O YEHEZKIEL 27
27
O jere manyanyi mangale o Tirus
1-3Ma Jou Duru woko Kurutil̄e wohitemo ngohino, ”Hei o nyawa nokokakaliua, nohinyanyi o jere manyanyi nënanga mangale o Tirus, o hohanino makota imakubukunu deʼ hagala o gahi madatekino manyawa:
Tirus, deʼ ani edenge ngona notemo,
’Ahi hailoa igoungu itö-totomo!ʼ
4Ngonaika o ngöto ma ago-agomo hokä o tau.
Ngona ini higoko hokä o kapa mahohailoa.
5Ani bebeno o aras magota o Hermon mal̄oku
ani liaro oliwewuru ma gota o Libanonino.
6Hagala ani harimi yadiai
hagala o gota ma ago-agomo o Basanino.
Ani aoto yadiai o liwewuru magota,
ma ahali o Siprus manühino,
maporomu yobooteke o gadingi deʼ maija-ijaoka.
7Ani hidete de ani leleanga o lenanino
o Mesir, yododiai, deʼ yahihu irupa-irupa.
Igoungu kohamangaluhu hagala ani tenda mapakakaha,
o ngöere o Siprusino marupa ma ungu-ungu.
8Inihi oru-oru o Sidon de o Arwadino.
Ani kapa manyawa mahirete yosawaro o ngötoka.
9O tau yododiai yokarajaanga o kapaoka
ganga yogö gao-gao o Gebalino.
O berera yogetongo de yaino hagala o kapa iboa
Imau idadi o dodohanga imahukunu.
10Hagala o tentara o Persiaino, o Lidiaino de o Libiaino yowohama nia tentara. Onanga ihi lakete toönanga manga dadatoko deʼ manga sapeo o waja nia kota mabebeno o mehelika. Onanga ini riwoka yahohihanga hagala o haturu deʼ yodogo kainï heto-hetongo. 11Hagala o tentara o Arwadino yogoana hagala nia bebeno o meheloka; hagala nia menara yogoana hagala o nyawa Gamadino. Toönanga manga dadatoko ihi lakete ihi rei-rei nia bebenoika. Onangala yodongodumu nia karamata.
12Ngona nahukumu hagala o baranga ani bubukunu mangoë duru deʼ maboloi gënanga o Spanyoloka, deʼ hokä mabobangu ngona natarima o haaka, o behi, o hori magare-garehe de o hori ma daro-daromo. 13Ngona noma hukunu o Yunanioka, o Tubaloka, deʼ o Mesekhoka, deʼ hokä mabobangu ngona natarima onangino o gogilaongo deʼ hagala o baranga o tabagaino. 14Ngona nohitagali ani bara-baranga deʼ o kuda ihi kokereta, o kuda yobare-barene deʼ o bagal o Bet-Togarmaino. 15O Rodus manyawa nimä kubukunu dede ngona deʼ o gahi mangigorino madaera manyawa yaija hagala o baranga ani bubukunu deʼ o gadingi deʼ o mologotu. 16Imahö huku-hukunu o Siria mabereraino yaija o baranga ani bubukunu deʼ hagala ani hasili iwö wöe-wöe gënanga. Onanga yafangu o gurasi deʼ o haaka o Zamrud mahelewoino, o ngöere madoka-dokara ma ungu-ungu, o ngöere ihihihu, o lenan ma aluhu, o helewo ma ija-ijaka o koral mahelewoino deʼ o helewo madoka-dokara o delima. 17O Yehuda deʼ o Israel ihitagali nia baranga nia huku-hukunu deʼ o gandum, deʼ o ohungu magula, o zaitun maminya deʼ o rampa-rampa. 18-19O Damaskus manyawa ima ija nia baranga nia huku-hukunu deʼ hagala nia hasili deʼ ihi fangu deʼ o angguru o Helbonino, o duba magogo o Saharino, o behi itü tutuku deʼ o rampa-rampa. 20O Dedan manyawa yafangu nia bara-baranga deʼ o kuda maporetuku magogogere mangöere. 21O Arab manyawa deʼ o Kedar matonaka yakokuaha yaija nia bara-baranga deʼ o duba mangohaka, o duba manauru de o kabingi. 22Mangale yaija nia bara-baranga imahö huku-hukunu o Syebaino de o Raema yoao hagala o gurasi de o haaka, o gurasi de o rampa-rampa duru maoa-oa. 23Hagala o kota o Haran, o Kane, o Eden, ima huku-hukunu o Syebaino, o Asyur makota de o Kilmad, mata-mata ima hukunu deʼ deʼ ngona. 24Onanga ini bukunu nginika o pakeanga mahohailoa, o ngöere madoka-dokara ma ungu-ungu, o ngöere ihihihu, hagala o tikara mahowono irupa-rupa, deʼ hagala rupa o dewili ikö kua-kuata. 25#Him. 18:11-19 Nia baranga nia huku-hukunu yaao deʼ imakinïki o kapa ima huku-hukunu ma ago-agomo.
Ngona hokä o kapa magina itotubuho,
o kapa ya toa-toaka o ngöto ma ago-agomo.
26Inihiö oru-oru iniao o ngöto yanönonuika.
Ngona ini parono o wange mahiwara mahidal̄oko irama-rama.
27Hagala nia gina nia baranga nia huku-hukunu,
mata-mata yongö ngoti-ngotiri ikali nia kapa manyawa,
mata-mata o tau yododiai de nia nyawa ima huku-hukunu,
o tentara magetongo o kapaka gënanga,
önanga mata-mata yohonenge yalutu
maöraha ngona nowöro.
28Yongö ngoti-ngotiri yopöaka karana yohawana
manga böaka ihaluhu o ngöto madate-datekoka.
29O öraha nënanga o kapa gënanga yamal̄a,
mata-mata nia nyawa yongoti-ngotiri yodöa o dudungiha.
30Onanga yogari nia wowango
yotaiyana deʼ yododora deʼ manga hininga ihuha.
Onanga yoderero o kuhuhunu manga häekoka
deʼ imalulu o kafo magoronaka manonako yoduka.
31Mangale ngona önanga yatoongoro manga häeke,
yapake o pakeanga o karongo iomanga o hininga maduka.
Onanga yoari manga hininga i huha
deʼ yödodora nia ngango.
32Daha önanga yonyanyi
moi o jere manyanyi,
’Tirus, o nagona inihitero?
Tirus, o ngötoka ngona nomamouoka.
33Maöraha o ngöto ma amo-amokika nodöaka
deʼ magina madol̄a ioma-omanga,
nohitotomo o hoana deʼ o berera ma ago-agomo manga paralu;
o kokoano nahidadi yokaya.
34O öraha nënanga ngona inilutuoka,
nowedere o ngöto mabukuku.
Ani nyawa yongodumu deʼ mata-mata ani gina
ihihanga imakinïki deʼ deʼ ngona o ngöto mahi dogoronaka.’
35Mata-mata o nyawa yogogogere o gahi madatekino yohahara yoihene okia idadi ngonaika. Toönanga manga kokoano duru komanga hawana; yoborohono yamake toönanga manga bio-bionoka. 36Ngona nohihanga mangale kahi ado-adonika. Imahö huku-hukunu o dunia ya mode-modekika idadi yo hahara karana yo hawana aha yadaene okia idadadi hokä hoko gënanga.”
Currently Selected:
O YEHEZKIEL 27: TLB
Highlight
Copy
Compare
Share
Want to have your highlights saved across all your devices? Sign up or sign in
