O ULANGAN 18
18
O imam-imam manga hidoku
1”Yongodumu o Lewi ai hoana yahi döaka o imam mamanarama, karana gënanga yakunua yatarima manga hidoku o tonaka o o Israelokaka. Onanga kokiani yowango deʼ ihihö huba-hubaino deʼ o huhuba-huhuba mahomoahi ihi döa-döaka ma Jouika. 2#Bil. 18:20 Onanga yakunua deʼ manga tonaka hokä o hoana mahomoa, hababu ma Jou la, toönanga manga puhaka hokä ma Jou wahi jajioka onangika.
3Nako imatengo ani ihihuba o huhuba o hapi ekola o duba, done magiama moi maokoko deʼ mamata o gigini gënanga kokiani ihi döaka o imam-imamika mangale toönanga manga hidoku. 4O gandum mahasili madodihiraka, o angguru mateongo, o zaitun maminya deʼ o duba magogo, genangö toönanga manga hidoku. 5O Israeloka manga hoanino mata-mata, ma Jou nia Jou Madutu wä irikoka o Lewi ai hoana yodadi o imam kahi ado-adonika.
6Nako o Lewi manyawa womatengo ai ahali o kota okiaino dika o Israel mabereraka woböa o bereraika ma Jou wairi-irikoka deʼ womau wogogere genangokadau, 7ünanga yakunu wï leleani ma Jou Ai Jou Madutu hokä ma imam hokä o Lewi manyawa mahomoa yomomanarama o ngï oka gënanga. 8Kokiani ünanga watarima o inomo ima koketero ma amoko hokä o imam-imam mahomoa; okianaga wamake-make ai tau madol̄aino, hoko genangö mangale ünanga.”
O manarama-manarama wö duhu-duhunu
9”Nako ngini niwohamoka o bereraika ma Jou nia Jou Madutu winihi döa-döaka nginika, uha nimä duru o dorou yadodiai hagala o hoana deʼ o berera manyawa genangokadau. 10#Kel. 22:18; Im. 19:26 Tingini nia hidogoronaka uha naga ihihuba manga ngoha-ngohaka hokä ohuhuba yatö tuhu-tuhuku. De kaima tengö ma uha yodadi yomai-maihi, yotö tailako o nonako-nonako, yomö matara ekola 11#Im. 19:31 yogogumatere ekola yodiai o dodohanga deʼ o nyawa yohone-honenge manga womaha. 12O nyawa yododiai o manarama madorou gënanga ma Jou nia Jou Madutu wä dohata, deʼ hababu gënanga hagala o hoana deʼ o berera manyawa gënanga wahi rehene nia himangoka. 13#Mat. 5:48 Ho, kokiani ngini nimahi gilaongo ma Jou nia Jou Madutuika deʼ nia hininga magahumu.”
Ma Jou Madutu wojaji mangale wïhuloko ma nabi womatengo
14De ipaha o Musa wätemo, ”Hagala o hoana deʼ o berera manyawa o bereraka aha ngini niö gogere gënanga yanïki yo mai-maihi deʼ yotö tailako o nonako gënanga. 15#Kis. 3:22, 7:37 I idulu yaino tongone nanga hoana deʼ nanga bereraino mahirete Unanga aha wï huloko nginika o nabi womatengo hokä ngohi nënanga, deʼ kokiani ngini niwihi ngounu unangika.
16Mawange ngini nima toomu o Sinai mal̄okuoka, ngini ni gahoko hupaya ngini uhali ni ihene ma Jou nia Jou Madutu wo temo-temo deʼ uhali ngini nia make Ai himanga o uku itoka-tokara magoronaka, hababu ngini niö modongo nihonenge. 17Karana gënanga ma Jou wohi temo ngohino, ’Toönanga manga gogahoko gënanga ibarija. 18Toönanga manga hoanino mahirete Ngohi aha tihuloko onangika o nabi womatengo hokä ngona. Ngohi aha tahetongo unangika okianaga kokiani wahetongo, daha ünanga aha wohiädono o hoana deʼ o berera manyawaika gënanga hagala Tahi popareta. 19#Kis. 3:23 Unanga aha wotemo-temo Ahi romanga wäo, deʼ Ngohi aha Tä hukumu o nagona dika yolu-oluku iwihi gïhene unangika. 20Mä nako o nabi womatengo wobarani wohiadono o behehongo moi ani deʼ Ahi romanga wäo ena hioko Ngohi tohulokua wodiaihoko gënanga, ünanga kokiani wohonenge; Hoko genangö moi-moi o nabi yotemo-temo o gikiri mahomoa ma romanga yao kokiani yohonenge.’
21Yakunu idadi ngini nia hiningaka nileha, ’Sarakia ngomi mihiöriki botekä o nabi womatengo ai behehongo matiti ma Jou ekola kowali?ʼ 22Nako o nabi womatengo wotemo-temo ma Jou Ai romanga wäo, mä okianaga waheto-hetongo gënanga koidadiua, done o hingahu gënanga koma Jou inoua. O nabi gënanga wotemo-temo ai romanga mahirete wäo deʼ ngini ngarouha niwï modongo unangika.”
Currently Selected:
O ULANGAN 18: TLB
Highlight
Copy
Compare
Share
Want to have your highlights saved across all your devices? Sign up or sign in
