Rm 8

A vutomi mayelana ni Moya wa Xikwembu Nkulukumba

1Kambe swoswi akehena kuyavanyisiwa ku lava vanga ku Yesu Kriste. 2Hiswoswo a nawu wa Moya wa vutomi, ku Yesu Kriste, wu kuntrhunxi ku nawu wa xidoho ni wa lifu. 3Hikusa leswi afaka swinga koteki ku nawu, hi leswi afaka wu hikola ka nyama, Xikwembu Nkulukumba a yentxile leswi hi ku rumela N'wana wakwe hiku fana ni nyama ya xidoho, xiswoswo, Xikwembu Nkulukumba a yavanyisile Xidoho a nyameni. 4Akuva a kululama ka nawu kuhetiseka ku hine hinga fambikiki hi nyama, kambe hi fambaka hi Moya.

5Hikusa lava vatinyiketaka ka nyama vayanakanya mintxhumu ya nyama, kambe lava vatinyiketaka ka Moya, vayanakanya swa Moya. 6Hikusa akuyanakanya ka swanyama kuyisa kufeni, kambe leswi swinga swa Moya swiyisa vuton'wini ni le kuruleni. 7Hikolahu, akuyanakanya ka nyama ku nyenyana ni Xikwembu Nkulukumba, hikusa akuyingiseti a nawu wa Xikwembu Nkulukumba, mfuri akukoti kuyentxa. 8Lava vahanyaka nyameni avana kuswikota kunyoxisa Xikwembu Nkulukumba.

9Ke, n'wine swoswi an'wihanyi nyameni, kambe n'wihanya Moyeni, loko hakunene n'wini Moya wa Xikwembu Nkulukumba. Loko mhunu ange na Moya wa Kriste, ahi wa Kriste. 10Loko Moya wa Kriste wuli ku n'wine, swoswi a miri mifeli xidohweni, kambe a Moya wuvanyika vutomi hinkonta ya kululama. 11Hakunene loko n'wili ni Moya wa lweyi angapfuxa Yesu aku feni, yelweyi kunene a pfuxiki Kriste Yesu aku feni atahanyisa miri yenu leyi mi faka, hinkonta ya Moya wakwe lowu trhamaka ku n'wine. 12Xileswo vamakweru, ahina nandru kunyama, wakuva hi hanya hi nyama. 13Loko n'wine n'wihanya hi kunavela ka nyama, n'wikongoma kufeni; kambe loko hi Moya n'widlaya mintiho ya vudohi, xileswo n'wine n'witahanya. 14Hinkwavu lava fambisiwaka hi Moya wa Xikwembu Nkulukumba, i vana va Xikwembu Nkulukumba. 15Hikusa an'wiyamukelanga Moya wa vukarawa, akuva n'wihanya na n'witxhava, kambe n'wiyamukeli a Moya wakuhlayiwa leswaku n'wi vana, lowu ha wone hi bandlukanaka: Abba, swidjulaka kuhlaya leswaku Tatana. 16Hi wo Moya lowo wu dondrisaka a moya weru leswaku hine hi vana va Xikwembu Nkulukumba. 17#Lavisa Gl 4:1-7. Ke, loko hili vana, na kone mfuri hi vadi va pfindla. Hi vadi vapfindla dra Xikwembu Nkulukumba kun'we na Kriste. Loko hi xaniseka kun'we na yene, na kone hitatwalisiwa kun'we na Yene.

Kuxaniseka ka nkama lowu ni kuphatima loku kutaka

18Hikusa ni pimisa leswaku a mahlomulo yeru ya swoswi amana kufanisiwa ni kuphatima loko kutakapfuleteliwa ku hine. 19A misava hinkwayu n'wirindrela hi kunavela lokukulu ampfuletelo wa Xikwembu Nkulukumba ku vana vakwe. 20Hikusa a misava mile hansi ka kuhluleka, kunge hi kurandra ka yone, kambe hinkonta ya lweyi amivumbiki, 21hikulavisela kaleswi swaku yone misava, siku drin'wana mita ntrhunxiwa vukaraweni ni le kuhahluliweni, akuva mitrhunxeliwa kuphatimeni ka vana va Xikwembu Nkulukumba. 22Haswitiva swinene leswaku kukondra kuva swoswi misava hinkwayu yakonya, yixaniseka swanga kuvavisa ka kulun'wa. 23Ahi ntsena misava, kambe na hine lava hinga ni masungulo ya Moya, na hine haxaniseka ndreni kweru na hirindrela nkama wa kuyentxiwa vana, akuntrhunxeka ka miri yeru. 24Hikusa akulaviseleni hi huluxiwile; hakunene, aku lavisela loko kuvoniwa a hi kulavisela, hikusa leswi swivoniwaka hinga swilaviselisa kuyini? 25Kambe loko hine hilavisela leswi hingasiki na swivona, hiswilavisela hi kutiyisela. 26Hiswoleswo na wone Moya wa hipfunisa a gomeni dreru, hikusa ahitivi kukhongota hilaha swifaneliki, kambe a Moya hi ntshima wu hi kombelela hi minkonyo leyi mingeke na kutlhamuxeliwa. 27Yene Lweyi avonaka ndreni ka timbilu, ativa leswi a Moya wuswinavelaka, hikusa hi kurandra ka Xikwembu Nkulukumba, hileswaku wukhongotela tinsasi.

28Haswitiva hine leswaku hinkwaswu switlhanganela akuva switirisa ku lava varandraka Xikwembu Nkulukumba, vanga lava avavitaniki hi kungu drakwe. 29Hikusa lava Xikwembu Nkulukumba afaka nana avahlawulile vabekiseli akuva vafana ni N'wana wa wakwe, akuva Yene ava n'wana wakusungula ku vamakwavu lavanyingi. 30Lava ava hlawuliki, lavo na vone ava vitanile, ni lava avavitaniki na vone avahlayile valulami, ni lava avahlayiki valulami avatwalisile.

Lirandru dra Xikwembu Nkulukumba dra hlamalisa

31Hitahlaya yini hi leswi? Loko Xikwembu Nkulukumba ayimile na hine, i mani lweyi a taka lwa na hine? 32Yene lweyi angatretrelelangakiki a N'wana wakwe, kambe ahinyiketi yene hinkweru, xana angaka angahihanani hinkwaswu kun'we ni N'wana wakwe? 33Hi mani lweyi angarambelaka lava Xikwembu Nkulukumba a vahlawuliki xana? I Xikwembu Nkulukumba avahlayiki valulami. 34Hi mani lweyi atakavayavanyisa? I Kriste Yesu lweyi a fiki, kumbe xana, lweyi apfukiki kufeni, na kone anga vokweni dra xinene dra Xikwembu Nkulukumba mfuri a hi kombelelaka. 35Hi mani lweyi ataka hitravukanisa ni lirandru dra Kriste? Nhlomulo, kunonon'hweliwa, kuxanisiwa, ndlala, vusweti, timhangu, a lifu? 36#Lavisa Mps 44:22. Swanga hi leswi kutraliwiki:

Hinyiketiwi ku dlayiweni hinkonta yaku masiku hinkwawu.

Vahiyentxisa swanga tihamba leti yisiwaka kutlhabyiweni.

37Kambe ku hinkwaswu leswi hine hi hundrisa ngopfu kuhlula, hi lweyi ahirandriki. 38Hikusa nakholwisisa leswaku, nambi ka kuva kufa, nambi bya kuva vutomi; nambi swakuva swirun'wa kumbe min'wana minfumu kumbe mintamu ya moya; nambi swakuva swa swoswi, nambi swakuva leswi switaka; 39nambi swakuva swa mintamu leyi mitlakukiki, nambi swakuva leswi swiyetiki. Akuna ntxhumu nambi ni mhunu lweyi a nga kotaka kuhi travukanyisa ni lirandru dra Xikwembu Nkulukumba, ahinyikiki ku dri tiva hi Hosi yeru Yesu Kriste.

Currently Selected:

Rm 8: NTX2007

Highlight

Copy