O IMAMAT 7
7
O rugi madagali mahuhuba
1Nenanga doka o datoro-o datoro mangale o rugi madagali ma huhuba. O huhuba gënanga duru itebini. 2O aiwani mangale o huhuba kokiani yatoaka o aiwani mangale o huhuba yatö tuhu-tuhuku yatoa-toaka mangïoka, daha ma awunu ihituagi o huhuba mangï magumuruku iatika. 3-4Ma imam kokiani wohihuba o huhuba mangï mal̄okuoka o aiwani gënanga mahaki mata-mata, mabikini deʼ mahaki-hakioka, mahaki yatamu-tamunuku mamamata madol̄a, madudu mahiri deʼmahaki, deʼ ma gate duru maoa-oa. 5Genanga mata-mata kokiani yatuhuku o huhuba mangï mal̄okuoka hokä o huhuba o inomo ma Jouika. O huhuba gënanga ganga mangale o rugi madagali mahuhuba. 6Moi-moi o ngohaka o nauru o imam-imam manga tau madol̄a yakunu yaol̄omo deʼ mangïoli yodinga-dingakika, karana o huhuba gënanga duru itebini.
7Mangale o baradoha ma apongo mahuhuba deʼ o rugi madagali ma huhuba madatoro kaimatero, enagënanga: O hiode ma akeme ihihö huba-huba ganga ma imam wohihö huba-huba ai hidoku. 8O aiwani makaiö gënanga katoma imam. 9Moi-moi o huhuba yadodiaiuku yahö haro-harongo o haharo ngoka ekola yahohakai o bohokuku ekola il̄ofo-l̄ofo, idadi ma imam wohi huba-huba ai hidoku. 10Mä o huhuba yadodiai ukuoka yahohakaiua, kayaoa ihi ganu-ganu de o minya kayaoa madü dudungu ingodumu mangale o o imam-imam o Harun aidifauku, deʼ kokiani manga hidogoronaka imahikodoku imakoketero.
O dame mahuhuba
11Nenanga doka o datoro-o datoro mangale o dame mahuhuba ihi hö huba-huba ma Jouika. 12Nako o huhuba gënanga ihihuba mangale yotarima kasi, done önanga deʼo aiwani gënanga kokiani ihihubaö o roti ya pake-pakeua o ragi. O roti yaojo deʼo gopuno deʼ o zaitun maminya gënanga yakunu mabiri-birini, yakunoli o roti matore ngina-ngina ihinauhu deʼo minya, ekola o kukisi o gopuno yadodiai deʼo gopuno deʼ zaitun ma minya. 13Ma homoa deʼ gënanga kokiani ihihubaö o roti yadodiai deʼ maragioka. 14O roti ma rupa yogetongo o hidoku moi ko kiani ihi huba ma Jouika, deʼ gënanga ai hidoku ma imam wal̄o l̄ë-l̄ë o aiwani gënanga ma awunu deʼ wohituagi o huhuba mangï ika mangale o dame mahuhuba. 15Ma o hiode ma akeme kokiani ya ol̄omo mawange o aiwani gënanga ihihuba, kamahuhutulö mayakunua yamal̄aika hiädono yarehino o ngorumino.
16Maöraha nako womatengo wao o dame mahuhuba mangale wa ganapu ai jaji, ekola mangale o hininga mahuka mahuhuba, iparalua ingodumu yaol̄omo o wange gënanga dika. Maboloi yakunu yaol̄omo yarehino. 17Nako o wange mahangeoka kanagahi mahou, o hiode ma akeme gënanga kokiani yatuhuku yamata-mataka. 18Mä nako o wangeoka o hiode ma akeme gënanga kaya ol̄omoli, done o huhuba gënanga aha watarimaua deʼ iaoua o barakati o nyawaika gënanga yomoholoi idadi o haramu. O nyawa yaol̄o-ol̄omo yahowono deʼ kokiani yatagongo mahasili.
19O hiode ma akeme yakokorona okianaga ipese-peseke kokiani yatuhuku yamata-mataka deʼ yakunua yaol̄omo. O hiode ma akeme ahuhuba o Dame, aha kaidodi yaol̄omo o nyawa yapese-pesekua. 20Nako o nyawa yaol̄omo o aiwani ma akeme gënanga maöraha ünanga magogiria wopeseke, ünanga yakunokaua iwi etongo ma Jou Ai umati. 21Maöraha womatengo ipahaino wapeke o kia naga moi ipese-peseke, kayaoa ma ahali o nyawaino kayaoa o aiwani, deʼwaol̄omo o huhuba o hiode ma akeme gënanga, unangö yakunokaua iwi etongo ma Jou Ai umati.
22Ma Jou wohidöaka o Musaika o datoro-datoro gënanga 23mangale o Israel manyawa. O hapi mahaki, o duba ekola o kabingi yakunua yaol̄omo. 24O aiwani enanga mahirete ihonenge ekola o aiwani madorou yagoli mahaki, yakunua yaol̄omo, mä yakunu yapake mangale o paralu mahomoa. 25O nyawa yaol̄o-ol̄omo o aiwani mahaki yakunu ihi huba-huba mangale o huhuba o inomo ma Jou Madutuika, yakunokaua yä etongo ma Jou Ai umati. 26#Kej. 9:4; Im. 17:10-14, 19:26; Ul. 12:16, 23, 15:23 O Israel manyawa, kiaka dika yogogere, yakunua yaol̄omo o totaleo ma awunu ekola o aiwani mahomoa ma awunu. 27O nagona yatilakuru o datoro gënanga yakunokaua yä etongo ma Jou Ai umati.
28Ma Jou wohidöaka o Musaika o datoro-o datoro nënanga 29mangale o Israel manyawa. O nagona honanga yoao o dame ma huhuba, kokiani yatingaka o hidoku moi mangale o huhuba yatinga-tingakoka ma Jouika. 30Unanga mahirete kokiani woao o huhuba o inomo gënanga. Mahaki deʼ ma alu mangunungu o aiwani gënanga kokiani ihi huba hokä o huhuba ihidö dumu-dumutu ma Jouika. 31Ma imam kokiani watuhuku o aiwani gënanga mahaki o huhuba mangï mal̄okuoka, mä ma alu mangunungu ganga o imam-imam manga hidoku. 32Ma uguru maniraka kokiani ihidöaka hokä o bobatumu ya tinga-tingakoka 33ma imamika wohihö huba-huba o awunu deʼ mahaki o dame mahuhuba gënanga. 34Ma alu mangunungu deʼ mauguru maniraka ganga o ngongike yatinga-tingakoka ma Jou wal̄ë o Israeloka manga huhuba ihi dumu-dumutino deʼ wahidöaka o imam-imamika. Genanga doka o Israeloka manga bobatumu o imam-imamika mangale kahi ado-adonika. 35O inomo ihihö huba-huba ma Jouika, o hidoku gënanga ya hi döa-döaka o Harun deʼ aingoha-ngohaka mawange önanga yä tabis yodadi o imam. 36O wange gënanga ma Jou wahipareta o Israeloka hupaya toönanga manga huhubaino, o hidoku gënanga mangale o imam-imam. O datoro gënanga o Israeloka kokiani ihi ngounu kahi ado-adonika.
37Hoko gënanga o datoro-o datoro gënanga mangale o huhuba yatö tuhu-tuhuku, o huhuba ihi dodiai ukuoka, o baradoha ma apongo mahuhuba, o rugi madagali mahuhuba, deʼ o dame mahu huba. 38Ma Jou wohidöaka o tita gënanga o Musaika o Sinai mal̄okuoka maöraha nanga wä huloko o Israeloka ihi huba o hu huba o Sinai matonaka ikokakahaoka.
Currently Selected:
O IMAMAT 7: TLB
Highlight
Share
Compare
Copy
Want to have your highlights saved across all your devices? Sign up or sign in
