha. De hoko gënanga mata-mata ihi tingakoka ma Jouika. 11O minya gënanga mahuhutulu wodohurero wohigali matumidi o huhuba mangï mal̄okuino deʼ mata-mata mapakakaha ikali o bak mal̄okuino deʼ mabukuku. De hoko gënanga mata-mata ihi tingakoka ma Jouika. 12Genanga deʼ iböto o Musa witabis o Harun wihituagi o upa cara maminya mahuhutulu ai haëkuku. 13Daha ünanga wähuloko o Harun ai ngoha-ngohaka yotagi ma himangiha. Wahipake onangika o kameja deʼ o gorona maninikutu. Daha wä gelenga o haëke madadamunu toönanga manga haëkuku hokä ma Jou wihipopareta unangika.
14De iböto o Musa wal̄ë o hapi magö o dutu moi mangale o baradoha ma apongo mahuhuba. O Harun deʼ ai ngoha-ngohaka yogelenga toönanga manga giama o aiwane gënanga mahaëkuku. 15Daha o Musa watoaka deʼ wal̄ë ma awunu o hidoku moi. O awunu gënanga wohinauhu de ai hagarara o tatadukika o huhuba mangï malibuku-libukuoka, hupaya o huhuba mangï gënanga ihi tingakoka ma Jouika. O awunu maboloi ihi tuagi o huhuba mangi makoholeuka. Iboko genala ma cara o huhuba mangi genanga ihi tebini de ihi tingika mangale ma Jou. 16O hapi gënanga dahaö yatoakuku gënanga, o Musa wal̄ë mata-mata maraka ma mamata madol̄a yahawo-hawoino, madudu ma hiri deʼ mahaki deʼ magate duru maoa-oa. Genanga mata-mata ya tuhuku o huhuba mangï mal̄okuoka. 17Mä o hapi gënanga ma akeme, makai, ma mamata madol̄a ma boloi ikali mawariki, hoʼ ingodumu o hapi gënanga sawaliua ma hidoku-hidoku yatinga-tingakoka yatuhuku o doomu matau ma poretika hokä ma Jou wohipopareta.
18De ipaha o Musa wal̄ë o duba manauru mangale o huhuba ya tuhu-tuhuku, daha o Harun deʼ aingoha-ngohaka yogelenga toönanga manga giama o duba gënanga mahaëke mal̄okuku. 19O Musa watoaka o duba gënanga deʼ ma awunu wohituagi ma huhuba mangï magumuruku iatika. 20-21Daha o aiwani gënanga walui-luiti deʼ ma mamata madol̄a ikali mal̄ou waihoro de o akere. Ma haëke, mahaki, deʼ o duba manauru gënanga ma akeme maboloi mangale o huhuba yatö tuhu-tuhuku o huhuba mangï mal̄okuoka hokä ma Jou wihi popareta unangika. O huhuba yatö tuhu-tuhuku gënanga mabounu yasanangi ma Jou Ai hininga.
22Daha o Musa wal̄ë o duba manauru o dutu moioli mangale o imam matabisang mahuhuba. O Harun deʼ aingoha-ngohaka yo gelenga toönanga manga giama o duba gënanga mahaëke mal̄okuoka, 23daha o Musa watoaka. Genanga deʼ iböto wal̄ë o aiwani gënanga ma awunu mahuhutulu, deʼ wohinauhu o Harun ai ngauku manirakika, ai giama mahagarara mal̄eha manirakika deʼ ai l̄ou mahagarara mal̄eha maniraka. 24De ipaha ünanga wä huloko o Harun aingoha-ngohaka imahi tigi, wohinauholi mahuhutulu o awunu toönanga manga ngauku ma nirakika, manga giama mahagarara mal̄eha manirakika, ikali toönanga manga l̄ou mahagarara mal̄eha maniraka. Ma awunu maboloi wohituagi o huhuba mangï magumuruku iatika. 25O Musa wal̄ë o duba gënanga mahaki, mabikini mahaki-haki, mata-mata maraka yatamu-tamunu mamamata madol̄a, magate duru maoa-oa, madudu mahiri deʼ mahaki ikali mal̄ou maniraka. 26O roti maragi koiwa-iwa ihi huba-huba ma Jouika o karaja oka o Musa wal̄ë o gahumu moi o roti mabiri-birini yadodiai deʼ o minya deʼ o gahumu moi o roti mangina-ngina. O roti gënanga wakelenga o duba mauguru maniraka deʼ mahaki mal̄okuoka. 27Ingodu-ngodumu wakelenga o Harun deʼ aingoha-ngohaka manga giamuku, daha ünanga wohihuba hokä o huhuba ihi dumu-dumutu ma Jouika. 28Genanga deʼiböto o inomo gënanga o nangoka deʼo Musa wa l̄ë deʼ watuhuku o huhuba mangï mal̄okuoka, kamamoi de o huhuba yatö tuhu-tuhuku mangale o tabisan mahuhuba. O hu huba o inomo gënanga ma Jou Ai hininga yasanangi. 29Daha o Musa wal̄ë o duba gënanga ma alu mangunungu deʼ wohihuba hokä o huhuba ihi dumu-dumutu ma Jouika. O duba ma nauru ihihö huba-huba mangale o imam matabisan ma upacara gënanga doka o Musa ai hidoku. Mata-mata o Musa wadiai hokä ma Jou wohipopareta unangika.
30Genanga deʼ iböto o Musa wal̄ë o hidoku moi o upacara maminya deʼ o hidoku moi o awunu o huhuba mangï mal̄okuoka daha wädohurero o Harun deʼ aingoha-ngohakika ikali toonanga manga pakeangika. De madodagi hoko gënanga o Musa wä tingakoka önanga ma Jouika deʼ toönanga manga pakeanga.
31De ipaha o Musa wätemo o Harun deʼ aingoha-ngohakika, ”Nia hakai o hiode ma akeme o huhuba gënanga ma Jou Ai Tau ma ngorana mahimangoka. Imoteke ma Jou Aipareta, ngini kokiani nia ol̄omo genangokadau deʼ o roti o tabisan mahuhuba o karaja magoronaka. 32O hiode ma akeme deʼ o roti maboloi kokiani ngini nia tuhuku nia mata-mataka. 33O wange tumidi madekana ngini yakunua nia mal̄a ma Jou Ai Tau hiädono nia tabisan ma upacara iböto. 34Ma Jou wohipareta hupaya okia ngone hadodiai o wange nënanga hadiaioli nenangoka dau de ihikaika. De o upacara gënanga nia baradoha iapongo. 35Ma dekana o wange tumidi, o hutu deʼ o wange, kokiani ngini nigogogere o Tau mangorana mahimangoka mangale niadiai okia ma Jou wohipopareta. Nako ngini niadiaiua, ngini aha nihonenge. Genanga doka ma Jou wohipopareta ngohino.” 36Daha o Harun deʼ aingoha-ngohaka yadiai mata-mata ma Jou wihipopareta o Musaika.
Currently Selected:
O IMAMAT 8: TLB
Highlight
Share
Compare
Copy
Want to have your highlights saved across all your devices? Sign up or sign in
