O YEHEZKIEL 37
37
Hagala o kobongo mado olenge ma Wai
1Ngohitamao ma Jou Ai kuaha deʼ Ai womaha ihiao ngohi toguti o wai iomanga deʼ hagala o kobongo. 2Ma Jou wohituda ngohi takokiloliti o waioka gënanga, deʼ tamake o waioka yamode-modekika gënanga imahikokabarihika hagala o kobongo duru kohä ngöe deʼ duru itotoolenguku. 3Ma Jou wohileha ngohino, ”Hei o nyawa nokokakaliua, yakunu hagala o kobongo nënanga iwangoli?”
Ngohi tohaluhu, ”Jou Duru noko Kurutil̄e, duga-duga Ngonala nohi öriki.”
4Daha ma Jou wohihuloko ngohi tohiädono Ai behehongo hagala o kobongo madoolengika gënanga, 5”Ngohi o Jou Duru toko Kurutil̄e tohiwuwu o womaha nia diri magoronaika hupaya ngini niwangoli. 6Togelenga o nguroto deʼ o akeme nginika ikali Tinihihawo ngini de o kai. Ngini aha Tinihidöaka o womaha hiädono niwango. Done nihi öriki ngini Ngohila o Jou.”
7Daha ngohi o Yehezkiel totemo-temo hagala o kobongika gënanga imamoteke dë ma Jou Ai pareta. De magogiriaka ngohi totemo-temo gënanga, toihene o ilingi iteteke, karana hagala o kobongo gënanga imulaenge imakodohanga moi dë moi. 8Magogiriaoka ngohi tatotailako, hagala o kobongo gënanga mulaenge inguroto dë iakeme dahaö dë makai, mä hagala o röehe gënanga iwomahuahi.
9Ma Jou Madutu wohitemo ngohino, ”Hei o nyawa nokokakaliua, natemo o hidal̄okika. Nahetongo Ngohi, o Jou Duru toko Kurutil̄e topareta enangika hupaya iboa hagala kiaka honanga deyaino, mangale ihiwuwu o womaha hagala o röehe ihone-honenge gënanga hiädono önanga yowangookali.”
10 #
Him. 11:11
Done ngohi totemo imoteke deʼ ma Jou Ai pareta deʼ o hidal̄oko ihiwuwu o womaha hagala o röehe magoronaika gënanga daha önanga yowango deʼ ima okoino. Toönanga manga gegetongo duru komangangöe, iyaoaka mangale yatüku yadiai o tentara manga duduono moi ma amo-amoko.
11Ma Jou Madutu wohitemo ngohino, ”Hei o nyawa nokokakaliua, hagala o kobongo gënanga ihinonako o Israeloka manyawa. Onanga yotaiyana önanga yotoolenge, koiwa manga nganono deʼ koiwa o wange manga himangika. 12Hababu gënanga nohidodemo Ahi umatika o Israeloka gënanga Ngohi o Jou Duru toko Kurutil̄e aha Tahelenga toönanga manga lungunu. Ngohi aha tahihupu önanga genangino deʼ Tahigilio önanga o Israel matonakika. 13Ngohi tadiai ibotino mata-mata gënanga, Ahi umati aha ihi öriki Ngohila o Jou. 14Ngohi aha tahiwuwu o womaha toönanga manga diri magoronaka mangale yahiwango önanga, daha Tahigumal̄a önanga yogogere manga bereraka mahirete. Done önanga ihi öriki Ngohila o Jou. Ngohi o Jou totemoka de maraioka aha idiai.”
O Yehuda de o Israel idadi o pareta moioli
15Ma Jou wohitemooli ngohino, 16”Hei o nyawa nokokakaliua, nal̄ë moi diki-diki deʼ natulihi o demo-demo nënanga mal̄okuoka, ’O Yehuda mapareta’. Daha na l̄ë moi o diki-diki mahomoa, dena tulihi mal̄okuoka: ’O Israel ma Pareta’. 17Ipaha nasö hinoto o diki-diki hoko gënanga marupa hiädono mabare-barene imatabino deʼ idadi kamoi o diki-diki. 18Nako ani hoana yoleha mamangarati, 19nahetongo onangika, Ngohi, o Jou Duru toko Kurutil̄e aha tal̄ë o diki-diki ihi nononako o Israel deʼ tohikodogo deʼ o diki-diki ihi nononako o Yehuda. O diki-diki hinoto gënanga aha To hidadi moi de Tasöino Ahi giama magoronaka.
20Nasö o diki-diki hinoto gënanga dë nahimatoko o hoanika gënanga. 21Daha totemo onangika Ngohi, o Jou Duru toko Kurutil̄e aha ta l̄ë Ahi hoana yongodumu hagala o bereraino, kiaika önanga yoö oi-oikoka. Onanga aha Tatoomu deʼ Taaooli toönanga manga bereraika mahirete. 22Onanga aha Tahidadi moi o hoana o tonakoka gënanga, o Israel manga l̄oku mabuturungoka. Onanga aha wapareta womatengo makoano, deʼ aha ireguokauaoli idadi hinoto o hoana ekola o pareta. 23Onanga aha yapesekokauaoli manga diri deʼ yodiai o baradoha deʼ yahuba hagala o gomanga hao emo-emono. Ngohi aha tahibebasi önanga o ngekomo mata-mata yorehe-rehenino mata-mata yadiai önanga yosatiaokaua Ngohino. Ngohi aha tahi tebini önanga, önanga yodadi Ahi umati, deʼ Ngohi toönanga manga Jou Madutu. 24-25#Yeh. 34:24 Onanga aha yahidadi moi womatengo makoano ai timioka hokä makoano Daud aha wapareta mangale kahi ado-adonika. De manga setia önanga aha ihi ngounu hagala Ahi tita. De mangale kahi ado-adonika önanga ikali toönanga manga difauku aha yö gogere o tonaka gënanga, o tonaka Tihidö döa-döaka o Yakubika de yogogere toönanga manga ete deʼ manga tohora. 26Ngohi aha todiai moi o jaji dede önanga yatagongo toönanga manga halamati hiädono ikakali. Ngohi aha tahibarakati deʼ todogo toönanga manga ngöe. Toönanga manga tonakoka aha Tohigoko Ahi Tau kahirahi dokengoka mangale kahi ado-adonika. 27#2Kor. 6:16; Him. 21:3 Ngohi aha togogere dede önanga, Ngohi aha todadi toönanga manga Jou Madutu de önanga Ahi umati. 28Nako ahi Tau naga toönanga manga hidodogoronaka mangale kahi ado-adonika, done ihi öriki o hoana deʼ o berera ma ago-agomo mahomoa Ngohi, o Jou, tä irikoka o Israel yodadi Ahi umati mahirete.”
Currently Selected:
O YEHEZKIEL 37: TLB
Highlight
Copy
Compare
Share
Want to have your highlights saved across all your devices? Sign up or sign in
