O IMAMAT 11
11
O aiwani ihohalali deʼihoharamu
(Ul. 14:3-21)
1Ma Jou wohidöaka o Musa deʼ o Harunika o datoro-datoro nënanga 2-3mangale o Israel manyawa. mata-mata o aiwani iwö wango-wango o dudungoka iol̄o-ol̄omo o momo yawedere yogilio mahinoto deʼ makuliti ibelaka ganga ihalali yakunu nia ol̄omo. 4-6Uha nia ol̄omo o onta, o pelanduk ekola o kelinci. O aiwani gënanga iharamu karana ngaroka iol̄omo mainomo yawedere yogilio mahohinoto, mä makuliti ibelakua. 7O ode uha nia ol̄omo. O aiwani gënanga iharamu, karana ngaroka makuliti ibelaka, mä ënanga iol̄omo o inomo yogilioua mahinoto. 8Ma akeme yakunua nia ol̄omo deʼ mahonenge mai yakunua nia peke karana o aiwani gënanga iharamu.
9Ngini yakunu nia ol̄omo hagala irupa o nawoko deʼma ëboka deʼ ma unahoka. 10-12O aiwani iwo wango-wango o akere magoronaka mä maëbe koiwa deʼ koiwa maunaha ganga iharamu, hoʼ yakunua nia ol̄omo deʼ ma honenge yakunua nia peke.
13-19Hagala o totaleo mahidogoronaka nënanga doka yakunua nia ol̄omo karana ipeseke: o rajawali, o goroko, hagala irupa o kawihi deʼ o kol̄oba, o madäma, o wogono, o totaleo o unta, o ula-ula, o tumara, hagala irupa o huweko, o goroko, o totaleo o kasa deʼ o manoko.
20O aiwani ma alu-aluhu deʼ magogahuhuoka mata-mata iharamu, 21sawaliua ima tototubo. 22Hoʼ o kahoho, o kokerehe deʼ o kahoho mabihi-bihi yakunu nia al̄omo. 23Mä o aiwani ma alu-aluhu deʼ magogahuhuoka deʼ imatö tahe-tahe mata-mata ganga iharamu.
24-28Womatengo idadi wopeseke hiädono o wange itumunu nako ünanga wapeke moiani o aiwani nënanga mahonenge: o aiwani deʼ makuli-kulitoka, sawaliua makuliti ibö bela-belaka, deʼ iol̄omo o momo yawedere yogilio mahinoto, deʼ o aiwani mal̄ou iatoka deʼ naga makuliti maguru-gurutu. Onagona honanga yao o aiwani marupa gënanga mahonenge önanga ko kiani yafoka manga pakeanga, mä önanga kayopesekohi hiädono o wange itumunu.
29-30O karahe o tonakoka, o karahe malago-agomo, o karahe ma hohumujuru, o harawede, hagala ganga iharamu. 31O nagona honanga yapeke o aiwani gënanga ekola ma honenge idadi yopeseke hiädono o wange itumunu. 32Nako o aiwani mahonenge gënanga yoditifa o baranga moiuku, done o baranga gënanga idadi ipeseke. O hali gënanga idadi mangale hagala o baranga o gota, o ngoëre, o aiwani makai, ekola o ngoëre o karango, deʼ idadiua o loleha mangale okia o baranga gënanga ihipake. O baranga gënanga kokiani yatono o akeruku, mä kahirahi ipeseke hiädono o wange itumunu. 33Nako o aiwani mahonenge gënanga yoditifa manga bohoko otonaka magoronauku, hagala o bohoko magoronaka gënanga idadi ipeseke, deʼ o bohoko gënanga kokiani yapooteke. 34O inomo yakokorona o akere o bohokoka gënanga idadi peseke, deʼ yaoke-okere naga o bohoko magoronaka genangö idadi ipeseke. 35Okia dika yoditifa o aiwani mahonenge gënanga idadi ipeseke. O rikana ekola o haharongo o tonaka yakorona o aiwani mahonenge gënanga kokiani yapooteke karana ipeseke. 36Sawaliua o akere malako ekola o humu, hagala mahomoa idadi ipeseke nako yakorona o aiwani mahonenge. 37Nako o aiwani mahonenge gënanga yoditifa o gihihi ma mui aha ihitudukuku, o gihihi mamui gënanga kahirahi itebini. 38Mä nako o gihihi mamui gënanga kayatono ukuohi deʼ yoditifa o aiwani mahonenge gënanga, done o gihihi mamui gënanga ipeseke.
39O nagona honanga yapeke o aiwani o hohalali mahonenge gënanga idadi yopeseke hiädono o wange itumunu. 40O nyawa yaö ao-ao ekola yaol̄omo o aiwani mahonenge gënanga kokiani yafoka manga pakeanga, mä ünanga kahirahi wopeseke hiädono o wange itumunu.
41-42Mata-mata o aiwani imatö tika-tika o tonaka mal̄okuoka, kayaoa imatö tahe-tahe mal̄ou iatoka ekola mal̄ou ma ngöe, ganga iharamu deʼ yakunua nia ol̄omo. 43Uha nia peseke nia diri mangale nia ol̄omo o aiwani ma rupa hoko gënanga. 44#Im. 19:2; 1Pet. 1:16 Ngohi ma Jou nia Jou Madutu hababu gënanga nimä goana hupaya ngini kahirahi nitebini, karana Ngohi totebini. 45Ngohi nia Jou tinï ao-ao ngini o Mesir mabereraka deʼ ni hupu, hupaya Ngohi yakunu todadi nia Jou Madutu. Kokiani ngini ni tebeni, karana Ngohi totebini.
46Genanga doka o datoro mangale o aiwani, ikali o totaleo, o aiwani iwö wango-wango o akere magoronaka deʼ itö tika-tika o tonaka mal̄okuoka. 47Ngini kokiani yakunu nihili howono madebi-debini deʼ ipö pese-peseke, o aiwani yakunu nia ol̄omo deʼ o aiwani yakunua nia ol̄omo.
Currently Selected:
O IMAMAT 11: TLB
Highlight
Share
Compare
Copy
Want to have your highlights saved across all your devices? Sign up or sign in
