O YEHEZKIEL 33
33
Ma Jou Madutu wigoraka o Yehezkiel hokä o gogoana
(Yeh. 3:16-21)
1Ma Jou wohitemoli ngohino, wato, 2”Hei o nyawa nokokakaliua, nahetongo ani hoanika nako Ngohi todotagao o parangi o berera moika, nënanga aha idadi. O berera manyawa gënanga aha imangiriki womatengo manga hidogoronaka wä goa-goana. 3Nako wogoa-goana gënanga wämake o haturu yoboa, ünanga watoilingi o bahaya manonako hupaya mata-mata o nyawa ima goa-goana. 4-5Onagona honanga yoihene o bahaya manonako gënanga ma yolegaikaua, deʼ o haturu yoboa daha iwitoma done ünanga wohonenge karana ai howono mahirete. Hohiade ünanga wolegaika o bahaya manonako gënanga, maraioka ünanga wakunu wohalamati. 6Ma nako o gogoana gënanga wämake o haturu gënanga yoboa deʼ ünanga watoilingua o bahaya manonako, daha o haturu yätoma o nyawa baradoha gënanga, toönanga manga honenge maawunu magorehau aha Todotagahoko unangino.
7Hei o nyawa nokokakaliua, ngona Tonigoraka nohiädono o hohininga nënanga onangika: 8Nako Ngohi tohingahu o nyawa womatengo aha wohonenge, mä ngona nihidöakua o hohininga ünanga hupaya ünanga wangali ai kalakuanga hiädono ünanga wohalamati, done ünanga aha wohonenge hokä o nyawa kawo baradohaohi. Mä ai honenge ma awunu magorehau aha Todotagahoko ngonaino. 9Nako ngona nohidöakoka o hohininga o nyawa madorou gënanga deʼ ünanga woluku womatogumu wodiai o dorou, ünanga aha wohonenge hokä o nyawa baradoha, mä ngona mahirete aha nohalamati.”
Moi-moi yatagongo mabobaluhu
10Ma Jou wotemo ngohino, ”Hei o nyawa nokokakaliua, nogilioli o Israel manyawaika toönanga manga demo nënanga, ’Ngomi kami popanyakeika karana imi gina tongomi mia baradoha deʼ mia dorou. Sarakia ngomi yakunu miwango?ʼ 11Nahetongo onangika mangale Ngohi o Jou Madutu towango-wango, o Jou Duru toko kurutil̄e, Ngohi tosanangiua nako o nyawa madorou yohonenge; i idulu yaino ngohi toigo ünanga wamal̄a hagala ai baradoha hupaya ünanga kahirahi wowango. Hei o Israel manyawa, nimatogumu nidiai o dorou! Yadodoa ngini nimau nihonenge?
12Aa, o nyawa nokokakaliua, nahetongo o Israel manyawaika nako o nyawa maoa wodiai o baradoha, done ai oa-oa mahira yakunua iwiriwo ünanga. Nako o nyawa madorou womatogumu wodiai o baradoha, ünanga aha iwi hukumua deʼ nako o nyawa maoa wodiai o baradoha, ünanga aha iwihihalamatua. 13Mudukua Ngohi tojajioka aha Tähihalamati o nyawa maoa, ma nako ünanga mulaenge wodiai o baradoha deʼ wonganono ünanga aha iwihihalamati karana ai oa-oa mahira gënanga, ünanga wahowono. Ngohi aha tohiningaokauaoli ai oa-oa wadö dodiaioka deʼ ünanga aha wohonenge karana hagala ai baradoha. 14-15Mudukua Ngohi tahidöakoka o hohininga o nyawa madorou ünanga aha wohonenge. Manako ünanga womatogumu wodiai o baradoha deʼ mulaenge wodiai okia maoa-oa deʼ madiai, hokä ünanga wohigilio o nyawa manga baranga ihi gade-gadeika, ekola manga baranga watohi-tohikoka ikali wohingounu hagala o tita iao-ao o ngango, done ünanga aha wohonengua. 16Ngohi aha tohiningaokauaoli hagala o baradoha wadodiaioka, dë ünanga aha wowango karana wadiai okia madiai deʼ maoa-oa.
17Ma o hoana gënanga yotemo Ahi manarama iadilua! Enahioko toönanga manga manarama iadilua. 18Tohigalioli Takuata nako o nyawa maoa mulaenge wadiai itotorou, ünanga aha wohonenge karana gënanga. 19Nako o nyawa madorou womatogumu wodiai o baradoha, deʼ mulaenge wadiai okia maoa-oa deʼ itiai, ünanga aha wowango karana gënanga. 20Ngaro hoko gënanga o Israeloka manyawa yotemo, Ahi manarama iadilua, Igoungu, Ngohi aha tajuru hakimi önanga moi-moi imamoteke manga manarama.”
O Abari mangale o Yerusalem itifa
21 #
2Kok. 25:3-10; Yer. 39:2-8, 52:4-14 O wange mamotoaoka o mede mangimoi, o taongo mangimoi deʼ hinoto magoronaka maöraha ngomi o tabuangoka, womatengo wohasili wootana o Yerusalem deʼ waino woboa deʼ wohihingahu ngohino o kota gënanga iotakoka. 22Yohutuku kowahi dewo boa, ngohi tamaoka ma Jou Ai kuaha. Ho maöraha o nyawa gënanga woboa ngohino, ngohi takunoka toade-ade deʼ tomouokauaoli.
Hagala manga baradoha o hoana gënanga
23Ma Jou wohitemo ngohino, 24”Hei o nyawa nokokakaliua, hagala o nyawa yogö gogere hagala o kota magogiliangoka o Israel matonakoka gënanga yotemo, ’O Abraham wamake o tonaka mata-mataika gënanga, enahioko ünanga duga-duga o diri womatengo. Ngone nënanga nanga gegetongo konanga ngöe, ho o tonaka nënanga idadi tongone madutu.’ ”
25Karana gënanga ma Jou Duru woko Kurutil̄e wohihuloko ngohi tohiädono Ai behehongo nënanga onangika, ”Ngini nia ol̄omo o hiode ma akeme naga kadema awunokahi; ngini nia huba o gomanga deʼ nidiai o doma. Igoungu nibarani ngini nimangaku o tonaka nënanga hokä tingini madutu. 26Ngini nia ngaku nia oworo. Nia manarama haemono. Ngini mata-mata niadiai o hudali. Kani baraniohi ngini nima ngaku o tonaka nënanga hokä tingini madutu?
27Mangale Ngohi, o Jou Madutu towango-wango o Jou Duru toko Kurutil̄e, hagala o nyawa yogögogere o kota gënanga magogiliangoka gënanga aha o doma ihihonenge. Onanga yogogere o tonaka malua-luasoka aha yäol̄omo aiwani madorou. Onanga imango ngiu-ngiunu ol̄okul̄ukuoka deʼ o aru-arukoka aha yohonenge karana o panyake o bobaku. 28O Berera gënanga aha Tohidadi o tonaka makokakahi kairïdika deʼ o kuaha önanga ihiö amo-amoko gënanga aha ipaha. Hagala ol̄oku o Israel matonakoka aha idadi duru kairïdika hiädono moiua o yobarani yanonu. 29Maöraha Ngohi tahukumu o hoana gënanga karana toönanga manga baradoha deʼ To hidadi o berera gënanga duru kairïdika, önanga ihi öriki Ngohila o Jou.”
Ma nabi ai behehongo mahasili
30Ma Jou wotemo, ”Hei o nyawa nokokakaliua, ngona nodadioka kamanga uru makaioka ani hoana manyawa maöraha önanga imakamake o kota mabebeno o mehele madatekoka ekola o tau mangora-ngorana mahimangoka. Onanga imaketemo moi deʼ moi ika, ’Ika, ngone hoihene okia ma Jou Ai behehongo o wange nënanga.’ 31Onanga yoboa yotuo-tuono deʼ hokä Ahi umati önanga yogogeruku yoihene ani demo-demo, mä okia nohipopareta önanga ihingounua. Toönanga mangauru makai ihi demo o dora mademo-demo, mä toönanga manga hininga duga-duga yapiki-pikiri o utumu. 32Ngona inipulono womatengo wonyanyanyi o mamane manyanyi mailingi manou-nouhu deʼ wosawaro wohigogule o kecapi. I goungu önanga yoihene ani demo-demo mä ihingounua. 33Mata-mata notö temo-temo gënanga aha idadi, deʼ nako maöraha gënanga iboa, önanga aha ihi öriki naga mamoi iböto o nabi womatengo toönanga manga hidogoronaka.”
Currently Selected:
O YEHEZKIEL 33: TLB
Highlight
Copy
Compare
Share
Want to have your highlights saved across all your devices? Sign up or sign in
