O YEHEZKIEL 36
36
Ma Jou Ai barakati o Israelika
1Ma Jou wotemo, ”Hei o nyawa nokokakaliua, natemo hagala o l̄okuika o Israel matonakoka deʼ nahuloko önanga ihi gihene ma Jou Duru woko Kurutil̄e aipareta, 2-6’Maöraha o hoana deʼ o berera ma ago-agomo ini kokiloliti ini parangi deʼ inï ora ngini, önanga yahikaukuoka o Israel yongodumu. De manga morene önanga yotemo öraha nënanga hagala o doporono ihira-hiraika gënanga idadi toönanga madutu. Hababu gënanga, hei hagala o l̄oku de hagala o doporono, o ngairi maiti-iti de o wai, hei hagala o kota idadioka magilianga deʼ yodogumal̄aikaoka mangale yogögogere ikali yaora deʼ yahohedu mangale o hoana de o berera ma ago-agomo yahigogilolitino, niihene okia ma Jou Duru woko Kurutil̄e wotemo nginika; Ahi dohata i hebu-hebulu magoronaka Ngohi tähidaaere o hoana deʼ o berera ma ago-agomo inihigogilolitino deʼ maboboloi o Edom, karana önanga deʼ masanangi de manga jako ihï hikauku, yal̄ëoka Ahi tonaka deʼ yaora o tonaka malua-luasi mamomo. Oraha nënanga Ngohi tongamo deʼ kohagiria karana o hoana de o berera ma ago-agomo gënanga duru initetemo ikali inï hikauku ngini. 7Ngohi, o Jou Duru toko Kurutil̄e tokoboto o hoana deʼ o berera ma ago-agomo inihigogilolitino gënanga aha ini hikaukuoli. 8Ma nginika Tinitemo hei hagala o Israeloka manga l̄oku, hagala nia gota mautu aha itori deʼ ihohokoli mangale Ahi umati o Israeloka de majapati yolio. 9Ngohi naga nginino tihiboa hei o Israeloka, deʼ Ngohi tohigoungu nia tonaka aha ipasololi deʼ nihibarahi o gihihi. 10Ngohi aha todogo manga gegetongo Ahi umati o Israeloka. Onanga aha yogogere hagala o kota deʼ ihigokookali hagala ikokilianga. 11Manyawa de nia gigini aha todogo, hiädono idadi duru kohängöe, i holoi iwöe de madodihiraka, deʼ enanga aha ingohaka de idanongo kohängöe. Enanga aha iwango dokengoka hokä mahira deʼ Tohidadi mata-mata kadema enanga, hokä komaiwahi ngini niamao. Done önanga ihi öriki Ngohila o Jou. 12Ahi umati o Israeloka, Taao tahigilio mangale yögogeroli manga berera. O tonaka gënanga aha idadi toönanga madutu mahirete deʼ aha salalu ihidöaka mahasili hiädono toönanga manga ngoha-ngohaka ihi honengokauaoli o habirokata.’
13Ngohi, o Jou Duru toko Kurutil̄e totemo ’Igoungu itiai o tonaka nënanga ihidöaka o romanga ihi aho-ahoko i ol̄o-ol̄omo o nyawa deʼ iora-ora o ngoha-ngohaka – o hoana deʼ o berera yogögogere. 14Mä mulaenge o öraha nënanga o tonaka nënanga aha iol̄omokaua o nyawa ekola yaora toönanga manga ngoha-ngohaka. Ngohi o Jou Duru toko Kurutil̄e totemoka. 15Iparaluokaua o tonaka nënanga iihene o hoana deʼ o berera ma ago-agomo manga hohedu ekola yatagongo o nyawa manga hikauku. O tonaka nënanga aha koiwakaoli yätoma o hoana yogögogere. Ngohi, o Jou Duru toko Kurutil̄e totemoka.’ ”
O Israel yahungi
16Ma Jou wohitemo ngohino, 17”Hei o nyawa nokokakaliua, maöraha o Israeloka manyawa yogogere toönanga manga bereraka mahirete, önanga yapesekoka deʼ manga manarama deʼ toönanga manga kalakuanga. Ngohi tapulono toönanga manga kalakuanga gënanga iharamu, hokä o ngoheka magogiria o mede imidaene. 18Tadogopoa deʼ maboloi Ahi gangamo onanguku karana önanga yodiaioka o doma kohangöe o tonakoka gënanga deʼ yapeseke deʼ toönanga manga goma-gomanga. 19Onanga Tähukumu imamoteke deʼ manga wowango madodagi de toönanga manga kalakuanga, daha önanga Tahikokabarihi hagala o berera maporetinoika. 20Kiaika dika önanga yoiki, önanga salalu yapeseke Ahi romanga itötebi-tebini. Hababu hagala o nyawa yotemo hoko nënanga, ’O hoana nënanga ganga ma Jou Madutu Ai umati, mä önanga kiani yamal̄a o tonaka ma Jou Madutu wahi döa-döaka onangika.’ 21Ngohi tohininga karana Ahi romanga itebi-tebini yapesekoka mangale o Israeloka manyawa okiaikaö önanga yoiki.
22Hababu gënanga, nohiädono okia Ngohi, o Jou Duru toko Kurutil̄e totemo o Israel manyawaika, ’Okia aha Todiai damä karana konginiua, hei o Israeloka manyawa ma karana Ahi romanga itebi-tebini, ngini nia pesekoka okiaika o ngini niöiki. 23Ngohi aha tohidumutu Ahi romanga itebi-tebini ilamo-lamoko gënanga, o romanga ngini nia pesekoka o hoana deʼ o berera ma ago-agomo mahidogoronaka, done önanga ihi öriki Ngohi o Jou. Ngohi o Jou Duru toko Kurutil̄e totemoka. Ngohi tinï pake ngini mangale nia himatoko o hoana deʼ o berera ma ago-agomika Ngohi nënanga totebini, o Jou Duru toma tengo-tengoka. 24O hoana dë o bereraino magetongo, ngini aha Tinitoomu deʼ Tinï higilio nia tonakika mahirete. 25Iböto gënanga ngini aha Tinï dohurere deʼ o akere madödodono, hupaya ngini nitebini hagala nia gomangino deʼ hagala moi-moi inipö pese-pesekoka ngini. 26#Yeh. 11:19-20 Done ngini Tinï hidöaka o hininga mahungi deʼ o pikiranga mahungi. Nia hininga imatero madogowini o helewo gënanga aha Tatagali deʼ o hininga ihingö ngou-ngounu. 27Ahi womaha aha Todogopoa nia hininga magoronauku deʼ ngini aha Tinï goana hupaya nia ngango imamoteke hagala Ahi tita ikali nihingounu hagala Ahi pareta. 28Done ngini aha nigogere o tonaka Tahidö döa-döakoka nia ete deʼ nia tohoraika. Ngini aha nidadi Ahi umati deʼ Ngohiö aha todadi nia Jou Madutu. 29Ngini aha Tinihibebasi hagala nia pesekino. Ngohi aha tohidöaka o pareta o gandumika hupaya iwango deʼ iburere hiädono ngini komaiwaoli initapal̄u o habirokata. 30Ngohi aha tohidogo iburere niagota ihöhohoko mautu deʼ mahasili hagala nia dumule, hiädono ngini nia maookauaoli o habirokata maöraha yadadidorou nia romanga o hoana deʼ o berera ma ago-agomo manga hidogoronaka. 31Ngini aha niohininga nia kalakuanga itotorouika deʼ nia manarama ipatu-patutua gënanga, daha ngini idadi nia emono deʼ nia diri mahirete karana hagala nia baradoha itotorou gënanga. 32Niohininga hei Israel, mata-mata gënanga Tadodiai koigoungua karana ngini. Ngini kiani niamao inï mal̄eke deʼ okiaua inidaene karana nia kalakuanga. Ngohi o Jou Duru toko Kurutil̄e totemoka.’ ”
33Ma Jou Duru woko Kurutil̄e wotemo, ”Ngini Tinitebini ibotino hagala nia baradohaino, ngini aha Tinihigumal̄aoli nigogere hagala nia kotaoka, deʼ nihigoko okali hagala ikokilianga. 34Mahira hagala o nyawa imadagi yatilakuru hagala nia dumule yamake hokokia mamodoongoro o tonaka gënanga, mä Ngohi aha Tinihigumal̄a ngini nia karajangoli o tonaka gënanga. 35Done o nyawa mata-mata aha idadi yoheranga, karana o tonaka hokokangano itötoongoro gënanga o öraha nënanga ingali idadi o Eden ma Dumule, deʼ hagala o kota hoko kangano kai rïdika, iwedere deʼ idadi kamagogilianga, o öraha nënanga idadi hagala o kota ikua-kuata madudumungu deʼ yowöe manyawa. 36Done hagala hoana deʼ o berera ma ago-agomo ima kokadatekuku kanagaohi, aha ihi öriki Ngohi, o Jou, tohi gokookali hagala o kota iwö wede-wederoka, deʼ Takarajangokali hagala o dumule itotoongoro. Ngohi, o Jou, totemoka deʼ maraioka aha iwadiai.”
37Ma Jou Duru woko Kurutil̄e wotemo, ”Hei o Israeloka manyawa, ngini Tinïhigumal̄aoli nigahoko o roriwo Ngohino, Ngohi aha todogo nia ngöe hokä o duba matika. 38Hagala o kota o öraha nënanga iwowede-wedere, aha iomanga manyawa yogogogere hokä o Yerusalem hagala o wange ma ago-agomoka maöraha ipaha-paha, iomanga deʼ hagala o duba ihihö huba-huba. Done ngini nihi öriki Ngohi o Jou.”
Currently Selected:
O YEHEZKIEL 36: TLB
Highlight
Copy
Compare
Share
Want to have your highlights saved across all your devices? Sign up or sign in
