O IMAMAT 10
10
O Nadab deʼo Abihu manga baradoha
1O wange moiuku o Nadab deʼ o Abihu, o Harun aingoha-ngohaka yal̄ë manga uku mangï moi-moi deʼ yonoa o uku ma ngaboho. Daha önanga yogelenga o dupa o ukuika gënanga deʼ ihihuba ma Jouika. Mä o uku gënanga ihalaliua karana ma Jou wa hulokua önanga ihihuba. 2De ma Jou wä dotagao o uku yätuhuku önanga hiädono yo honenge ma Jou Ai Tauoka. 3Daha o Musa wïtemo o Harunika, ”Genanga doka ma Jou Ai dumutu maöraha nanga wotemo, ’Mata-mata ihilö leleani Ngohi kokiani yahoromati Ahi debi-debini. Ngohi aha tohi nyata ahi mulia ingodumu Ahi nyawaika.’ ” Mä o Harun kawo marirï doka dika.
4De ipaha o Musa wä ahoko o Misael deʼ o Elsafan, o Uziel aingoha-ngohaka, o Harun ai pepe. Wätemo onangika, ”Nia l̄ë nia riadodoto o tiete moi manga maiyeti ma Jou Ai Tauoka deʼ nia kelenga o doomu ma tau ma poretoka.” 5Onanga yo böa deʼ yoao o maiyeti-maiyeti deʼ mapopakea-ngokahi gënanga ihihupu o doomu ma tau maporetika, hokä o Musa wohipopareta.
6Daha o Musa wätemo o Harun deʼ aingoha-ngohakika ma homoa, enagënanga o Eleazar deʼ o Itamar, ”Uha nihi gumal̄a nia tadauru ihuta-hutaino, deʼ uha nia pakeanga nia kakihi mangale nihudumutu nia hininga ihuha deʼ nia pake o huha ma pakeanga. Nako ngini nia diai hoko gënanga, ngini aha ni honenge, deʼ o Israeloka manyawa yo ngodumu ma Jou wä ngamo. Mä o Israel manyawa mahomoa yakunu o huha mapakeanga yapake mangale o nyawa yahinoto yohö hone-honenge gënanga karana o uku ma Jouino. 7Uha nia mal̄a ma Jou Ai Tau hupaya ngini uha nihonenge, hababu ngini inï tabisoka deʼ o upacara maminya mangale ni wï leleani ma Jou.” Onanga yadiai hokä o Musa wa heto-hetongo.
O datoro mangale o imam-imam
8Ma Jou wïtemo o Hurunika, 9”O angguru ma akere niokere ipahaino ekola nia oke-okere ikua-kuata, ngona deʼ ani ngoha-ngohaka yakunua niwohama Ahi Tau magoronaika. Nako ngini nia tilakuru o datoro gënanga, ngini aha nihonenge. Mata-mata ani difauku kokiani ihi ngounu o pareta gënanga. 10Ngini kokiani niakunu nihilihowono yatinga-tingakoka mangale ma Jou deʼ yatö tinga-tingakua, ipö pese-peseke deʼ ipö pese-pesekua. 11Mata-mata o tita Tohi döa-döaka ngonaika itilakuru o Musa, kokiani ngini niä dotoko o Israel manyawaika.”
12 #
Im. 6:14-18
O Musa wätemo o Harun aingohakika yahinoto, o Eleazar deʼo Itamar, ”Nia l̄ë deʼ ma boloi o gandum o inomo ihi huba-huba ma Jouika. Gopunoino gënanga nidiai o roti maragi koiwa-iwa, daha niol̄omo gënanga o huhuba mangï madatekoka, karana o huhuba gënanga duru itebini. 13O roti gënanga kokiani nia ol̄omo o ngï itebi-tebinoka, hababu o inomo ihi huba-hubaoka ma Jouika, o roti gënanga idadi nia hidoku ngini deʼ nia ngoha-ngohaka o nau-nauru. Genanga ma Jou Ai pareta ngohino. 14#Im. 7:30-34 Mä ngini deʼ nia ngoha-ngohaka o nauru deʼ o ngoheka yakunu nia ol̄omo o huhuba ihidö dumu-dumutu ma alu mangunungu deʼ o huhuba yatinga-tingakoka mauguru. Genanga doka o imam-imam manga hidoku o Israel manyawa manga huhuba o dame mahuhubaino. Ngini yakunu nia ol̄omo isabaranga mangï ipö pese-pesekua. 15O huhuba yatinga-tingakoka mauguru deʼ o huhuba ihidö dumu-dumutu gënanga ma alu mangunungu kokiani niao kamamoi deʼ mahaki mangale o huhuba yatö tuhu-tuhuku hokä o huhuba yatö tinga-tingakoka mangale ma Jou. O hidoku-hidoku gënanga idadi tingini deʼ tonia ngoha-ngohaka mangale kahi ado-adonika, hokä ma Jou wohi popareta.”
16De ipaha o Musa woleha o kabingi mangale o baradoha ma apongo mahuhuba. Iwihingahu unangika o kabingi gënanga ya tuhukoka. O hali gënanga yadiai o Musa wä ngamo o Eleazar deʼ o Itamarika, deʼ ünanga wätemo onangika, 17#Im. 6:24-26 ”Yadodoa ho o baradoha ma apongo ma huhuba gënanga ngini nia ol̄omua o ngï itebi-tebinoka? O huhuba gënanga duru itebini; ma Jou wini hi döakoka ngini ika, hupaya o Israel ma nyawa manga baradoha iapongo. 18O kabingi ma awunu gënanga iaoua ma Jou Ai Tauika, hoʼ kokiani o huhuba gënanga ngini nia ol̄omo genangoka hokä ngohi tohipopareta.”
19O Harun wohaluhu, ”Maraioka o wange nënanga o Israel manyawa ihihubaka o baradoha ma apongo mahuhuba deʼ o huhuba yatö tuhu-tuhuku ma Jouika. Ngaroko hoko gënanga, o bodito nënanga ihitapal̄uoka ngohi. O demo ma ade o wange nënanga ngohi kata ol̄omo dika o baradoha ma apongo mahuhuba gënanga, boteka ma Jou aha wosanangi?” 20O Musa wamao wosanangi deʼ o bobaluhu gënanga.
Currently Selected:
O IMAMAT 10: TLB
Highlight
Share
Compare
Copy
Want to have your highlights saved across all your devices? Sign up or sign in
