Chacaría 12
12
Tupana rü tá nüxna nadau ya Yerucharéü̃
1Ñaa nixĩ i Cori ya Tupanaarü ore nachiga i Iraétanüxü̃. Rü nüma ya Cori ya Tupana nixĩ i nango̱xẽẽãxü̃ i daxũguxü̃ i naane rü naxüaxü̃ i ngẽma ñoma i naane nagu üxü̃ rü yatüna maxü̃ naxãxü̃, rü ñanagürü:
2—Choma rü tá chanaporaxẽxẽ ya Yerucharéü̃. Rü yima ĩane rü ñoma wüxi i axepáxü̃ i bínumaxã ããcuxü̃rüxü̃ tá nixĩ naxca̱x i guxü̃ma i ngẽma nachixü̃anegü i nüxna ngaicamagüxü̃. Erü ngẽma ngunexü̃ i nagu naxca̱x íyaxüãchixü̃ rü ñoma nangãxẽxü̃rüxü̃ tá naturae. Rü ngẽxguma Yerucharéü̃ca̱x íyaxüãchigu rü tá ta naxca̱x ínayaxüãchi ya yima náigü ya ĩanegü ya Yudáanewa ngẽxmagüne.
3Rü ngẽma ngunexü̃gu rü Yerucharéü̃ rü wüxi ya nuta ya yaxüchicüxü̃ tá chayanguxuchixẽxẽ na̱xcha̱xwa i ngẽma togü i nachixü̃anegü. Rü tü̱xchiama tá tayapi̱x ya texé ya nangenagüchaü̃xe. Rü guxü̃ma i ngẽma nachixü̃anegü rü tá nügü nanutaque̱xegü nax Yerucharéü̃maxã nügü nada̱i̱xü̃ca̱x.
4Natürü ngẽma ngunexü̃gu rü choma rü tá chayabuxmüxẽxẽ i norü uanügüarü cowarugü rü tá chanaxãũãẽxẽxẽ i ngẽma churaragü i nagu ĩxü̃. Rü Yudátanüxü̃ rü tá nüxna chadau. Rü guxü̃ma i ngẽma togü i nachixü̃anegüarü cowarugü rü tá chayangexetüxẽxẽ.
5Rü ngẽxguma ngẽmaxü̃ nadaugügu i Yudáanearü ãẽ̱xgacügü rü nügümaxã tá ñanagürügü: “Cori ya Guxãxétüwa Ngẽxmacü nixĩ i Yerucharéü̃cüã̱xgüarü Tupana, rü nüma nixĩ i pora nüxna naxãxü̃”, ñanagürügü.
6Rü ngẽma ngunexü̃gu rü Yudátanüxü̃arü ãẽ̱xgacügü rü ñoma wüxi i üxü i ya̱u̱xraxü̃rüxü̃ tá nixĩgü. Rü ñoma üxü i triguchapa̱xawa iyaa̱u̱xraxü̃rüxü̃ tá nixĩgü. Rü tá nanadai i guxü̃ma i ngẽma nachixü̃anegü i norü tügünecüwawa nüxna ngaixcamagüxü̃ rü ngẽma to̱xwecüwawa ngaixcamagüxü̃. Natürü ngẽma Yerucharéü̃cüã̱xgü rü wena tá norü ĩaneca̱x nawoegu rü nawa tá namaxẽ.
7Natürü choma nax Cori chixĩxü̃ rü tá nüxíra íchanapoxü̃ ya yima náigü ya ĩanegü ya Yudáanewa ngẽxmagüne rü yimágüwena ya Yerucharéü̃ nax ngẽmaãcü i ngẽma Dabítanüxü̃ rü Yerucharéü̃cüã̱xgü rü tama nagu naxĩnüexü̃ca̱x nax ngẽma togü i Yudátanüxü̃arü yexera yaxĩgüxü̃.
8Rü choma i Cori nax chixĩxü̃ rü tá nüxna chadau i guxü̃ma i ngẽma duü̃xü̃gü i Yerucharéü̃wa maxẽxü̃. Rü ngẽma duü̃xü̃gü i turaexü̃ rü tá nipora ñoma ãẽ̱xgacü ga Dabírüxü̃. Rü ngẽma Dabítanüxü̃ rü tá ñoma Tupanarüxü̃ naporae rü ñoma Cori ya Tupanaarü orearü ngeruxü̃ i ngẽma duü̃xü̃güpe̱xegu ixũxü̃rüxü̃ tá naporae.
9Rü ngẽma ngunexü̃gügu rü tá chanadai i ngexü̃rüüxü̃mare i nachixü̃anecüã̱xgü i Yerucharéü̃ca̱x íyaxüãchixü̃.
10Rü ngẽma Dabítaagütanüwa rü Yerucharéü̃cüã̱xgütanüwa tá chanamu i Chauãxẽ i Üünexü̃ nax yamecümaxü̃ca̱x rü nayumüxẽgüwa̱xegüxü̃ca̱x i ngẽma Dabítanüxü̃ rü ngẽma Yerucharéü̃cüã̱xgü. Rü ngẽxguma tá nüxü̃ nadaugügu ya yima nacanapacütüxü̃güãcü rü tá nangechaü̃gü. Rü naxca̱x tá naxauxe ñoma wüxi i nane i nügümaxã wüxicacüca̱x naxauxexü̃rüxü̃. Rü ñoma nüxíraü̃cü ya nane yu̱xguca̱x naxauxegurüxü̃ tá naxca̱x naxauxe.
11Rü ngẽma ngunexü̃gu rü ĩane ya Yerucharéü̃wa rü tá taxü̃ i ngechaü̃ ínangu yexguma Yudáanearü ãẽ̱xgacü ga Adáx-rimóü̃ ga Meguíduarü doxonexü̃gu yu̱xgurüxü̃.
12Rü wüxichigü ya ĩpatawa rü tá poraãcü nangechaxü̃gü. Rü Dabítaagü rü naxma̱xgümaxã wüxigu tá nangechaü̃gü. Rü ngẽxgumarüxü̃ tá ta i Natáü̃taagü rü naxma̱xgümaxã wüxigu tá nangechaxü̃gü.
13Rü ngẽma Lebítaagü rü naxma̱xgümaxã wüxigu tá nangechaü̃gü. Rü ngẽxgumarüxü̃ ta i Chimítaagü rü naxma̱xgümaxã wüxigu tá nangechaxü̃gü.
14Rü ngẽxgumarüxü̃ ta i guxü̃ma i ngẽma duü̃xü̃gü i íyaxügüxü̃ rü wüxichigü ya ĩpatawa ngẽxmagüxü̃ rü naxma̱xgümaxã wüxigu tá nangechaxü̃gü —ñanagürü.
Currently Selected:
Chacaría 12: tcaP
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
