O IBRANI 13
13
Sarakia hohisanangi ma Jou Madutu aihininga
1Kokiani ngini itatapu nimäkodora moi de moi hokä o roriadodoto o Haranioka manyawa. 2#Kej. 18:1-8, 19:1-3 Uha nidodato niatarima niatauoka o nyawa niänäko-näkoowahi. Hababu de nidiai hoko gënanga, mamoi iböto o nyawa, yanäko-näkoua, yätarimaka o malaekat manga tauoka. 3Niahininga hagala o nyawa o bui magoronaka, hokä nginiö naga dede önanga o bui magoronaka. Deʼ hagala o nyawa yahidapara isabarangika, kokiani ngini nimahininga onangika hokä nginiö inihi dapara hokogënanga.
4O nyawa mata-mata kokiani ihimatoko manga jako de mahoromati o gogil̄akika, mahababu gënanga o hekata de o rokata kiani yosetia moi de moi. O nyawa manga wowango isösafarune deʼ o nyawa yohowo-howono aha ma Jou Madutu wahidero o adili.
5 #
Ul. 31:6, 8; Yos. 1:5 Uha aniwowango yakuaha yönahihu o tiwika, mä kokiani ngini niamäo yaoaka de okia nginioka naga de maënanga. Hababu ma Jou Madutu wotemoka, ”Ngohi aha tonihigumal̄aua ekola aha toni mal̄aika ngona.” 6#Mzm. 118:6 Hababu gënanga ngone hobarani hotemo,
”Ma Jou ganga ahi Roriwo,
ngohi tohawanua.
Okia yakunu o nyawa yodiai ngohino?”
7Uhali niäwöhanga initötuda-tudaika ihingöngahu-ngahu ma Jou Madutu aibehehongo nginika. Niatailako sarakia önanga yowango deʼ sarakia önanga yohönenge, deʼ nimäduru toona manga ngongaku. 8O Yesus Kristus itatapu imatero, yaoa ihiraino, öraha nanga, deʼ hiädono kahiado-adonika. 9Uhali nihigumal̄a hagala o rupa o dodötoko ihëra-hëranga done ngini nianonua o ngëkomo madiai. Nanga hininga kokiani ihikuata de ma Jou Madutu aihininga maoa, gënanga doka yaoa-oa; uha mangale o inomo madatoro. Hagala o nyawa mahira ihingou-ngounu hagala o datoro gënanga koyamäkeua mafaidä.
10Tongone naga de nanga huhuba mangï o gahumu moi la hohihuba o huhuba ma Jou Madutuika. Deʼ o imam-imam yolöleleani ma Jou ai Tau magoronaka, manga haku koiwa yaol̄omo o huhuba naga o huhuba mangï mal̄okuoka. 11#Im. 16:27 O aiwani ma awunu ihi huba-huba hokä o huhuba mangale o baradoha maapongo, ma imam womomulia waö o Ngï Duru i Tebi-tebinika, mä o aiwani mahönenge mahirete gënanga yatuhuku o tau-tau maporetoka. 12Mahababu gënanga doka o Yesusö wohonenge o kota mangorana maporetoka la watebini Ai umati manga baradoha de Ai awunu mahirete. 13Karana gënanga, niaino ngone hoiki Unangika o tau-tau maporetika deʼ ngone dede Una kamamoi inähikauku. 14Hababu o duniaka koiwa naga o ngï hogogere ikakali mangale ngone; ngone halingiri o ngï hogogere aha iböböa-böa. 15Hababu gënanga, homahidomoteke o Yesus, kokiani ngone hihigogiriri ma Jou Madutu; gënanga marupa tongone nanga huhuba sukur Unangika, kiaka ngone de nanga demo-demo nanga uruiha mangale hohimulia Ai romanga. 16Uha niawöhanga nidiai o oa deʼ nimäkokiriwo, hababu nënanga doka o huhuba-huhuba ma Jou Madutu aihininga yadäe-däene.
17Niamoteke niatutuda-tutuda mangapareta, deʼ nimaponu onangika. Hababu önanga salalu ihidailako niajiwa, deʼ onanga kokiani imahitagongo yohaluhu ma Jou Madutuika. Nako ngini niahingounu onangika, önanga yakunu yomanarama de manga hininga isanangi; nako kowali, done önanga aha yomanarama de manga hininga mahuha, deʼ genanga koiwa mautumu nginika.
18Kahokogenangika nimäniata mangale ngomi. Ngomi mihigoungu de miahininga madobote idödodono, hababu hagala o hali magoronaka ngomi salalu mimau miadiai okianaga itotiai. 19Maboboloi ngohi togahoko de magiria, hupaya ngini nihïhubayanga ngohi hupaya ma Jou Madutu de madataiti wohiao ngohi toma idulu nginika.
O hubayanga mabobaha
20Ma Jou Madutu wihiwangoka o Yesus tongone nanga Jou, o hönenge mahigoronaka. Karana Ai hönenge gënanga Unanga örahananga wodadi o Gogöana womo Mulia mangale ngone, enagënanga Ai duba-duba. Ai honengö gënanga ihigoungu o jaji ikokakali dede ngone ma Jou Madutu wadödodiai. 21Tanu ma Jou Madutu o lolämatiti gënanga wödogo okianaga ikura-kuranga nginioka de hagala maoa-oa ngini nipöparalu la niadiai Ai mau. Tanu hidomoteke de o Yesus Kristus, ma Jou Madutu womanarama ngoneoka, okia wöigo-igo. Kokiani o Kristus iwihigiriri kahi ado-adonika! Amin.
O hurata mabobaha
22Ngohi togahoko hupaya ngini niatailako nihidodiai hagala ahi nasihati nënanga de niasabari, hababu ahihurata nënanga hoko kiaua magurutu. 23Kokiani ngini nihiöriki tongone nanga riadodoto o Timotius wohupuoka o buiino. Nako ünanga wainoka ahi ngï ino nënanga, ngohi aha tiao maöraha ngohi tinïädono ngini.
24Nihingahu miatabea mata-mata niatutudaika, deʼ mata-mata ma Jou Madutu aiumatika. Nia tarimali manga tabea nanga roriadodotoka o Italia mabereraka.
25Tanu ma Jou Madutu winihi barakati ngini riadodoto mata-mata.
Currently Selected:
O IBRANI 13: TLB
Highlight
Copy
Compare
Share
Want to have your highlights saved across all your devices? Sign up or sign in
