O IMAMAT 14
14
Yä pado itogumu ipahaino deʼ ima tebini maupacara
1Ma Jou wohidöaka o Musaika 2#Mat. 8:4; Mark. 1:44; Luk. 5:14, 17:14 o datoro-o datoro nënanga mangale yapado ibobahaya itogumu ipahaino deʼ imatebini ma upacara. Mawange o nyawa gënanga ihi nyata wotebini, kokiani ünanga iwiao ma imamika, 3deʼ ma imam wïao o Tau madoomu maporetika. Nako i moteke wï tailakoka o nyawa gënanga wotogumoka, 4ma imam wï huloko ünanga woao o totaleo manga ngango o dutu hinoto ihoharamua, deʼ o dobiki moi o liwewuru magota, o lawe magumini madoka-dokara deʼ o hisop o tage moi. 5O totaleo o dutu moi kokiani watoaka o bohoko o tonaka mal̄okuoka madol̄a o jobubu ma akere madebi-debini. 6O totaleo o dutu moioli deʼ o liwewuru magota, o lawe ma gumini madoka-dokara deʼ o hisop o tage moi kokiani watono o totaleo ma awunuku yatö toa-toakoka. 7Ma imam kokiani wï dohurero o totaleo ma awunu gënanga o nyawa wotogu-togumokaika, wohigali matumidi. Daha ma totaleo mangango kokiani yaötana o tonaka ma lua-luasika. 8De ipaha o nyawa gënanga kokiani wafoka ai pakeanga, wa kori ai tadauru mata-mata, deʼ woma ohiki. Done ünanga wo tebinoka, deʼ yakunu wowohama o Tau madoomuika, mä o wange matumidoli madekana ünanga yakunowahi wowohama ai tau mahireteika. 9O wange matumidoka ünanga kokiani wakori ai tadauru mata-mata, ai parahiö, ai gorohutu deʼ mata-mata ai gogo ai röehoka. Daha ünanga kokiani wafoka ai pakeanga deʼ woma ohiki. Genanga deʼ iböto daha ünanga wotebini.
10O wange matufangeoka o nyawa gënanga kokiani woao o duba manauru o dutu moi ma umuru o taongo moi, moi-moi koiwa naga deʼ manabo. Ma homoa deʼ gënanga o tarigu o kilo hange ihi ganu-ganuoka deʼ o zaitun maminya deʼ o zaitun maminya o litere moi deʼ ya regu hange. 11Daha ma imam kokiani wïao ünanga kamamoi deʼ ai huhuba gënanga ma Jou Ai Tau mangorana mahimangoka. 12Ma imam kokiani wal̄ë o duba mangohaka ma nauru o dutu moi deʼ o zaitun maminya o litere moi deʼ iregu hange mangale o rugi madagali mahuhuba, deʼ wohihuba hokä o huhuba ihi dumu-dumutu ma Jouika. 13O duba ma ngohaka gënanga kokiani watoaka o ngï yö dinga-dingakoka mangale o aiwani yatoa-toaka mangale o baradoha ma apongo mahuhuba deʼ o huhuba yatö tuhu-tuhuku. O duba gënanga kokiani yatoaka genangokadau karana o rugi madagali mahuhuba deʼ o baradoha ma apongo mahuhuba ganga duru itebi-tebini deʼ idadi to ma imam ai hidoku. 14Ma imam kokiani wal̄ë o duba mangohaka ma awunu mahuhutulu daha wohinauhu ai ngauku manirakika, ai giama mahagarara mal̄eha manirakika deʼ ai l̄ou mahagarara mal̄ëha maniraka o nyawa aha iwihinyata wotebini. 15Ipaha ma imam wal̄ë o zaitun maminya mahuhutulu deʼ woguhe ai giama mahigili mahoatuku mahirete. 16De iböto ünanga watono ai giama mahagarara ma niraka o minyauku, deʼ wodohurero wohigali matumidi ma Jou Ai Tau ma goronaka. 17Daha mahuhutulu o minya ai giama mahoatoka kokiani wo hinauhu o ngï-o ngï wohinau-nauhoka o awunu, enagënanga ai ngauku manirakika, ai giama mahagarara mal̄ëha maniraka, deʼ ai l̄ou mahagarara mal̄ëha maniraka o nyawa aha iwihinyata wotebini. 18O minya maboloi kokiani yoduguhe o nyawa gënanga ai haëkuku. De hoko gënanga ma imam wodiai o nyawa gënanga ai debini ma upacara ma Jou Ai himangoka.
19Ipaha ma imam kokiani wohihuba o baradoha ma apongo mahu-huba hupaya o nyawa wopese-pesekoka gënanga idadi wotebini. De iböto ünanga kokiani wotoaka o aiwani mangale o huhuba yatuhu-tuhuku 20deʼ wohihuba wohidomoteke o huhuba ihi dumu-dumutu o huhuba mangï mal̄okuoka. De hoko gënanga ma imam wodiai o debini ma upacara mangale o nyawa gënanga, ünanga wodadi wotebini.
21Nako o nyawa gënanga womihikini deʼ womagakunua, done mangale o rugi madagali, mahuhuba ünanga yakunu wao o duba ma nauru ngohaka dika mangale o huhuba ihidö dumu-dumutu ma Jouika. Ma homoa deʼ gënanga o tarigu o kilo moi ihiganu deʼ o zaitun maminya mangale o huhuba ihi dodiaiukuoka, deʼ o zaitun maminya o litere moi yaregu hange. 22Unanga kokiani wao o namodara magö o dutu hinoto ekola o pombo furu magö: o dutu moi mangale o baradoha ma apongo ma hu huba deʼ o dutu moioli o huhuba yatö tuhu-tuhuku. 23Mata-mata ihihö huba-huba gënanga kokiani wao ma imamika ma Jou Ai Tau mangorana mahimangoka ai diri madebini ma upacara mawange tufangeoka. 24Ma imam wal̄ë o duba mangohaka deʼ o zaitun maminya gënanga deʼ wohihuba hokä o huhuba ihidö dumu-dumutu ma Jouika deʼ gënanga ma imam ai hidoku. 25De ma imam kokiani watoaka o duba mangohaka gënanga deʼ wohinauhu ma awunu mahuhutulu ai ngauku manirakika, ai giama mahagarara mal̄ëha manirakika deʼ ai l̄ou mahagarara mal̄eha manirakika o nyawa aha ihi nyata wotebini. 26Ma imam kokiani o minya mahuhutulu woguhe ai giama ma higili mahoatuku 27deʼ ai giama mahagarara maniraka wohigali matumidi wodohurero o minya gënanga ma Jou Ai Tau magoronaka. 28De naga mahuhutulu o minya ai giamoka kokiani wohinauhu o awunu ihinö nau-nauhokaika, enagënanga ai ngauku ma nirakika, ai giama mahagarara mal̄eha manirakika, deʼai l̄ou mahagarara mal̄eha manirakika o nyawa aha ihi nyata wotebini. 29Ma minya maboloi kokiani woguhe o nyawa gënanga ai haëkuku mangale ai diri ma upacara ma Jou Ai himangoka.
30Ipaha ma imam kokiani wohihuba o namo dara magö o dutu moi ekola o pombo furu magö, 31mangale o baradoha ma apongo mahuhuba, deʼ o dutu moioli mangale o huhuba yatö tuhu-tuhuku ihidomoteke de ai huhuba yadodiai ukuoka. De hoko gënanga ma imam wadiai o nyawa gënanga ai debini ma upacara ma Jou Ai himangoka.
32Nenanga doka o datoro mangale o debini ma upacara yapö pado-pado yopanyake yotogumino o nyawa ima gaku-gakunua.
O pado manonako o tauika
33Ma Jou wohidöaka o Musa deʼ o Harunika, 34o datoro-o datoro mangale o tau yohora-horaika o pado ma-nonako ihö hero-hero. O datoro-o datoro nënanga ipake o Israel manyawa yowohamoka o Kanaan matonakika, o berera ma Jou wahi-doa-doakoka onangika. 35O nagona honanga yamake o pado manonako manga tau ma goronaka, kokiani o hali gënanga ihi ngahu ma imamika. 36Ma imam woböa uwahi watailako o pado manonako gënanga, ünanga kokiani wahipareta hupaya hagala okia honanga ihihupu o tauoka gënanga. Nako kowali, naga okia dika o tauoka gënanga idadi ipeseke. Ma imam kokiani woböa 37mangale watailako o pado manonako gënanga. Nako naga itö-tubu-tubuku maijo-ijo ekola madoka-dokara yolega-lega hokä ihi gurimi mabebeno o mehelika, 38ma imam kokiani wamal̄a o tau gënanga deʼ imal̄aika ibenoino o wange tumidi madekana. 39O wange matumidoka ma imam kokiani woböa deʼ watailakoli. Nako o pado manonako gënanga ihero, 40-41ünanga kokiani wohipareta hupaya o bebeno o mehele mahelewo-helewo gënanga yakilianga deʼ yamode-modekika ma bebeno o mehele madol̄aino yakori. O mehele yakori-korino deʼ mahelewo-helewo gënanga kokiani yaumo o ngï ipese-pesekika o kota maporetika. 42Daha mahelewo-helewo ihi hupu-hupuoka gënanga kokiani yatagali deʼ o helewo mahungi. Ya mode-modekika o tau gënanga mabebeno o mehele kokiani ihilape de o mehele mahungi.
43Nako o pado manonako gënanga ipudali ena hioko o tau gënanga mahelewo yatagalioka deʼ mabebeno o mehele yakorioka deʼ yamehelokali, 44done ma imam kokiani woböa deʼ watailakoli o tau gënanga. Nako o pado manonako gënanga igoungu ihero done o tau gënanga ipeseke, 45deʼ kokiani yakilianga. Ma helewo, magota-gota deʼ ingodumu mamehele kokiani yao o ngï ipese-pesekika o kota maporetika. 46Ihira de gënanga o nagona dika yowohama otauika gënanga yodadi yopeseke hiädono o wange itumunu. 47O nagona honanga imaidu ekola yol̄omo o tauoka gënanga kokiani manga pakeanga yafoka. 48Mä nako ma imam woböa deʼ imoteke ünanga watailako ipudaokaua o pado manonako o tau gënanga yamehele iböto, ünanga kokiani wohinyata o tau gënanga itebini, hababu o pado manonako ihihangoka ingodumu. 49Mangale o tau madebini, ma imam kokiani woao o totaleo o dutu hinoto, o gota cemara, o gumini madoka-dokara deʼ o hisop o tage moi. 50O totaleo o dutu moi kokiani watoaka o bohoko mal̄okuoka madol̄a o jobubu ma akere mamä maata. 51Daha o gota cemara, o gumini madoka-dokara, o hisop deʼ o totaleo mangango kokiani yatono o totaleo yatoa-toakoka ma awunuku deʼ o akere mamä maatuku. De iböto o tau gënanga yo dohurero ihigali matumidi. 52-53O totaleo kamangangohi kokiani yapidili o tonaka i lua-luasika o kota maporetoka. De hoko gënanga ma imam wadiai o tau madebini ma upacara, deʼ o tau gënanga idadi itebini.
54Genanga doka o datoro-o datoro mangale o panyake o pado ibobahaya, 55-56mangale ipoda-poda, iako-ako ekola itubu-tubuku ma gare-garehe ekola manga röehika il̄oboho, deʼ mangale o pado ma nonako o pakeangika ekola o tauika. 57O datoro-o datoro gënanga mafaidä ihitantu okianaga moi gënanga itebini ekola ipeseke.
Currently Selected:
O IMAMAT 14: TLB
Highlight
Share
Compare
Copy
Want to have your highlights saved across all your devices? Sign up or sign in
