O YEHEZKIEL 13
13
Ohidodemo mangale o nabi-nabi madutua
1Ma Jou wohitemo ngohino, 2”Hei o nyawa nokokakaliua, nähidaaere o Israeloka manga nabi-nabi yahetongo o hidodemo imä gaunyingail̄e mahirete. Nahuloko önanga ihi gihene Ahi demo.”
3Ma Jou Duru wo Kokurutil̄e wotemo, ”Yobodito o nabi-nabi yobö bodo-bodo gënanga! Ohidumutu yamake manga nanerino mahirete deʼ manga gamake itotiaiua mata-mata. 4Hei Israel, ani nabi-nabi gënanga yobaragunaokaua, kaimatero hagala o serigala iwango o kota magogilianga mahi dodogoronaka. 5Onanga yogoanua hagala o ngï kiaka hagala mabebeno o mehele iruba-ruba, deʼ ihidiaiua hagala mabebeno o mehele gënanga. Ho, o Israel yakunua imatumungu nako o parangi idadi Tongohi Ahi wangeoka, o Jou toboa Tähukumu. 6Toönanga manga lolega-lolega madutua deʼ manga hidodemo-hidodemo duga-duga ielu-eluku. Onanga ihi goungu yoao o behehongo Ngohioka, enahioko Ngohi komaiwahi tahuloko önanga. Sarakia yakunu önanga yonganono önanga ihidö dododemo gënanga aha idadi? 7-8Ngohi ma Jou Tokokurutil̄e tätemo onangika, ’Nia lolega-lolega gënanga madutua deʼ nia hidodemo-hidodemo gënanga ielu-eluku. Ngini nitemo mata-mata gënanga ganga Ahi behehongo, enahioko Ngohi komaiwahi tinïtemo nginika! Hababu gënanga Ngohi aha todadi nia lawani. 9Ngohi aha tinihukumu ngini, hei nabi-nabi nihidemo ohidodemo ielu-eluku yahayali o lolega-lolega. Ngini yakunokauaoli nihidoaka o putuhu Ahi umati manga doomu ma ago-agomo magoronaka. Nia roma-romanga aha yaehe o Israeloka manga ahali mabukuoka, deʼ ngini aha nilio okaua nia tonaka madutuika. Done ngini nihi öriki Ngohi o Jou Duru Tokokurutil̄e.
10 #
Yer. 6:14, 8:11 Hei nabi-nabi madutua! Ngini niahirehenoka Ahi umati deʼ nitemo hagala moi-moi irïdi deʼ madatoro yaoa. Enahioko kamamoiuku kowali! Ahi umati ihi gokoka o bebeno o mehele deʼ o tela deʼ nihipake kayongoa, ipaha ngini niboa deʼ nia kapuru. 11Hei nabi-nabi madutua, nia bebeno o mehele aha ikilianga. Ngohi aha tohiguti o awana iriki-rikimi. O bebeno o mehele gënanga aha o rato yaparono deʼ yatapal̄u o awana o es, 12hiädono iruba deʼ moi-moi o nyawa aha yoleha okia mabaraguna o bebeno o mehele gënanga ikapurika.’ ”
13Ma Jou Duru woko Kurutil̄e wotemo, ”Ahi gangamo magoronaka Ngohi aha tohiboa o rato, o awan iriki-rikimi deʼ o awana o es mangale yawedere o bebeno o mehele gënanga. 14Ngohi tomau taruba o bebeno o mehele ngini nia kapu-kapuru gënanga, Takokilianguku hiädono igogogere mahohol̄eokahi dika. O bebeno omehele gënanga aha inï baanga deʼ inï toma ngini mata-mata. Done ngini nihi öriki Ngohi ma Jou.
15O bebeno o mehele gënanga deʼ ngini nia kapu-kapuroka aha yamao Ahi dohata kohagiria. Ipaha aha Tinitemo nginika o bebeno o mehele gënanga ihihangoka ibinaha, hokä imatero ngini nia kapuru, 16Hei nabi-nabi madutua! Ngini nihidodemo o Yerusalem irïdi deʼ madatoro yaoa-oa, enahioko kamamoiuku kowali!” Hoko gënanga wato ma Jou Duru woko Kurutil̄e.
O hidodemo mangale o ngongoheka o nabi madutua
17Ma Jou wotemo, ”O öraha nënanga, hei o nyawa nokokakaliua, naitailako nohidodiai o ngongoheka manga demo-demo imadiai o nabi ani hoana manga hidogoronaka. Nahidaaere önanga, 18deʼ nahiadono okia Ngohi, o Jou Duru Tokokurutil̄e totemo onangika:
’Nibodito ngini! Ngini nidiai mangale mata-mata o nyawa imahigogoli o kaba mahouru deʼ hagala o kokudu deʼ makaramati o nyawa yapöpake-pake yakunu yakuaha o nyawa mahomoa manga wowango. Ngini nioigo nia kuaha mangale manga wowango deʼ manga honenge Ahi umati, deʼ o kuaha gënanga ngini niapake mangale niautumu mahirete. 19Ngini nihihikaukuoka Ngohi Ahi umati manga himangoka duga-duga mangale niamake o jelai o bokoto muruono naga deʼ o roti muruono naga. Hagala o nyawa yahowo-howonua, ngini niatoma enahioko hagala o nyawa kokiani yohonenge ngini niamal̄aika yowango. Daha ngini niaeluku Ahi umati deʼ önanga iningaku nginika.’ ”
20Ma Jou Duru woko Kurutil̄e watemo o ngongohekaika imahil̄e o nabi gënanga, ”Ngohi todohata tamake niagogoli o roëhe mapareta ngini niapake mangale niakuaha manga ngango deʼ manga honenge Ahi umati. Ogogoli-gogoli gënanga aha Tö dohigoraka nimahigogo golinoka, deʼ hagala o nyawa ngini niakö kokuaha aha Tahibebasi. 21Nia kokudu-kokudu ipoputurungu aha Takakihi, deʼ Ahi umati tahirehene o jojobo itotorouino mangale kahi ado-adonika. Done ngini nihi öriki Ngohila o Jou.
22Hagala o nyawa maoa toluku tadodoaikani, ngini nidiai manga hininga niaeteke deʼ niatengeluku. Hagala o nyawa madorou ngini niadiai manga hininga ilamoko hupaya kahirahi yobaradoha deʼ yahihalamatua. 23O öraha nënanga ihibobaha ololega-ololega madutua deʼ hagala nimaihi nielu-eluku. Tahihalamati Ahi umati niajojobo itotorouino. Done nihi örikila ngini Ngohi ma Jou.”
Currently Selected:
O YEHEZKIEL 13: TLB
Highlight
Copy
Compare
Share
Want to have your highlights saved across all your devices? Sign up or sign in
