ROMA 2
2
Hukumang u Mawu Ruata
1 #
Mat. 7:1; Luk. 6:37 Ual᷊ingu e'e, manga ana u simbau, ko i sai i Kau hakiu i Kau mo mupunsal᷊a ngu taumata ko wal᷊inge? i Kau takoa e manga apa ko hino ngu makal᷊iu watangeng u! watu'u boko i Kau mupunsal᷊a ngu taumata ko wal᷊inge, sumbal᷊i i Kau sisane ngu mukoa hal᷊i ko musul᷊ung i sire, kute i Kau nunawo hukumang l᷊ai su watangeng sisanengu. 2I kite matitong himoneu boko Mawu Ruata muhukung su manga taumata ko mukoa hal᷊i ko kere e, putusang u Mawu Ruata e'e nuhino. 3Arawe i kumu manga ana u simbau, i kumu mang mukoa l᷊ai manga apa ko iantang i kumu su taumata ko wal᷊inge! Dang su naung i kumu, i kumu botonge makal᷊iso bou hukumang u Mawu Ruata? 4Arako i kumu mupakasana u kapia ngu Mawu Ruata dingang kal᷊abao u naung dang kasasabar-E ko kere kal᷊abo e? Nal᷊ahe i kumu matitong himoneu Mawu Ruata manode kapia ngu naung-E watu u I Sie mo tadeau i kumu mo mutobati bou kaul᷊iu dosa ngi kumu. 5Kateho timbo i kumu makitihi dang tawe mo muwal᷊u watu u e'e i kumu sisane nukoa hukumang si kumu kasuenge mabuha su L᷊ou Kiamati, boko Mawu Ruata mupakal᷊ahe u wawal᷊uang-E dingang u mupakanawo u hukumang ko adili. 6#Mzm. 62:13; Ams. 24:12Watu'u Mawu Ruata sarung mamal᷊isi apang taumata sintuhu dingang u kakanoae. 7Mawu Ruata mangonggo u puwawiahi kahingang dang kakal si sire ko tatapi mukoa ko mapia guna ngu mundea ko mawantughi, ko mahariga, dang takoae suenge. 8Arawe manga taumata ko mangapia watangenge sisane dang mandiri tumuhu su Mawu Ruata, watu'u tumuhu ko ral᷊ai, i sire e'e sarung i hukung u Mawu Ruata. 9Apang taumata ko mo mukoa ko dal᷊ai sarung masinsara dang masusa, kahimotongange tau Yahudi, dingang u l᷊ai manga bangsa ko wal᷊inge. 10Arawe kaul᷊iu taumata ko mo mukoa ko mapia sarung onggol᷊ang u kawawantughi dingang u adati dang puwawiahi ko masuku bou Mawu Ruata, Kahimotongange su tau Yahudi, kere l᷊ai su manga taumata bangsa ko wal᷊inge. 11#Ul. 10:17Watu'u Mawu Ruata mukoa kaul᷊iu taumata musul᷊ung.
12Manga taumata bangsa ko wal᷊inge nurbadosa ul᷊ingu wugha atorang u agama ngu Yahudi. Inau i sire i hukung su l᷊ikuru atorang e'e. Arawe tau Yahudi mubardosa seng tuwei matitong u atorang e'e; watu e'e i sire l᷊ai sarung tuntukang tumuhu atorang e'e. 13Watu'u taumata ko sau mutingkapia dingang u Mawu Ruata, wal᷊inge ual᷊ingu taumata e'e seng matitong u atorang u agama Yahudi, Kateho ual᷊ingu i sie mukoa apang ko kawawohe su l᷊al᷊ung u atorang e'e. 14Manga taumata bangsa ko wal᷊inge wugha atorang u agama Yahudi, kateho boko i sire mukoa apang ko niparenta ngu atorang e'e tumuhu kao i sire, naung i sire sisane ko muhukung si sire, maneng i sire wugha atorang u agama Yahudi. 15Kakanoai i sire nul᷊ahe himoneu apang ko niparenta ngu atorang e'e nawohe su naung i sire. Naung i sire l᷊ai mupakal᷊ahe hal᷊i e'e, watu u i sire e'e tahaghisa ipunsal᷊a dang tahaghisa ipuhino ngu sipirang i sire. 16Kere'e sarung mariadi su l᷊ou ko seng ni tantu e'e. Su l᷊ou e'e – Kere su Habari Mapia ko seng daku nihabari – Mawu Ruata bou I Yesus Kristus sarung muhukung kaul᷊iu l᷊al᷊ung u naung dingang sipirang u kaul᷊iu taumata.
Taumata ngu Yahudi dingang u atorang u Agama Yahudi
17Arawe orasi i'i kirapa si kumu manga ana u simbau i kumu mangaku watangeng i kumu tau Yahudi. I kumu muhinggo atorang u agama Yahudi dang i kumu manege u pukauhang i kumu dingang Mawu Ruata. 18I kumu seng nakahombang manga tatibo bou atorang e'e, hakiu i kumu matitong u kao u Mawu Ruata dang matitong manantu ko sude mapia. 19I kumu mangaking u ko i kumu pangaha u tau ko wuta dingang munggile u kasasua si sire ko su l᷊al᷊ung u karararundung. 20I kumu manintiro manga taumata ko lulungi sire makamea dang nakoa meteri sire apang ko wodo. I kumu mangakingu himoneu su l᷊al᷊ung u atorang u agama Yahudi, i kumu pia kapande su tintiro ko nuhino. 21I kumu manintiro taumata ko wal᷊inge, arawe i kumu ta manintiro watangeng u sisane? I kumu manintiro taumata tadeau kumbahang manako, kateho i kumu l᷊ai mang manako. 22I kumu manintiro taumata kumbahang mawuang, kateho i kumu l᷊ai mawuang! i Kumu mubinsi berhala kateho i kumu l᷊ai mangal᷊a manga rarotong bou wal᷊e ngu berhala. 23I kumu manege u i kumu pia atorang i Musa, kateho i kumu muhinakang Mawu Ruata dang ta tumuhu atorang-E. 24#Yes. 52:5Su l᷊al᷊ung u Buki Susi pia mawawohe kiri e, “Watu'u i kumu tau Yahudi, kute areng u Mawu Ruata i pakaral᷊ai i kumu su tal᷊oara u manga bangsa ko wal᷊inge.”
25Boko i kumu tatumuhu su atorang u agama ngu Yahudi, kute sunati kumu pia l᷊ai gunange. Arawe boko i kumu ta tumuhu apang hal᷊i ko niparenta su l᷊al᷊ung u atorang e'e, kute sunati kumu e'e tingari takoa mangal᷊enge. 26Boko singkatau ko wal᷊inge tau Yahudi ko ta nisunati, tumuhu agama ngu Yahudi, wal᷊ingewe Mawu Ruata seng nundekeng u taumata e'e kere seng ni sunati? 27Dang manga taumata ko ta nisunati e'e sarung mupunsal᷊ang i kumu tau Yahudi, watu'u i kumu agama Yahudi dang i kumu mbuae nisunati, kateho i kumu l᷊umawang atorang e'e. I sire ta nisunati, kateho seng i sire ko tumuhu atorang u agama Yahudi e'e. 28Watu'u tau Yahudi tutunge wal᷊inge taumata kitang arenge tau Yahudi, dang taumata ko tinga-tingari mbuae nisunati wal᷊inge kitang nisunati su l᷊ikure. 29#Ul. 30:6Sul᷊ikuru e'e, singkatau Yahudi kahingang i sie ko taumata pia naung u tau Yahudi, dang sunati tutunge e'e ko sunati su l᷊al᷊ung u naung ko nihal᷊ikang u Roh u Mawu Ruata, wal᷊ingewe niwohe su l᷊al᷊ung u buki. Taumata kere e manarima dalo bou Mawu Ruata wal᷊inge bou taumata.
2014 Indonesian Bible Society (Lembaga Alkitab Indonesia)