O YOHANIS MADODIHIRAKA 3
3
Ma Jou Madutu ai ngoha-ngohaka
1 #
Yoh. 1:12
Niolega hokokia ma Jou Madutu wonahininga ngone, hiädono wonahi goungu ngone hokä Ai ngoha-ngohaka. Deʼ igoungu ngone ganga ma Jou Madutu ai ngoha-ngohaka. Hababu gënanga o dunia itotorou nënanga inanakoua ngone, hababu o dunia iwi nakoua ma Jou Madutu. 2Roriadodoto tini hohininga! Ngone öraha nënanga ganga ma Jou Madutu ai ngoha-ngohaka, mä nanga rupa ngone damä itararonuahi. Mä ngone hohi öriki nako o Kristus woböa, ngone aha hodadi hokä Unanga, hababu ngone aha himäke Unanga Ai rupa magoronaka de madiai. 3Mata-mata o nyawa de manga nganono nënanga o Kristusika, yogöana manga diri laʼ igou-goungu yotebini, yo tebini o baradohaino hokä o Kristusö wotebini.
4O nyawa yodiai o baradoha, yatilakuru ma Jou Madutu ai tita; hababu o baradoha ganga yatotilakuru ma Jou ai tita. 5#Yoh. 1:29 Ngini nihiöriki o Kristus woböa mangale waehe o nyawa ma baradoha, deʼ koiwa naga o baradoha Ai diri magoronaka. 6Mata-mata o nyawa yowango yorimoi de o Kristus, kahoko genangikaua yodiai o baradoha. O nyawa kahoko genangika yodiai o baradoha, komaiwahi iwi mäke o Kristus ekola iwi nako.
7Ahi ngoha-ngohaka, uha nia higumal̄aika o nagonaö dika inihi rehene ngini. O nyawa yadodiai ma Jou Madutu ai mau ganga ma Jou Madutu ai ngoha-ngohaka hokä sarakia o Kristus ganga ma Jou Madutu ai Ngohaka. 8Mä o nyawa kahoko genangika yodiai o baradoha ganga o Ibilihi mangoha-ngohaka, hababu kaöraha mahirahi o Ibilihi ibaradoha. Mangale nënanga ma Jou Madutu ai Ngohaka woböa, enagënanga mangale wawedere o Ibilihi mamanarama.
9O nyawa yodadioka ma Jou Madutu ai Ngohaka, kahoko genangikaua yodiai o baradoha, hababu ma Jou Madutu mahirete Ai biaha naga onangoka. Deʼ karana ma Jou Madutu gënanga ai Ama, Unanga wakunua hoko genangika wodiai o baradoha. 10Mahi dogoronaka nenangala ima howono ma Jou Madutu ai ngoha-ngohaka de o Ibilihi mangoha-ngohaka: o nagona honanga yadiai ua ma Jou Madutu ai mau, ekola yahiningaua manga riadodoto, ünanga ma Jou Madutu ai ngohakua.
Mateke hininga moi de moika
11 #
Yoh. 13:34
Oraha kama dodihirakahi inihi adonoka o abari nënanga nginika: Ngone kiani homateke hininga moi de moika. 12#Kej. 4:8 Uha ngone hokä o Kain, wodadi o Ibilihi mangohaka deʼ witoma ai dodoto mahirete. Mahababu okia o Kain witoma ai dodoto? Hababu o hali-o hali wadodiai ganga ihowono, mä o hali-o hali wadodiai ai dodoto ganga itiai.
13Hababu gënanga, ahi Roriadodoto, uha nihëranga nako o dunia manyawa nënanga inï dohata ngini. 14#Yoh. 5:24 Ngone hohiöriki ngone hohupuoka o honengino, deʼ homatagalioka o ngangoika. Ngone hohiöriki gënanga, hababu ngone hahininga nanga riadodoto. O nyawa manga dora koiwa, mamangarati kayakuahahi o honenge. 15O nyawa yadohata manga riadodoto ganga yotoma-toma, deʼ ngini nihiöriki o nyawa imatëngo yotoma-toma koiwa to önanga manga ngango madutu deʼ ikakali. 16De mangëkomo nenangala ngone hohiöriki madodagi hahininga nanga dodiawo o nyawa: O Kristus womahilapahioka Ai ngango mangale ngone. Hababu gënanga, ngoneö kiani hohilapahi nanga ngango mangale tongone nanga roriadodoto! 17Nako o nyawa womatëngo ai kiahonanga de maenangoka, wamäke ai riadodoto manga kia-kiaua, mä woluku wariwo ai riadodoto gënanga, sarakia o nyawa gënanga yakunu wotemo ünanga wihininga ma Jou Madutu? 18Ahi ngoha-ngohaka! Uha ngone homateke hininga duga-duga kananga uruoka ekola duga-duga kananga demo dika. Kiani ngone homateke hininga de o dora madutu, hohimatoko de tongone nanga manarama.
Nanga barani ma Jou Madutu ai himangoka
19Hoko gënanga madodagi ngone hohiöriki iwohama ma Jou Madutu ai ngoha-ngohaka madiai, deʼ tongone nanga hininga yakunu irïdi ma Jou Madutu ai himangoka. 20Ngone hohiöriki, nako nanga hininga inahihowono ngone, ma Jou Madutu iholoi ilamoko wohiöriki de tongone nanga hininga mahiöriki, deʼ Unanga wohiöriki hagala mata-mata. 21Hoʼ, ahi Roriadodoto tinihohininga, nako nanga hininga inahi howonua ngone, ngone hakunu hihimanga ma Jou Madutu de nanga baranioka. 22Deʼ okia ngone hogahoko Unangino, ngone hamäke, karana ngone hohingounu Ai pareta-paretaika deʼ hadiai okia Ai hininga yadäene. 23#Yoh. 13:34, 15:12, 17 Unanga wonahipareta ngoneino enagënanga: Ngone kiani hingaku ai Ngohakika enagënanga o Yesus Kristus, deʼ ngone kiani homateke hininga, hokä o Kristus wonahiparetaka ngoneino. 24O nyawa mata-mata ihi ngou-ngounu ma Jou Madutu ai pareta-paretaika, yowango kamoi de ma Jou Madutu deʼ ma Jou Madutu kamoi de önanga. Deʼ ngone hohiöriki ma Jou Madutu wowango kamoi de ngone, karana Unanga wonahidöakoka ai Womaha ngoneino.
Currently Selected:
O YOHANIS MADODIHIRAKA 3: TLB
Highlight
Copy
Compare
Share
Want to have your highlights saved across all your devices? Sign up or sign in
