O YEHEZKIEL 17
17
O hitotero mangale o angguru mautu deʼ hagala o totaleo o rajawali
1Ma Jou wohitemo ngohino, 2”Hei o nyawa nokokakaliua, nohi ade-ade o hitotero hagala o Israel manyawaika, 3Ngohi o Jou Duru toko Kurutil̄e tomau tohiadono onangika: Naga o totaleo o rajawali mapako-pako o dutu moi magogo mahailoa deʼ magahuhu mangoata ikali makuata. Enanga ihoho o Libanon mal̄okuika, yatobiki o liwewuru magota madekara o utu moi, 4daha yao de yakelengauku o kota imahuku-hukunu irö rame-rameoka. 5Ipaha yal̄ë o utu moi idato-datomo kamagö ohi o Israel matonakino, deʼ yadatomo o dumule iboburereoka, komaiwahi ikuranga o akere. 6O dadatomo gënanga idadi o angguru mautu iwango itipokouku mä itahe iamokika. Majaga-jaga yameta o rajawalika gënanga, deʼ mangutu-ngutuku imahibeloho ikuata o tonaka magoronauku. O angguru mautu gënanga duru koharubu.
7O öraha utu gënanga naga o totaleo o rajawali mapako-pako mahomoa; magahuhu mango-ngoata deʼ magogo mabiri-birini. Daha o angguru mautu gënanga mangutu-ngutuku deʼ majaga-jaga mameta o rajawalika itöturu-turuino gënanga deʼ manganono hupaya o toaleo gënanga imau ihidöaka enangika iholoi ilamoko o akere ngaro deʼ naga o dumuleoka gënanga. 8Enahioko o angguru mautu gënanga idatomoka o tonaka iboburereoka deʼ ma akere de maboboloi, hiädono enanga yakunu ihoka irubu, ihohoko iwoë, deʼ idadi o angguru mautu maoa-oa.
9Done, Ngohi, o Jou Duru toko Kurutil̄e toleha: Yakunu o angguru mautu gënanga iwango deʼ ihero? O totaleo o rajawali madodihirakaua aha yarahuku enanga deʼ mangutu-ngutuku, ihirade mahohoko, yatoboki majaga-jaga deʼ yamal̄aika enanga imaai? Iparaluua o kuata ilamoko ekola o hoana deʼ o berera yopoputurungu mangale yarahuku o gota gënanga hiädono mngutu-ngutuku. 10Igoungu enanga idatomoka ikuata, mä yakunu enanga iwango igila-gila ikali ihero? Enanga aha itol̄angua o ngï enanga idato-datomoka?”
O hitararono ohitoteroino gënanga
11Ma Jou wohitemo ngohino, 12#2Kok. 24:15-20; 2Taw. 36:10-13 ”Naleha ima lawa-lawanika gënanga, boteka önanga imangarati ohitotero mamangarati gënanga. Nohiadono onangika makoano Babel woboaka o Yerusalemika, deʼ wäao makoano Yehuda ikali yolago-agomo o kotaka gënanga o Babelika. 13Daha ünanga wäiriki womatengoani makoano Yehuda ai tau manyawa gënanga, wodiai o jaji dede ünanga, deʼ wihuloko ünanga wokoboto isosetia ünangika. Makoano Babel gënanga watumunguku hagala o nyawa yolago-agomo, 14hupaya o Yehuda mapareta gënanga aha imomikokauaoli deʼ mangale yatagongo o jaji gënanga igou-goungu yaganapu. 15Mä o Yehuda manga koano womalawani ikali wohidingoto o huhuloko o Mesirika mangale womämake o kuda deʼ o tentara kamanga ngoë. Boteka ünanga aha wohasili? Boteka ünanga aha iwimal̄aika wootana? Koidadiua ünanga wohipongono ai jaji koiwi gelengua o hukumanga!
16Mangale Ngohi, ma Jou Madutu towango-wango, o Jou Duru toko Kurutil̄e, o Yehuda manga koano aha wohonenge o Babeloka, karana ünanga wohipongonoka ai koboto deʼ watilakuru ai jaji deʼ makoano Babel wihigogeroka ünanga o kuruhi mal̄okuoka. 17Ngaroka o Mesir manga tentara manyawa ikokokiria gënanga, yakunua iwiriwo ünanga o Babel manyawa manga parangioka yodiai o tonaka itotoporono deʼ yafaiti hagala o baraka mangale yätoma o nyawa mangoë. 18Karana ünanga watilakuroka ai koboto deʼ ai jaji, ünanga aha wakunua wohiotana ai diri.
19Mangale Ngohi, o Jou Madutu towango-wango, o Jou Duru toko Kurutil̄e, o Yehuda manga koano aha Tihukumu karana watilakuru ai jaji deʼ o Babel manga koano, enahioko ünanga wokobotoka mangale de Ahi romanga mangale waganapu. 20Ngohi aha tihiparono o jä mangale Titagoko. Unanga aha Tiao o Babelika deʼ Tihukumu dokengoka, karana ünanga wosetiaua Ngohino. 21Aitentara duru maoa-oa aha yohonenge o parangi magoronaka, enahioko yohasi-hasili imahiditoko aha hohahi bari-barihi hagala okiaika honanga. Done Ahi umati ihi öriki Ngohi, o Jou totö temo-temoka.”
Ma Jou Madutu wojaji o ngonganono
22Nenanga wotö temo-temoka ma Duru woko Kuritil̄e,
”Liwewuru magota magogurutil̄e aha tapagele madubo
daha Tatobiki moi majaga magogil̄au,
Tadatomo majaga gënanga o l̄okuoka ituboil̄e o lobil̄e.
23O l̄okuoka duru magogurutil̄e o Israeloka,
enanga Tohibeloho.
Dokengoka enanga aha itori, deʼ ihi hasili o hohoko,
daha idadi o liwewuru mautu imomulia.
Hagala irupa o totaleo aha imaigutu magoronaka
imataduhu mahohongo matimioka.
24Mata-mata o gota mautu o bereraka aha
imangarati Ngohi ma Jou.
O gota magogurutil̄e Tatol̄anga
o gota madodipokouku Tadiai iwango itubuil̄e.
o gota mautu magou-gouohi tadiai itoolenge itotororata;
deʼ o gota mautu madoolenge Tohidoäka itori deʼ ihoheika.
Ngohi, ma Jou, totemoka, hagala ahi demo aha idadi.”
Currently Selected:
O YEHEZKIEL 17: TLB
Highlight
Copy
Compare
Share
Want to have your highlights saved across all your devices? Sign up or sign in
