ROMA 3
3
1Boko kere e, apawe untunge makoa taumata Yahudi? Dang apawe gunange tumuhu atorang u sunati? 2Tantu mang maul᷊i gunange! Kahimotongange, watu'u su taumata Yahudi Mawu Ruata seng nanarakang u apang niul᷊i-E 3Kateho kirapa boko pia tau Yahudi ko ta masati? Apa ual᷊ingu e'e Mawu Ruata makoa ta masatia? 4#Mzm. 51:4Tantu ta! Watu'u seng mal᷊ahe Mawu Ruata sintinia mang matul᷊iri, maneng apang taumata mukoa l᷊eo, su l᷊al᷊ung u Buki Susi mawawohe,
“Kenangte i kau tatapi ikatitonang ko tingari su apang ko niul᷊iu u,
dang i kau sarung makauntung su tempo i kau i ponisi.”
5Kateho boko kal᷊aadilu Mawu Ruata mang mal᷊ahe, watu'u i kite mukoa ko ta mutatahino, apawe i puridato ngi kite? Apa Mawu Ruata takoae adile boko I Sie muhukung si kite? (Kakina i'i mang nahino kere su taumata). 6Mang ta mariadi! Watu'u boko Mawu Ruata takoae adile, kirapawe I Sie muhukung u dunia i'i?
7Kateho boko ual᷊ingu kakanoa ko ta nakahino, bou e'e apang ko nuhino bou hal᷊i u Mawu Ruata mang ku kal᷊ahe e hakiu I Sie i dalo, nakurawe taumata ko mukoa dal᷊ai e'e borong ipunsal᷊a kere taumata bardosa? 8Dang nakurawe i kite ta makapangul᷊i, mapiang i kite mukoa dal᷊ai tadeau pia kapapia? Mang tingari pia manga taumata ko nuhinakang si sia dang nagul᷊i u are ia seng nuhabari kere'e. Apang taumata kere e hinonge i hukung u Mawu Ruata.
Takoae sarang singkatau ko mukoa kao u Mawu Ruata
9Ho, apawe kakangianeng kite kere tau Yahudi napal᷊iu mapia bou tampa u bangsa ko wal᷊inge? Mang ta mariadi!#3:9 kakangianeng i kite … napal᷊iu mapia bou … bangsa ko wal᷊inge? Mang ta mariadi!: arako kakangianeng i kite … lebe dal᷊ai bou … bangsa ko wal᷊inge? Ta sintinia keree. Ia seng mbuae nagul᷊i himoneu maeng tau Yahudi ore l᷊ai taumata ko wal᷊inge, kaul᷊ie seng nikawasa ngu dosa. 10#Mzm. 14:1-3, 53:1-3Musul᷊ung ko kere mawawohe su l᷊al᷊ung u Buki Susi,
“Takoae singkatau ko hino,
11takoae singkatau makahingang,
dang takoae singkatau ko manumba Mawu Ruata.
12Kaul᷊iu taumata ko seng nutingkarau watangeng e bou Mawu Ruata;
kaul᷊ie seng napal᷊iri.
Takoae singkatau mukoa ko muhino; sarang singkatau takoae!
13 #
Mzm. 5:10, 140:4 Tinggol᷊ang i sire musul᷊ung u kubul᷊i wuka-wuka.
Haghing l᷊eo mal᷊ua bou lila ngi sire;
dang wiwihi sire napeneu sasameri kere bisa ngu katoang.
14 #
Mzm. 10:7
Mohong i sire napeneu l᷊aane dingang u sungkul᷊i.
15 #
Yes. 59:7-8
L᷊al᷊empang i sire masahawu; boko mundariha l᷊au mamate taumata.
16Kararusa dingang kasasusa, nikaesi sire suapang tampa.
17I sire ta makawua l᷊al᷊eng u purarame,
18 #
Mzm. 36:2
dang ta mangadati Mawu Ruata.”
19Mbuhue i kite matitong himoneu kaul᷊ie ko kawawohe su l᷊al᷊ung u atorang u agama Yahudi, guna ngu apang taumata ko muwiahi su l᷊al᷊ung u parenta ngu atorang e'e. Dingang u kere'e takoae sarang singkatau mukoa l᷊ai manga alasang dang kal᷊abo u dunia panuntukang u Mawu Ruata. 20#Mzm. 143:2; Gal. 2:16Watu'u takoae ko sarang singkatau mapia dingang u Mawu Ruata, watu'u taumata e'e mukoa manga hal᷊i ko ene su l᷊al᷊ung u atorang u agama. Su l᷊ikuru e'e atorang e'e kitang u mul᷊ahe su taumata himoneu taumata ko bardosa.
Kirapa Mawu Ruata mupakapia ngu taumata dingang-E
21Arawe i'i Mawu Ruata seng nanibo l᷊al᷊eng kirapa taumata mupakapia dingang-E; dang l᷊al᷊enge e'e takoae wuhie dingang u atorang u agama Yahudi. Manga buki i Musa dingang u buki u manga nabi l᷊ai mul᷊ahe u hal᷊i e'e, 22#Gal. 2:16himoneu Mawu Ruata mang mupakariadi ngu taumata mupakapia ringang-E, kitang boko taumata mangimang si Yesus Kristus. Mawu Ruata mukoa i'i guna ngu kaul᷊iu taumata ko mangimang si Kristus, watu'u takoae putatintangenge. 23Kaul᷊iu taumata seng nanawo su dosa dang marau bou Mawu Ruata ko sarung mupakasal᷊amati si sire. 24Kitang watu'u kakindaghi u Mawu Ruata samatang ko mangkate nionggo kere'e, kute pukauhang u taumata dingang u Mawu Ruata sau nakoa ko mapia, l᷊al᷊enge ko taumata nil᷊iwiri I Kristus Yesus. 25Mawu Ruata nanarakang I Kristus Yesus tadeau bou papateng-E e'e taumata nil᷊iu bou pusansal᷊a boko i sire mangimang si Sie. Mawu Ruata mukoa kere'e tadeau mutingkawawuangu kal᷊aadil-E. Watu'u su tempo nal᷊iu Mawu Ruata seng nusabari su hal᷊iu dosa ngu taumata, hakiu I Sie ta nuhukung i sire. 26Arawe i'i I Sie nuhukung u dosa tadeau mupakal᷊ahe kal᷊aadil-E. Dingang u kere'e I Sie mul᷊aheu u watangeng-E ko nuhino; dang apang taumata ko mangimang si Yesus, ipakal᷊ah-E. Kere taumata ko seng sau napia dingang u Mawu Ruata.
27Watu'u e'e seng takoae l᷊ai alasang si kite makapanege. Apa sabapie? Apa ual᷊ingi kite mukoa ko mawawohe sural᷊ung atorang u agama Yahudi? Wal᷊inge. Watu'u i kite mangimang. 28Watu'u panginsuenge ko kiri i. Taumata ko nipakal᷊ahe seng sau mapia dingang u Mawu Ruata, wal᷊inge ual᷊ingu Sie nukoa apang ko kawawohe su l᷊al᷊ung u atorang u agama Yahudi, kateho watu'u i sie mangimang si Yesus Kristus.
29Arako Mawu Ruata e'e kitangu Mawu ngu tau Yahudi si sane? Wal᷊ingewe I Sie mang l᷊ai Mawu Ruata ngu bangsa ko wal᷊inge? Ore, I Sie mang l᷊ai Mawu Ruatan gu bangsa ko wal᷊inge! 30#Ul. 6:4; Gal. 3:20Watu'u Mawu Ruata mang kitang simbau. I Sie nupakariadingu manga tau Yahudi sau mupakapia dingang u Mawu Ruata watu'u i sire mangimang. Dang I Sie l᷊ai mupakariadingu taumata bangsa ko wal᷊inge. Sau mupakapia dingang u Mawu Ruata, e'e l᷊ai watu'u i sire mangimang. 31Apa i'i watu'u i kite mangimang si Kristus, mangal᷊enge i kite mundume u atorang u Agama Yahudi? Mang ta mariadi! Kateho dingang u pangangimang kite e'e, i kite muharigangu atorang e'e.
2014 Indonesian Bible Society (Lembaga Alkitab Indonesia)