O IMAMAT 13
13
O datoro mangale o panyake o pado
1Ma Jou wohidöaka o Musa deʼ o Harunika hagala o datoro nënanga; 2Nako womatengo wopoda-poda ekola iwi ako-ako ipoda-poda magare-garehe ai kaioka yakunu idadi o panyake o pado, ünanga kokiani iwiao ma imamika o Harun aidifauku. 3Ma imam kokiani watailako ai kai ipopanyake o nyawa gënanga. Nako ai gogo ipopanyakeika gënanga idadi magare-garehe, deʼ ipopanyakeika wamake iholoi iluku deʼ ai kai ma gilolitino, o nyawa gënanga wopanyake iwi pado. Ma imam ko kiani wohinyata o nyawa gënanga wopeseke. 4Mä nako ai kai ipopanyake magare-garehe deʼ iholoiua i luku deʼ ai kai magilolitino, deʼ ai gogo ipopanyakeö gënanga koma gare-garehua, o nyawa gënanga kokiani iwi tingaka o wange tumidi madekana. 5O wange matumidoka, ma imam kokiani wogilioli wïtailako. deʼ nako imoteke ai damake o panyake gënanga madodagi kahirahi deʼ iheroua, o nyawa gënanga kokiani iwi tingaka madekana o-wange tumidoli. 6O wange ma tumidoka ma imam kokiani wogilioli wïtailako, deʼ nako ai kai ipopanyake ihihangoka deʼ koi heroua, ma imam kokiani wohinyata o nyawa gënanga wotebini. Genanga o kai mapanyake ibohagaua. O nyawa genanga holingohu wafoka ai pakeanga de unanga wodadi wotebini. 7Mä nako ma imam wohi nyata wotebini ipahaino o nyawa gënanga ai panyake ihero, ünanga kokiani wogilioli wï himanga ma imam. 8Ma imam kokiani wï tailakoli deʼ nako ai panyake igoungu iheroka, o nyawa gënanga kokiani ihi nyata wopeseke; ünanga wopanyake iwi pado ibobahaya.
9Womatengo iwi pado ibobahaya kokiano iwiao ma imamoika. 10Nako iwi tailako deʼ imoteke ma imam o nyawa gënanga ai kaioka naga o nabo magare-garehe, 11o nyawa gënanga iwi pado. Ma imam kokiani wohi nyata o nyawa gënanga wopeseke. Iparalua ünanga iwi tingaka, karana yanako-nako de madiaioka ünanga wopeseke. 12Nako ma imam wamake ipoda-poda magare-garehe gënanga iheroka ai haëkoka hiädono ai l̄ouku, 13deʼ imoteke ma imam wï tailako o panyake gënanga i heroka yamode-modekika ai roëhe de ai kai idadioka magare-garehe, o nyawa gënanga ihi nyata wotebini. 14Mä nako iako-ako ipuda, ma imam kokiani watailakoli. 15Nako gënanga itiai iako-ako, o nyawa gënanga kokiani ihi nyata wopeseke, karana ünanga wopanyake iwi pado ibobahaya. 16Mä nako iako-ako gënanga itogumu deʼ idadioli magare-garehe, o nyawa gënanga kokiani wï himanga ma imam, 17hupaya wï tailakoli. Nako iako-ako gënanga igoungu i dadioka magare-garehe, ma imam wohi nyata o nyawa gënanga wo tebini.
18Nako womatengo ai boroho itogumoka, 19mä mabokekika ipuda manabo magare-garehe ekola ipoda-poda ma gare-garehe deʼ itokara, o nyawa gënanga kokiani wï himanga ma imam, 20hupaya wï tailako. Nako ipoda-poda gënanga yolega-lega iholoi iluku deʼ ai kai yakilolitino deʼ ai gogo genangokadau idadiokali magare-garehe, ma imam kokiani wohi nyata o nyawa gënanga wopeseke. O boroho gënanga o panyake o pado matiti. 21Mä nako iwi tailako deʼ imoteke ma imam ai gogo genangokadau koma gare-garehua, deʼ genangokadau ai kai i holoiua iluku deʼ ai kai magilolitino, duga-duga kama kafo-kafo, o nyawa gënanga kokiani iwi tingaka o wange tumidi ma dekana. 22Nako o tugal̄a gënanga ingaliua deʼ koi heroua, gënanga duga-duga o boroho mabokeke, hoʼ o nyawa gënanga ihi nyata wotebini. 23Mä nako o tugal̄a gënanga ingaliua deʼ iheroua, gënanga duga-duga o boroho mabokeke, hoʼ o nyawa gënanga ihi nyata wotebini.
24Nako wotengo iwï uku deʼ ai kai manaboika gënanga imadadi magare-garehe ekola iarehe deʼ itokara, 25ma imam kokiani wï tailako. Nako ai gogo genangokadau idadi magare-garehe deʼ manabo iholoi iluku deʼ makai ma gilolitino, done o panyake pado yö horaka youku-uku gënanga deʼ ma imam kokiani wohi nyata o nyawa gënanga wopeseke. 26Mä nako ai gogo genangokadau koi arehua deʼ genangoka dau iholoiua iluku deʼ ai kai magilolitino, duga-duga kama kafo-kafo, done o nyawa gënanga kokiani iwi tingaka o wange tumidi madekana. 27O wange matumidoka ma imam kokiani wö gilioli wï tailako. Nako o tugal̄a gënanga ihero done o nyawa gënanga wo panyake iwi pado ibobahaya deʼ kokiani ihi nyata wopeseke. 28Mä nako tugal̄a gënanga ingaliua deʼ koi heroua, duga-duga iholoi iarehe, gënanga o padoua. Ma imam kokiani wohi nyata o nyawa gënanga wotebini, hababu magare-garehe gënanga duga-duga o nguku manabo mabokeke.
29Nako womatengo o nauru ekola momatengo o ngoheka yo panyake yä pado manga haëkika ekola manga okokika, 30kokiani ma imam wä tailako önanga. Nako ipopanyakeika gënanga yolega-lega iholoi iluku de manga kai magilolitino, deʼ manga tadauru ekola manga parahi kamagogurati daha iturono, done o nyawa geönanga yopanyake yä pado deʼ kokiani ihi nyata yopeseke. 31Nako yä tailako deʼ imoteke ma imam ipopanyakeika ya makeua iholoi iluku deʼ manga kai magilolitino, mä ya makeua manga tadauru ekola ai parahi genangokadau itumuloa, o nyawa geönanga kokiani yätingakika o wange tumidi madekana. 32O wange matumidoka, ma imam kokiani wogilioli watailako ipopanyakeika deʼ nako o panyake gënanga iheroua inoli yamakeua manga tadauru ekola ai parahi genangokadau kama gogurati, ikali yolega-lega iholoiua iluku deʼ ai kai magilolitino, 33o nyawa gënanga kokiani yakori manga tadauru ekola ai parahi ipopanyake magilolitino. Daha önanga kokiani yä tingakoli o wange tumidi madekana. 34O wange matumidoka, ma imam kokiani wö gilioli watailako. Nako manga panyake iheroua deʼ genangika dau yolega-lega ihi gurimua, o nyawa geönanga ihi nyata yotebini deʼ kokiani manga pakeanga yafoka. 35Mä nako ihi nyata yotebini ipahaika deʼ manga panyake ihero, 36ma imam kokiani wogilioli wätailako. Nako o panyake gënanga igoungu ihero, iparaluokaua ma imam wätailako boteka manga tadauru ekola ai parahi kama gogurati hababu ya nako madiaioka önanga yopeseke. 37Mä nako imoteke ma imam ai damake manga panyake iheroua deʼ manga tadauru ekola ai parahi iwango irahai genangokadau, o panyake gënanga itogumoka, deʼ ma imam kokiani wohi nyata önanga yotebini.
38Nako womatengo o nauru ekola momatengo o ngoheka deʼ manga tugal̄a manga kai ika, 39ma imam kokiani wätailako o nyawa geönanga. Nako o tugal̄a yolega-lega kama kafo-kafo, önanga duga-duga yä hora o hehega, de ihi nyata yotebini.
40-41Nako womatengo o nauru ai häeke maporetika ekola ma himangino ipalaloka, o palala gënanga yadiaiua ünanga wo peseke. 42Mä nako ipuda o noboho magare-garehe deʼ hokä itokara ipala-palalika, ünanga wopanyake iwi pado ibobahaya. 43Ma imam kokiani wï tailako o nyawa gënanga, deʼ nako igoungu naga o noboho magare-garehe deʼ hokä itokara, 44ma imam kokiani wohi nyata ünanga wopeseke karana wo panyake yapado ai häekika.
45Womatengo wopanyake iwi pado, kokiani wapake o pakeanga makakakihi deʼ wamal̄aika ai tadauru ifuta-futa. Unanga kokiani daengino ai bionino watamunu deʼ wopoa-poaka, ”O peseke! O peseke!” 46Hoko kia madekana iwi daene o panyake gënanga ünanga wo peseke deʼ kokiani ünanga wogogere o Tau madoomu ma poretoka, ai gurutika deʼ o nyawa mahomoa.
O datoro mangale o pado manonako
47Nako o pakeanga ekola o ngoëre o wol ekola o lenan, 48ekola o aiwani makai, ekola okia dika yadodiai deʼ o aiwani makai yamake o pado manonako, 49deʼ o pado manonako gënanga ma ijo-ijo ekola madoka-dokara, done o pado manonako gënanga ihö hero-hero deʼ kokiani ihi dumutu ma imamika. 50Ma imam kokiani watailako o baranga gënanga, daha wa tingakika o wange tumidi madekana. 51O wange matumidoka ünanga kokiani watailakoli, deʼ nako o pado manonako igoungu iheroka, o baranga gënanga ipëseke. 52Ma imam kokiani watuhuku o baranga gënanga, karana o pado manonako gënanga ihero-hero, hoʼ kokiani ya hohihanga deʼ o uku.
53Mä nako watailako deʼ imoteke ma imam o pado manonako gënanga iheroua o barangoka gënanga, 54ünanga wä huloko hupaya o baranga gënanga yaihoro deʼ yatingakika o wange tumidi madekana. 55Daha ma imam kokiani watailakoli. Nako o pado manonako gënanga iheroua makahirahi ma ijo-ijo ekola madoka-dokara, o baranga gënanga kai pesekohi deʼ kokiani yatuhuku, ngarokö o pado manonako gënanga duga-duga mahimangino ekola maporetino. 56Ma nako yatailako deʼ imoteke ma imam o pado manonako gënanga idadioka makafo-kafo, o ngoëre ekola o aiwani makai deʼ o pado manonako o barangoka gënanga kokiani yakakihi. 57Nako ipahaika ipudali done o pado manonako gënanga ihero, deʼ o baranga madutu kokiani watuhuku o baranga gënanga. 58Nako yafoka ipahaino deʼ o pado manonako o barangoka gënanga ihihanga, o baranga gënanga kokiani yaihoroli daha yapulono itebini.
59Hoko gënanga o datoro-datoro mangale o pado manonako ya mö make-make o pakeangoka ekola o ngoëre o lenan ekola o wol ekola okia dika yadodiai o aiwani makai.
Currently Selected:
O IMAMAT 13: TLB
Highlight
Share
Compare
Copy
Want to have your highlights saved across all your devices? Sign up or sign in
