O YEHEZKIEL 16
16
O Yerusalem isosetiaua
1Ma Jou wohitemoli ngohino, 2”Hei o nyawa nokokakaliua, nahimatoko o Yerusalemika hagala omanarama itotorou yadödodiaioka.” 3Ma Jou Duru woko Kurutil̄e wohi huloko ngohi tohiadono o behehongo nënanga o Yerusalemika, ”Hei Yerusalem, ngona nomakil̄au o Kanan matonakoka. Ani ama o Amori manyawa deʼ ngoni ayo o Het manyawa. 4Maöraha ngona nomakil̄au, moiua yatobiki ani wotiti, ekola ini ohiki ngona, ekola inihi ehe deʼ o gahi, ekola inihikorobiti deʼ o ngoere. 5Moiua yamao inï dora ngonaika hiädono yomau yodiai hagala o hali gënanga ngonaika. Maöraha ngona nomakil̄au, moiua ini dora nganaika, koaholi ngona ini umo o dumuleika.
6Ipaha Ngohi takaino deʼ tonimake ngona noma hirikiti ani awunu malepa magoronaka, mä Ngohi tonimal̄aikaua ngona nohonenge. 7-9Täl̄ë o akere daha Taihoro o awunu ani roëhoka. Taehe anikai deʼ o zaitun maminya. Tonihidadi ngona nolamoko hokä o dadotomo iboburere. Ngona nohero itaiti, notumuloa deʼ ani umuru iyaoaka, ikali nodadi momatengo o ngoheka magö. Ani huhu imulaenge itogoraka deʼ ani tadautu ikurutu, mä ngona kanihekonoka.
Maöraha Ngohi takainoli, Tonimake yadonoka maöraha mangale nomane. Tonidohoheika Ahi juba aniroëhuku imaheko-hekonoka, deʼ Tohijaji Ahiigo ngonaika. Iya, Tohiliko o kawingi majaji dede ngona, deʼ ngona nodadi ka Tongohi madutu. Ngohi, o Jou Duru toko Kurutil̄e totemoka.
10Ipaha Ngohi tonihi pake ngonaika o pakeanga ihïhihuoka, o hapato o aiwani makaino duru ma alu-aluhu, o haëke maliliko o pakeanga o lenanino deʼ o juba o hutara. 11Toniporomu deʼ o itanga deʼ o folori, o gule deʼ o gogoli-o gogoli. 12Tonihidoäka ngonaika o ngunungu ma ali-ali, o ngati-ngati deʼ o makota mahohailoa. 13Hokogenanga ngona nomahiporomu o gurasi deʼ o haaka; anipakeanga yadiai o lenan mangoërino deʼ o hutara ihihihu. Ngona yakunu nol̄omo o roti o gopuno duru maoa-oa, deʼ o ohungu magula deʼ o zaitun maminya. Ani hailoa igoungu kabiahaua deʼ ngona nodadi o koano o ngoheka. 14Hagala o hoana deʼ o berera ihigiriri ani hailoa itotomo gënanga, deʼ Ngohi tonidiaioka o moholehe maboro. Ngohi o Jou Duru toko Kuritil̄e totemoka. 15Mä ngona nadiai itorou anihailoa ikali ani romanga mabounu ihemo-hemoro. Ngona nomaidu deʼ o nauru okiaino yakokaino.
16Ani pakeanga mahononga napake mangale nohiporomu ani gomanga nahuba-huba mangï. Ngona nodadi manga diri yahuku-hukunu deʼ nohidoäka ani roëhe o nauru mahigeto-getongika. 17O poromu o gurasi deʼ o haaka Tonihidö doa-doaka ngonaika nadiai o nauru manga dulada-dulada, daha ngona nodiai peseke deʼ o dulada-dulada gënanga. 18Nohipake o dulada-duladaika gënanga o pakeanga ihihihu Tohidöa-döakoka ngonaika. Nohihuba onangika o zaitun maminya deʼ o dupa natotarima Ngohioka. 19Tonihidöaka ngonaika o inomo ogopuno duru maoa-oa, o ohungu magula deʼ zaitun maminya duru madutu. Mä mata-mata gënanga nohihuba hagala o gomangika gënanga mangale nohisanangi toönanga manga hininga. Ngohi o Jou Duru toko Kurutil̄e totemoka.
20Ipaha nohihuba tongone nanga ngoha-ngohaka, o nauru deʼ o ngoheka idadi hagala o huhuba hagala o gomangika. Koini wedonuahi ngona nososetiaokaua Ngohino? 21Kokiani nal̄ëö ahi ngoha-ngohaka deʼ nahihuba önanga hagala o gomangika? 22Ani ngango haemo-emono magoronaka hokä yahuku-hukunu manga diri gënanga, kama huhutulö ma ngona nohiningaokaua maöraha mahira kanietekohi, maöraha ngona kanihekonoka deʼ nomahirikiti aniawunu mahirete malepa magoronaka.”
O Yerusalem mawowango hokä manga roëhe yahuku-hukunu
23Ma Jou Duru woko Kurutil̄e wotemo, ”Nobodito ngona! Igoungu nobodito! Ngona nadiaioka hagala o dorou gënanga. 24Ikali, o kota maloa-loaka deʼ o ngekomo madateke yogetongo ngona nohigoko hagala o ngï mangale nahuba o gomanga deʼ yahuku-hukunu manga roëhe. 25Ngona nadadidorou anihailoa. Ani roëhe nahi leha-leha o nauru magetongo yakokaino, deʼ noma togu-togumua ngona nohudali. 26O Mesir nima kokadateke ainahihu ilamo-amoko gënanga, nidodiawoka nimahidu. Ngona nohangaja nahukunu ani roëhe mangale nadiai Ngohi tongamo.
27O öraha nënanga Ngohi todiai mangale Tonihukumu ngona deʼ Tal̄ë o barakati Tonihi döa-döakoka ngonaika. Tonihilapahi ngona o Filistin manyawaika inï doha-dohata ngonaika deʼ yato kayowunanga yamake ani kalakuanga ipese-peseke gënanga.
28Mä ngona namao kanogihounuahi dika; hababu gënanga ngona nagoginïki o Asyur manyawa. Ngona nodadi toönanga manga roëhe yahuku-hukunu, mä yamakeua dika onangino yawedono. 29Daha ngona nodadi o Babel manyawa manga roëhe yahuku-hukunu, hoana deʼ o berera ima huku-hukunu gënanga. Mä önanga yakunua inihidöaka ngonaika nogihounu.”
30O Jou Duru woko Kurutil̄e wotemo, ”Mata-mata gënanga nododiaioka hokä manga roëhe yahuku-hukunu yanakoua o mal̄eke. 31O kota maloa-loaka deʼ o ngekomo yogetongo nohigoko hagala o ngï mangale yahuba o gomanga deʼ manga roëhe yahuku-hukunu. Mä ngona hokä manga roëhe yahuku-hukunu biaha yaparalu o tiwi. 32Ngona hokä hekata mosetia okaua ami rokatika deʼ morehene deʼ o nauru mahomoa. 33Momatengo mahuku-hukunu ami roëhe salalu mamake imibangu, mä idulu yaino ngona nahidöaka o hadia nä mane-maneika, ikali nabaja önanga deʼ o tiwi hupaya yoboa okiaino honanga mangale ima idu dede ngona. 34Ngona manga roëhe yahuku-hukunu mahomoa deʼ kama homoaikali. Koiwa ini pakisa ngona nodadi ani roëhe nahuku-hukunu. Ngona ini bangua, koaholi ngona mahirete nofangu. Igoungu, ngona duru kaharamoioli.”
Ma Jou Madutu Ai hukumanga mangale o Yerusalem
35-36Hei Yerusalem, ani diri nahuku-hukunu, noihene okia wahö heto-hetongo ma Jou Duru woko Kurutil̄e, ”Nomangaikoka ani baju, deʼ hokä manga diri yahuku-hukunu nohilapahi ani roëhe nahohiningaika deʼ ani goma-gomangika haö emo-emono gënanga. 37Karana gënanga, mata-mata ani mamane mahira aha Ta toomu, yaoa naigo-igo yaoa nadoha-dohata. Onanga aha imaoko ini higilolitino ngona deʼ aha yahuputu anipakeanga ingodumu, hiädono önanga yakunu kayapulono aniroëhe ihö heko-hekonoka. 38Ngona aha Toni hukumu karana o hudali deʼ o doma nadodiaioka gënanga. Ahi dohata deʼ Ahi muruka magoronaka ngona aha Toni hukumu Toni hohonenge. 39Ngona aha Tonihilapahi hagala ani momaneika gënanga, deʼ önanga aha yaruba hagala o ngï ngona deʼ ani diri nahuku-hukunu deʼ nahuba-huba o gomanga. Hagala o pakeanga deʼ ani poromu aha önanga yaora, hiädono ngona nohekono.
40Onanga aha yähuluko o nyawa manga ngoë inikaweli ngona deʼ o helewo, deʼ yatobi-tobiki ani roëhe deʼ o oworo. 41Onanga aha yatuhuku ani tau-tau deʼ o ngongoheka yahakihi ani hukumanga. Hoko gënanga aha Tatogumu ani hudali. Ngona aha nohikodokuokaua o hadia ani mamaneika. 42Daha iböto gënanga Ahi dohata itöuru, deʼ Nghi aha idadi Torïdokali. Ngohi aha tongamo okauaoli ekola To omu.
43Ngohi tonihukumu ngona karana ngona nohiningaua sarakia Ngohi tonipaliara ngona maöraha kanoma göikahi. Ngona nadiai Ngohi tongamo deʼ hagala ani manarama itotorou gënanga. Yadodoa hagala ani kalakuanga haö emo-emono gënanga kanodogohioli deʼ o hudali? Ngohi ma Jou Duru toko Kurutil̄e totemoka.”
Hokä ngoi ayo, hoko genangö ngoi ora
44Ma Jou wotemo, ”Hei Yerusalem, hagala o nyawa aha ihipake o dolabololo nënanga ngonaika, ’Hokä ngoni ayo, hokogenangö ngoni ora.’ 45Igoungu, ngona gënanga ngoni ayo ngomi ora. Munanga midohata ami rokatika deʼ ami ngoha-ngohakika mahirete. Ngona ngadeke imatero ani roriadodoto o ngoheka yadohata manga rokata deʼ manga ngoha-ngohaka. Ngona deʼ ani roriadodoto, enagënanga hagala o kota inihi gogilolitino toenanga ma ayo o Het manyawa deʼ ma ama o Amori manyawa.
46Ani riaka gënanga o Samaria o koremieuku deʼ mata-mata makapongo. De ani dodoto gënanga o Sodom o koreharail̄e deʼ mata-mata makapongo. 47Nogihounu ngona nanïki toönanga manga aguru deʼ naturu toönanga manga manarama haö emo-emono gënanga? Kowali! Itedekanokaua ngona koaholi iholoi itorouoli ngaro deʼ önanga.
48Mangale Ngohi o Jou Duru Towango-wango, ma Jou Duru woko Kurutil̄e wato, ani riadodoto o Sodom deʼ makapo-kapongo komaiwahi imatero ani dorou ngona deʼ ani kapo-kapongo. 49O Sodom deʼ ma kapo-kapongo yoedenge karana toönanga mangoë manga inomo imagogonika ikali yakunu yowango deʼ marïdi deʼ idame. Mä önanga yahiningaikaua o nyawa mihikini deʼ o nyawa okiaua yadae-daene. 50Onanga yoedenge de manga haëke itogowini, ikali yodiai hagala o hali Todoha-dohata. Hababu gënanga önanga Tabinaha hokä namömake-makeoka.
51-52Igoungu o Samaria yatorou, mä mabaradoha koiwa mahononga hagala ani baradohaino. Ani kalakuanga iholoi ikurutika itorouoli. Ani bira-biranga matero-tero yahowonua hohitotero dede ngona. Ngona kiani namao inimal̄eke de okiaua inidaene!”
O Sodom deʼ o Samaria aha ihigokoli
53Ma Jou wotemo o Yerusalemika, ”Sodom deʼ Samaria ikali toönanga manga kapo-kapongo aha Tohidadi mata-mata kadema enangokali. Iböto gënanga, daha ngona Tonihidadi mata-mata kadema enanga dika 54De hokogenanga ngona aha nohamal̄eke ani dirika mahirete, deʼ ani biaha itotorou aha ihidumutu ani roriadodotika hokokia marahai toönanga manga wowango. 55Onanga de toönanga manga kapo-kapongo aha idadi mata-mata kadema enangoli, ngonaö deʼ ani kapo-kapongo. 56Koigoungua ngona mamoi iböto nogogiete o Sodom maöraha ngona kanoma edengohi, 57deʼ ani dorou koihi orikua? Oöraha nënanga ngona kaimatero dika dede ünanga; ngona nodadi o Edom manyawa manga gie-giete mangï, o Filistin manyawa deʼ nima kokadateke mahomoa inidohata ngonaika. 58Ngona kiani natagongo o hangihara hokä mahasili ani manarama ipese-peseke deʼ haemo-emono gënanga. Ngohi ma Jou totemoka.”
O jaji idadi mangale kahi ado-adonika
59Ma Jou Duru woko Kurutil̄e wotemo, ”Ngona aha Tonihidiai imamoteke deʼ ani manarama, hababu ngona nohi pongonoka ani koboto ikali natilakuru Ahi jaji dede ngona. 60Mä Ngohi aha tohininga o jaji Tadodiaioka dede ngona maöraha noma gö ikahi deʼ inidiai o jaji dede ngona idadi mangale kahi ado-adonika. 61Ngona aha nohininga hagala ani manarama deʼ namao ini mal̄eke maöraha ani roriadodoto Tahigilio ngonaika. Onanga aha Tahidadi hokä ani ngoha-ngohaka, ngaroka o hali gënanga iwohamua Ahi jaji dede ngona magoronaka. 62Ngohi aha todiai o jaji mahungi dede ngona. Done nohi öriki ngona Ngohi ma Jou. 63Ngohi aha tohiapongo mata-mata ani howono, mä ngona aha nakunua nawohanga deʼ ngona aha namao ini mal̄eke mangale nahetongo okia dika. Ngohi ma Jou Duru toko Kurutil̄e totemoka.”
Currently Selected:
O YEHEZKIEL 16: TLB
Highlight
Copy
Compare
Share
Want to have your highlights saved across all your devices? Sign up or sign in
