O ULANGAN 19
19
O roriwo maberera
(Bil. 35:9-28; Yos. 20:1-9)
1 #
Bil. 35:6-32; Yos. 20:1-9 ”Hagala o hoana deʼ o berera manyawa gënanga ma Jou nia Jou Madutu wä binahaka deʼ iböto deʼ ngini nia l̄ëoka manga berera deʼ toönanga manga tau deʼ niö gogere genangokadau, 2-3o daera gënanga kokiani ngini nia regu o hidoku hange, moi-moi deʼ maroriwo maberera deʼ magapanga yadono hupaya moi-moi yotoma-toma yakunu ihi oara manga diri dokengika. 4Nako womatengo ani kowo hangajaua wä tomaka o nyawa ma homoa ko ai haturuua, ünanga yakunu wohi oara ai diri o berera moika gënanga deʼ yakunu wowango. 5-6O demo ma ade o nyawa yahinoto ima nïki o honganika yowohama mangale o gota yotol̄anga. Magogiria womatengo wotol̄anga, ai bahuku madoto ma otinoka deʼ huputu deʼ iwi korona ai dodiawo hiädono wohonenge. Done o nyawa wotoma-tomaka kowohangajaua gënanga kowa howonua deʼ yakunu woara iti wadaene o roriwo maberera hange gënanga hupaya wohalamati. Nako o roriwo maberera naga kamoi dika, yakunu idadi mahoana dokengika ikurutika holi, deʼ o tau madol̄a womahi tago-tagongo mangale wabalaha o doma gënanga yakunu wikinïki ünanga deʼ ai dohata magoronaka wïtoma o nyawa wahowo-howonua. 7Hababu gënanga ngohi tinihi pareta ngini mangale nia sadia o berera hange.
8Nako ma Jou nia Jou Madutu wohi woatoka nia daera hokä wä jajioka nia ete deʼ nia tohoraika, deʼ mata-mataika o berera gënanga Winihi döakoka nginika, 9kokiani ngini nia iriki o roriwo maberera hangeoli. (O berera gënanga aha winihi döaka nginika nako ngini nia diai hagala tohi popareta nginika o wange nënanga, deʼ nako ngini niwi hininga ma Jou nia Jou Madutu deʼ niwango imoteke Ai dodotoko.) 10Nia diai gënanga hupaya ngini uha nibaradoha karana nia mal̄aika o nyawa yahowo-howonua yätoma o bereraka ma Jou nia Jou Madutu winihi döa-döakoka nginika.”
11”Mä hara moioli mahali nako womatengo wï gogoana ai haturu deʼ wohangaja deʼ ai dohata wïtoma ünanga, daha wohi oara ai diri o roriwo ma kota moika mangale wamake o roriwo. 12O hali gënanga magoronaka maberera matutuda-tutuda kokiani iwi ahoko o nyawa gënanga daha iwi hilapahi ünanga o riadodoto imahi tago-tagongika mangale yabalahi o doma gënanga, hupaya ünanga yakunu iwi toma. 13Uha niwï dora unangika. Nia hibebasi o Israeloka deʼ wotoma-toma gënanga hupaya ngini nihalamati.”
Uha yaheloro o tonaka mabatingi
14 #
Ul. 27:17
”Nako ngini nima hiadonoka o bereraika ma Jou nia Jou Madutu winihi döa-döaka nginika, uha nia heloro nima koka dateke manga tonaka mabatingi ihitö tantuoka mahiraino.”
O datoro mangale o hakihi
15 #
Bil. 35:30; Ul. 17:6; Mat. 18:16; Yoh. 19:31; 2Kor. 13:1; 1Tim. 5:19; Ibr. 10:28 ”O hakihi kawoma tengo dika koi kuatua mangale ihi nyata nyata womatengo iwi kokalaki wahowono; makuranguku o hakihi yahinoto iparalu mangale o hali gënanga. 16Nako womatengo ani womau wadadi dorou o nyawa mahomoa deʼ o galaki ielu-eluku o juru hakimoka, done 17yahinotö kokiani yoiki o pupuji mangï ika ma Jou wo hi tö tantu hupaya o imam deʼ o hakimi kayo manaramohi yatailako o perkara gënanga ihidodiai, deʼ nako inyata o nyawa gënanga iwi fitanäoka ai dodiawo o Israel manyawa, 18O haki-hakimi kokiani yatailako ihi dodiai o perekara gënanga de nako i nyata o nyawa genanga o romanga madorou iwi diai ai dodiawo o Israeloka manyawa. 19Unanga kokiani watagongo mahukumanga wohidö dungu-dungutu ai lawanika gënanga. De hoko gënanga ngini nia hohihanga o dorou gënanga. 20O nyawa mata-mata aha yoihene mangale o hali gënanga deʼ yohawana, hiädono koiwaka hoko gënanga mamodorou. 21#Kel. 21:23-25; Im. 24:19-20; Mat. 5:38 Uha deʼ nia dora o perkara-perkara hoko gënanga ma goronaka. Mahukumanga marupa: O jiwa madururu o jiwa, o lako madururu o lako, o ingiri madururu o ingiri, o giama madururu o giama de ol̄ou madururu ol̄ou.”
Currently Selected:
O ULANGAN 19: TLB
Highlight
Copy
Compare
Share
Want to have your highlights saved across all your devices? Sign up or sign in
