Chacaría 11
11
1Pa Líbanux, ¡yawãxna i curü ĩã̱x nax ngẽma üxüema ínaguxü̃ca̱x i curü ocayiwagü!
2¡Naxaxu, Pa Pinux, erü marü niwa̱x i ngẽma ocayiwagü, rü ngẽma naigü i mexẽchixü̃ rü marü nixae! ¡Aita pexüe, Pa Naigü i Taxü̃gü i Bacháü̃anewa Ngẽxmagüxü̃, erü ngẽma naixnecü rü niye!
3Rü ngẽma carnérugüarü dauruü̃gü rü tagaãcü naxauxe erü yimá maxẽ ya imexẽchicü rü marü nixae. Rü nüxü̃ naxĩnüe i ngẽma leóü̃ nax yanginetanücüüxü̃, erü ngẽma naixnecügü i natü i Yudáü̃cutüwa ngẽxmagüxü̃ rü marü nixae.
Taxre i carnérugüarü dauruü̃gü
4Ñaa nixĩ i ngẽma Cori ya chorü Tupana chomaxã nüxü̃ ixuxü̃. Rü ñanagürü: —¡Nüxna nadau i ngẽma carnérugü i norü daichicawa gagüchaü̃xü̃!
5Rü ngẽma duü̃xü̃gü i naxca̱x taxegüxü̃ rü tama nüxü̃́ taxãũxãchitümüü̃ãcü tüxü̃ nadai. Rü ngẽma carnérugümaxã taxegüxü̃ rü ñanagürügü: “¡Moxẽ ya Cori erü marü chadiẽruã̱x!” ñanagürügü. Rü woo i ngẽma carnérugüarü dauruü̃gü rü tama nüxü̃́ taxãũãchitümüxü̃ ya yíxema norü carnérugü.
6Rü ngẽxgumarüxü̃ ta i ngẽma duü̃xü̃gü i ñaa nachixü̃anewa maxẽxü̃ rü taxũtáma choxü̃́ nangechaü̃tümüxü̃gü. Rü to i nachixü̃aneme̱xẽgu rü ngẽmaarü ãẽ̱xgacüme̱xẽgu tá chanayixẽxẽ. Rü ngẽma ãẽ̱xgacü rü tá nanachixexẽxẽ i ñaa nachixü̃ane. Rü ngẽxguma i choma rü taxúexü̃táma naxme̱xwa íchapoxü̃. Rü choma i Cori ya Tupana nixĩ i nüxü̃ chixuxü̃ i ngẽma —ñanagürü.
7Rü ngẽxguma i choma i Chacaría rü nüxna chadau i ngẽma carnérugü i norü daixchicawa nagagüchaü̃xü̃. Rü yexera nüxna chadau i ngẽma carnérugü i rüturamaegüxü̃. Rü taxre i naixmenaxãca̱x chadau. Rü wüxi rü Ngü̃xẽẽgu chanaxüéga, rü ngẽma to rü Wüxiwa Íngexmagüxü̃gu chanaxüéga. Rü ñu̱xũchi nüxna chadau i ngẽma carnérugü.
8Rü wüxi ga tauemacügutama rü íchanawoxü̃ ga tomaepü̱x ga norü dauruü̃gü, yerü tama yáxna namaxã chaxĩnü, rü chauxchi naxaie.
9Rü yema carnérugüxü̃ ñacharügü: —¡Tagutáma wena pexna chadau! ¡Ega ngẽxguma ngexü̃rüüxü̃ yuxgu rü noxtacüma nayu̱x! ¡Rü ngẽxguma texé yama̱xgu, rü noxtacüma yamáa! ¡Rü ngẽma maxẽxü̃ íyaxügüxü̃ rü noxtacüma nügü nangõ̱xcu —ñachagürü.
10Rü yexguma rü chanayaxu ga chorü naixmena̱xã ya Ngü̃xẽẽgu ãégane. Rü chayabüye. Rü yema rü wüxi ga cua̱xruxü̃ nixĩ nax iyanaxoxü̃ ga yema Tupanaarü uneta ga guxü̃ma ga nachixü̃anegümaxã naxüxü̃.
11Rü yema ngunexü̃gu inarüxo ga yema uneta. Rü yema carnérugümaxã taxegüxü̃ rü choxü̃ inangugügü. Rü yexguma nüxü̃ nicua̱xãchitanü nax Cori ya Tupana yixĩxü̃ ga nawa idexacü ga yema chaxüxü̃.
12Rü ngẽxguma rü ñacharügü: —Ngẽxguma pexca̱x namexgu, ¡rü chorü puracüca̱x choxü̃́ penaxütanü! Natürü ega tama perü me yixĩxgu, ¡rü ngexrüma choxü̃́ penaxütanüxü̃! —ñacharügü. Rü choxü̃́ nanaxütanügü ga 30 tachinü ga diẽru.
13Rü nüma ga Cori ya Tupana rü choxü̃ ñanagürü: —¡Ngĩxü̃ nayaxu i ngẽma diẽru i naxca̱x mecü nax choxü̃́ ngĩmaxã naxütanügücü, rü ngẽma üwechixü̃ i chopata ya taxü̃newa ngẽxmaxü̃pe̱xegu ngĩxü̃ yawotanü! —ñanagürü. Rü yexguma ga choma rü ngĩxü̃ chayaxu ga yema diẽru rü Tupanapatawa yexmaxü̃ ga üwechixü̃pe̱xegu ngĩxü̃ chayawotanü.
14Rü yemawena chayabüye ga guma nai ga chorü naixmena̱xã ga Wüxiwa Ingexmagüxü̃gu ãégane. Rü yema rü wüxi ga cua̱xruxü̃ nixĩ nax iyanaxoxü̃ ga yema nügü nax nangechaxü̃güxü̃ ga Yudátanüxü̃ namaxã ga yema togü ga Iraétanüxü̃.
15Rü Cori rü choxü̃ ñanagürü: —¡Ñu̱xma rü yema carnérugüarü dauruxü̃ ga tama mea norü carnérugüna dauxü̃ãcü cugü ixĩxẽxẽ.
16Erü choma rü tá ñaa nachixü̃anegu chanamu i wüxi i dauruxü̃ i tama norü carnéru i inaxüanemarexü̃gu rüxĩnüxü̃. Rü taxũtáma naxca̱x nadau i ngẽma rütaxuxü̃. Rü taxũtáma nanaxüxü̃ i ngẽma napíxü̃. Rü taxũtáma nanaxüwemü i ngẽma turaexü̃. Natürü tá nayama̱x i ngẽma rüngümaexü̃ rü meatama tüxü̃ nangõ̱x. Rü taxuxü̃táma tümamachi ínayaxüxẽxẽ woo tümapatügü.
17¡Rü nügümaxã nangechaü̃ i ngẽma carnéruarü dauruxü̃ i tama mea norü carnérugüna dauxü̃ rü tüxü̃ ngéma wogümarexü̃! Rü norü poxcu tá nixĩ nax tara i taxrewa ãmaguxü̃maxã nacachacüüxü̃ rü nacaxetüxü̃ i norü tügünexetüwa! Rü tá ninachacüxü rü norü tügünexetüwa rü tá nangexetü. ¡Rü ngẽmaãcü ya nachacüxü rü tá nipamare rü tá nangexetü i norü tügünexetüwa! —ñanagürü.
Currently Selected:
Chacaría 11: tcaP
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
