O YEHEZKIEL 31
31
O Mesir ihi totero hokä o Libanon maliwewuru
1O wange mahira o mede mahange o taongo mangimoi deʼ moi magoronaka maöraha ngomi o tabuangoka, ma Jou Wohitemo ngohino, 2”Hei o nyawa nokokakaliua, nohiädono Ahi behehongo nënanga o Mesir manga koanoika deʼ aihöana yongodumu:
Igoungu ani mulia kohagiria!
Koiwa yakunu idadi nimaketero!
3Ngona hokä o Libanon maliwewuru ikua-kuata
iomanga majaga irubu-rubu deʼ ihailoa.
Madengeoti irikoto deʼ itiail̄e madekara o lobioka yail̄e.
4Enanga iwango hababu ma akere yawedono.
O ngairi o tonaka matimioka ihi döaka o inomo,
yatuagi hagala mangutuku,
deʼ yapehaka hagala o gota mautu mahomoa.
5Karana ma akere komaiwa laikuranga,
iwango iburere, majaga madengeoti ipako deʼ ikurutu.
Hagala o gota mautu o honga-honganoka,
enanga duru ikurutil̄e madol̄umo.
6O totaleo irupa-rupa imä igutu mararagaoka.
O aiwani ihühuhuku ingohaka mahohongo magoronaka.
Mata-mata o hoana dë o berera ma ago-agomo o dunia yamode-modekika
yogogeruku imahohongo matimioka.
7O gota mautu gënanga ihailoa mangale hapulo-pulono;
maröehe irikoto, majaga madengeoti ikurutu.
Mangutuku iyatotara iwohama daukuku magurutuku
yadono o akere matiti o tonaka magoronaka.
8 #
Kej. 2:9
Hagala o liwewuru mautu o Edenoka, ma Jou ma Dutu ai dumule
hakunua hohitero dede enanga.
Koiwa o liwewuru yakunu imateroino,
koiwa o gota mautu hoko gënanga magurutu majaga madengeoti.
Igoungu, ma Jou ma Dutu ai dumuleoka
koiwa o gota mautu imatero mahailoa deʼ enanga.
9Ngohila tadiai enanga marupa mahailoa
deʼ hagala majaga madengeoti magurutuku de irubu.
Hagala o gota mautu ma Jou Madutu Ai dumuleoka
yamao mahininga yohiri enangika.
10Hababu gënanga, Ngohi, o Jou Duru toko Kurutil̄e, Tohingahu ngonaika okia aha idadi o gotaika matubu hiädono o lobil̄e gënanga. Hababu iholoi ikurutil̄e, iholoi enanga ima edenge. 11Done Ngohi tatila enanga deʼ aha Tohilapahi yokokuaha maporetinoika, aha ihidiai enanga imamoteke deʼ madorou. 12O tentara maporetino yanako-nakoua o apongo aha yatol̄anga enanga daha yodogumal̄aika. Ma jaga itötobi-tobikoka aha iturabaha mata-mata ol̄oku deʼ o waiuku o bereraka gënanga. Mata-mata o hoana de o berera yogögogere matimioka aha yöiki yodogumal̄a enanga. 13Hagala o totaleo aha iboa deʼ yodangiuku o gota mautu irö ruba-rubaukuoka gënanga deʼ hagala o aiwani ihühuhuku aha yapito-pitoko majaga-jaga. 14Mata-mata gënanga idadi hupaya mulaenge o öraha nënanga, aha koiwaoli o gota mautu iwango imatero magurutil̄e gënanga; koiwaoli mautu matubu yadono o lobil̄e ngaroka imämake o akere maboboloi. Mata-mata kiani ihonenge hokä o nyawa yokokakal̄iua, deʼ imatoomu deʼ hagala o nyawa yoö uti-utioka o nyawa yohone-honenge manga duniauku.”
15Hoko nënanga wotemo ma Jou Duru woko Kurutil̄e, ”Nako o gota mautu gënanga iuti o nyawa yohone-honenge manga duniauku, Ngohi tahuloko o akere o tonaka matimiuku yaolu hokä manonako o hininga mahuha. Ngohi aha tatumunu o ngairi mabauhu deʼ tajumu o ngairi maiti-iti. Karana o gota mautu gënanga ihonengoka, Ngohi aha todotagao o huhutu o Libanon hagala mal̄oku-mal̄okuoka deʼ yadiai imaai mata-mata o gota mautu o honganika. 16Maöraha o gota mautu gënanga Tohiguti o nyawa yohone-honenge manga duniauku, iruba matühu aha yahahara o hoana deʼ o berera ma ago-agomo. Mata-mata o gota mautu o Edenoka de hagala o gota mautu i iri-iriki o Libanonoka imamake o akere maboboloi, deʼ iutioka o duniauku duru matimi-timiuku aha isanangi deʼ iotaka o gota mautu gënanga. 17Onanga aha yanïki o nyawa yohone-honenge manga duniauku deʼ imatoomu dede önanga yäotakoka iholoi ihira. De mata-mata mahira yogogogere o gota mautu gënanga matimioka aha ihigerewoto hoana deʼ berera ma ago-agomo manga hidogoronaka.
18O gota mautu gënanga ihinonako o Mesir manga koano deʼ aihöana. Koiwa o gota mautu o Edenoka hoko gënanga magurutil̄e deʼ mamulia. Mä öraha nënanga, hokä hagala o gota mautu o Edenokaö, o gota mautu o gënanga aha iuti o nyawa yohone-honenge manga duniauku deʼ imatoomu dede önanga iwino nako-nakoua ma Jou Madutu dede önanga yohonenge o parangi magoronaka. Ngohi, o Jou Duru toko Kurutil̄e totemoka.”
Currently Selected:
O YEHEZKIEL 31: TLB
Highlight
Copy
Compare
Share
Want to have your highlights saved across all your devices? Sign up or sign in
