O ULANGAN 21
21
O perkara o doma koyaku-akunua yaputuhu
1”Nako o bereraka ma Jou nia Jou Madutu winihi döa-döaka nginika naga yamake o nyawa yohonenguku yätoma o dumuleoka deʼ yä nakoua yotoma-toma onagona, 2done nia tutuda deʼ nia hakimi kokiani yoiki yatuga mahoana o mayeti yamake-makeoka gënanga deʼ o berera-berera moika itö tigi-tigika. 3Daha o berera duru itigi-tigino manga balu-baluhu kokiani yairiki o hapi magö o dutu moi komaiwahi ihi karajanga. 4O hapi gënanga kokiani önanga yäo o ngï moi ika imahi tigi-tigika deʼ o ngairi komaiwa idudungu ma akere deʼ matonaka komaiwahi yapajeko ekola yö datomo. Genangokadau kokiani önanga yatobiki o aiwani gënanga matomara. 5O imam-imam o Lewi o kokiani yoiki genangika, karana önanga kokiani yogelenga maputuhu moi-moi o perkara o manarama itotorou magoronaka. Onanga ma Jou nia Jou Madutu wä iriki mangale ima higilaongo Unangika deʼ yahetongo o barakati deʼ to Unanga ai romanga yäo. 6Daha o berera duru itigi-tigino mata-mata mabalu-baluhu kokiani yaihoro toönanga manga giama o hapi gënanga mal̄okuoka 7deʼ yotemo, ’Kongomiua miwitoma o nyawa geunanga, deʼ ngomi mihi örikua o nagona yadiai. 8Jou nahi apongo o Israeloka Ani umati Ngona nahi bebasoka o Mesiroka. Nomihi apongo ngomi deʼ uha nomï pulono mimahi tago-ngo o nyawa wahowo-howonua gënanga iwi toma.’ 9Done deʼ nidiai okianaga ma Jou wögahoko, ngini winï pulo-nua nimahi tagongo o doma gënanga.”
O datoro mangale o ngoheka o parangi mabanakono
10”Nako ngini niparangi deʼ ma Jou nia Jou Madutu winihi döaka nginika o utumu, daha ngini nimä l̄ë o parangi ma banakono, 11yakunu idadi toönanga manga hidogoronaka naga moma tengo o ngoheka ami hohailoa nomï igo deʼ nomï nahihu nomä hekata. 12Nomi ao o ngoheka gënanga ani tauika. Genangokadau kokiani ngona naguti ami tadauru, naluiti ami kuliti, 13deʼ natururu ami pakeanga. Munanga kokiani mogogere ani tauoka deʼ mapake o haharu mapakeanga mangale ami dimono yo honenge madekana o mede moi ino. Genanga deʼ iböto ngona yakunu nokawingi dede munanga. 14Nako maduruino ngona nomï igo okaua, ngona yakunu nomi huloko moiki deʼ madudukoro okia-okiaua. Munanga yakunua nomi hidiai hokä o gilaongo ekola nomi hukumu, karana munanga nomi pakisaoka nima röehe moi dede munanga.”
O datoro mangale o ngohaka o riaka manga puhaka
15”O demo ma ade womatengo ngoi hekata yahinoto, deʼ yahinotö manga ngohaka o nauru, mä o ngohaka mariaka koigoungua ngoi hekata womi haya-hayanga ami ngohaka. 16Nako o nyawa gënanga womau wohi tantu sarakia ünanga aha waregu ai kaya aingoha-ngohakika, ünanga yakunua woböa ngoi hekata womi haya-hayanga ami ngohakino deʼ wihi döaka o ngohakika gënanga o hidoku o ngohaka o riaka ai haku. 17Unanga kokiani iwihi döaka ai arataino o hidoku hinoto aingohaka o nauru mariaka, ngarokä o ngohaka gënanga koigoungua ngoi hekata womi haya-hayanga ami ngohaka. O ngohaka ma riaka ai haku kokiani ai ama wohigoungu, deʼ o ngohakika gënanga kokiani wihi döaka o puhaka idadi ai haku imoteke o tita.”
O datoro mangale o ngohaka madorou
18”O demo ma ade naga o ngohaka o nauru ai häeke itogowini, wö igo wolawani deʼ woluku wahi moteke ai dimonika ngarokä önanga iwi hukumoka. 19Done kokiani ai dimono iwi ao ünanga o kota önanga yo gogogere mabalu-baluhika deʼ yogahoko hupaya o ngohaka gënanga yatailako ai howono. 20Onanga kokiani yä temo o kota gënanga ma balu-baluhika, ’Mia ngohaka nënanga ai häeke itogowini, wö igo wolawani deʼ woluku womihi ngounu ngomino; ünanga wohigogule o tiwi deʼ wö igo iwi daluku.’ 21Daha o nau-nauru o bereraka gënanga iwi kaweli o ngohaka gënanga deʼ o helewo hiadono wohonenge. De hoko gënanga ngini nia hohihanga o dorou. O nyawa mata-mata o Israel ma tonakoka aha yoihene mangale idadadi gënanga deʼ idadi yohawana.”
I rupa-rupa o datoro
22”Nako womatengo iwi hukumoka wohonenge karana moi o dorou, de ai maiyeti yanuneuku o liateoka, 23#Gal. 3:13 o maiyeti gënanga yakunua yamal̄aika genangokadau o hutu moi yahaiwatiki, mä kokiani yalungunu o maiyeti gënanga hupaya ngini nia pesekua o berera ma Jou nia Jou Madutu winihi döa-döakoka nginika.
Currently Selected:
O ULANGAN 21: TLB
Highlight
Copy
Compare
Share
Want to have your highlights saved across all your devices? Sign up or sign in
