O KELUARAN 20
20
O Tita Ngimoi
(Ul. 5:1-21)
1 #
Ul. 5:1-21
Daha ma Jou Madutu wotemo-temo, deʼ nënanga doka Ai demo-demo, 2”Ngohi ma Jou nia Jou Madutu tinï ao-ao ngini tinihihupu-o Mesir mabereraka o ngï ngini imagilaongo.
3Uha niahuba o gikiri mahomoa. Ngohi dika nihi huba.
4 #
Kel. 34:17; Im. 19:4, 26:1; Ul. 4:15-18, 27:15 Uha nimadiai o dulada marupa okia dika naga o dihangoka, o duniaka ekola o akere magoronaka o dunia matimiuku. 5#Kel. 34:6-7; Bil. 14:18; Ul. 7:9-10 Uha nia huba o dulada marupa hoko gënanga, karana Ngohi ma Jou nia Jou Madutu, deʼ Ngohi toluku ihihi tero de okianagamoi. Hagala o nyawa ihï doha-dohata Ngohi, Tähukumu hiädono manga tohora deʼ manga dotumika. 6Mä Ngohi tohidumutu Ahi dora manga ngohaka de manga danongika dema ribu-ribuhu hagala o nyawa ihï igo-igo Ngohi deʼ ihi ngounu Ahi paretaika.
7 #
Im. 19:12
Uha i sabaranga nia hetongo Ahi romanga, hababu Ngohi, ma Jou nia Jou Madutu, Tähukumu o nagona dika yapake ihowono Ahi romanga.
8 #
Kel. 16:23-30, 31:12-14 Nihimulia o Sabat mawange deʼ nia horomati o wange gënanga hokä o wange itebi-tebini. 9#Kel. 23:12, 31:14-15, 34:21, 35:2; Im. 23:3 Ngini Tinihidöaka o wange butanga mangale nimä karajanga, 10mä o wange matumidi ganga o Sabat mawange i tingakoka mangale Ngohi. O wange gënanga kao nyawa moiö mayakunua yokarajanga, kayaoa ngini, kayaoa nia ngoha-ngohaka, nia gogilaongo-nia aiwani ipopaliara ekola o nyawa maporetino yogogere nia-bereraka. 11#Kej. 2:1-3; Kel. 31:17 O wange butanga magoronaka, Ngohi, ma Jou, todiai o dunia, o dihanga, o ngöto, deʼ hagala toenanga magoronaka, mä o wange matumidoka Ngohi tomahi batongo. Mahababu gënanga Ngohi, ma Jou, Tohibarakati o Sabat mawange deʼ Tomä dingakoka.
12 #
Ul. 27:16; Mat. 15:4, 19:19; Mark. 7:10, 10:19; Luk. 18:20; Ef. 6:2 Nia horomati nia ama deʼ nia ayo, hupaya ngini nihalamati deʼ nia umuru ikurutu o bereraka aha Tinihi döaka nginika.
13 #
Kej. 9:6; Im. 24:17; Mat. 5:21, 19:18; Mark. 10:19; Luk. 18:20; Rm. 13:9; Yak. 2:11 Uha ni toma.
14 #
Im. 20:11; Mat. 5:27, 19:18; Mark. 10:19; Luk. 18:20; Rm. 13:9; Yak. 2:11 Uha ni hudali.
15 #
Im. 19:11; Mat. 19:18; Mark. 10:19; Luk. 18:20; Rm. 13:9 Uha ni tohiki.
16 #
Kel. 23:1-3; Mat. 19:18; Mark. 10:19; Luk. 18:20 Uha nihi döaka o hakihi iëlu-ëluku mangale o nyawa mahomoa.
17 #
Rm. 7:7, 13:9 Uha nio nahihu o nyawa mahomoa manga kia naga; manga tau, manga hekata, manga gogilaongo, manga aiwani ipopaliara, manga keledai, ekola okia dika toönanga madutu.”
O Israel manyawa yohawana
(Ul. 5:22-33)
18 #
Ibr. 12:18-19
Maöraha hagala o nyawa yoihene o dotoreke deʼ o trompet mailingi, inoli yamake o leletongo deʼ o l̄oku kai nofo-nofo, önanga yohawana kaima hidahaharuku deʼ imaokoino imakökurutika. 19Onanga yotemo o Musaika, ”Ngona dika notemo-temo ngomino, ngomi aha mihigihene; mä uha ma Jou Madutu womi temo-temo ngomino done ngomi mihonenge.”
20O Musa wohaluhu, ”Uha nihawana. Ma Jou Madutu woboa duga-duga mangale winïtaili ngini hupaya kahirahi niwihingounu, deʼ nibaradohaua.” 21Mä hagala o nyawa geonanga kahirahi ima okoino imakökurutika, deʼ duga-duga o Musa womahitigi o lobi mahohuhutuika-mangï naga ma Jou Madutu.
O datoro mangale o huhuba mangï
22Ma Jou wïhipareta o Musa hupaya wahingahu o Israel manyawaika, ”Ngini nia makeoka sarakia Ngohi, ma Jou, o dihangoka de Tö temo-temo nginika. 23Uha nimadiai hagala o dulada o haaka ekola o gurasi mangale-niahuba deʼ niahoromati mahomoa de Ngohi. 24Niadiai mangale Ngohi o gahumu moi o huhuba mangï o tonaka, daha nihihuba genangokadau o duba deʼ niahapi o dutu moi mangale o huhuba i tuhu-tuhuku deʼ o dame mahuhuba. O ngï yogetongo Tohitotantuoka nginika hokä o ngï mangale nihuba deʼ nihihoromati Ngohino, Ngohi aha toböa deʼ Tinihibarati ngini. 25#Ul. 27:5-6; Yos. 8:31 Nako ngini nihidiai o gahumu moi o huhuba mangï o helewo, uha niadiai mahelewo yahohonotokoka, hababu nako nia belaka-mahelewo de nia pake o hohonotoko, o huhuba mangï gënanga yakunokaua ipake mangale Ngohi. 26Uha nihigoko o huhuba mangï magogurutil̄e hiädono kokiani niadöa de o ngute-ngute, hupaya uha yamake ani röehe i patu-patutua yamake.”
Currently Selected:
O KELUARAN 20: TLB
Highlight
Share
Compare
Copy
Want to have your highlights saved across all your devices? Sign up or sign in
