Iraétanüxü̃arü muxchiga 21
21
Iraétanüxü̃ rü ĩane ga Ormácüã̱xgü tüxü̃ nadaigü
1Rü Canaáü̃cüã̱xgüarü ãẽ̱xgacü rü ĩane ga Ará ga Négueanewa yexmanegu naxãpata. Rü yexguma nüxü̃ naxĩnüchigagu nax Iraétanüxü̃ rü nama ga Ataríü̃wa ne naxĩxü̃, rü nape̱xegu nayangu. Rü ñuxre ga Iraétanüxü̃xü̃ ínayauxü̃ rü nayagagü.
2Rü yexguma ga Iraétanüxü̃ rü Cori ya Tupanamaxã inaxunetagü rü ñanagürügü: —Ngẽxguma tá toxü̃ curüngü̃xẽẽgu nax nüxü̃ tarüporamaegüxü̃ i ñaa nachixü̃anecüã̱xgü i duü̃xü̃gü, rü toma rü tá nagu tipogügü ya guxü̃nema ya norü ĩanegü —ñanagürügü.
3Rü Cori ya Tupana rü Iraétanüxü̃xü̃ nangãxü̃ ga yema naxca̱x ínacagüxü̃, rü nüxü̃ narüngü̃xẽxẽ nax Canaáü̃anecüã̱xgüxü̃ naporamaegüxü̃ca̱x. Rü nanadai ga guxü̃ma ga Canaáü̃anecüã̱xgü ga duü̃xü̃gü, rü yexgumarüxü̃ ta nagu nipogügü ga guxü̃nema ga norü ĩanegü. Rü yemaca̱x rü yema nachica rü Ormágu nanaxüéga.
Ãxtapechicüna̱xã ga bróũchenaxca̱x
4Rü nüma ga Iraétanüxü̃ rü ínachoxü̃ nawa ga guma ma̱xpǘne ga Ór, rü Már ga Dauchíüxü̃waama naxĩ. Rü yexma ínayachoegu nax tama Edóü̃anewaama nachopetüxü̃ca̱x. Rü yexguma namagu naxĩyane ga duü̃xü̃gü rü marü tama yáxna naxĩnüe ga nax yapaexü̃ rü nataiyaexü̃.
5Rü yemaca̱x inanaxügüe ga Moichéchiga rü Tupanachiga nax yadexagüxü̃. Rü ñanagürügü: —¿Tü̱xcüü̃ ga pema ga Equítuanewa ga toxü̃ ípegaxü̃xü̃? ¿Ẽ̱xna nua toxü̃ pegagü nax ñaa nachica i chianexü̃ i taxúema íxãpataxü̃gu toxü̃ peyuexẽẽxü̃ca̱x? Ñu̱xma rü toxü̃́ nataxu i dexá rü õna. Rü ñaa õna i chixemarexü̃ i tangṍxü̃ rü marü düxwa nüxü̃ tarüchaue —ñanagürügü.
6Rü yemaca̱x ga nüma ga Cori ya Tupana rü naxca̱x yéma nanamugü ga ãxtapegü nax duü̃xü̃güxü̃ nangõ̱xgüxü̃ca̱x. Rü yemamaxã rü muxü̃ma ga Iraétanüxü̃ rü nayue.
7Rü nüma ga duü̃xü̃gü rü Moichéca̱x naxĩ rü ñanagürügü nüxü̃: —Aixcüma chixexü̃ taxügü yerü chixri cuchiga rü Corichiga tidexagü. ¡Rü nüxna nachogü ya Cori ya Tupana nax toxna yaxĩgachixẽẽãxü̃ca̱x i ñaa ãxtapegü! —ñanagürügü. Rü nüma ga Moiché rü Cori ya Tupanana naca nax Iraétanüxü̃axü̃́ nüxü̃ nangümaxü̃ca̱x ga norü chixexü̃gü.
8Rü nüma ga Cori ya Tupana rü Moichéxü̃ nangãxü̃ rü ñanagürü nüxü̃: —¡Ẽcü wüxi i ãxtapechicüna̱xã naxü rü ñu̱xũchi wüxi i naimaxã napuxpaweru, rü ngẽxma nachonagünüta! Rü ngẽxguma texéxü̃ nangõ̱xgux i wüxi i ãxtape, rü nüxü̃ tadawenü i ngẽma ãxtapechicüna̱xã i ngẽxma chonagüxü̃, rü ngẽmaãcü taxũtáma tayu —ñanagürü.
9Rü nüma ga Moiché rü nanaxü ga wüxi ga ãxtapechicüna̱xã ga bróũchenaxca̱x. Rü naimaxã nanapuxpaweru rü yexma nanachonagünüta. Rü yexguma texéxü̃ nangõ̱xgux ga ãxtape, rü yema bróũchenaxca̱x ga ãxtapexü̃ tadawenü, rü yemaacü tama tayu.
Nixĩxü̃tanü ga Iraétanüxü̃
10Rü inaxĩ ga Iraétanüxü̃. Rü Obówa nangugü rü yexma nayapexgü.
11Rü Obówa inaxĩãchi rü inaxĩ. Rü ĩane ga Iyé-abaríü̃ ga ínachianexü̃wa yexmanegu nayapexgü. Rü guma ĩane rü Moátanüxü̃anearü éstewaama nayexma.
12Rü yéma inaxĩãchi rü natüxacü ga Chérexgu nayapexgü.
13Rü moxü̃ãcü rü yéma inaxĩãchi rü inaxĩ. Rü natü i Arnóü̃arü tocutüguama nayapegü. Rü yema natü rü chianexü̃wa nayexma, rü Amoréutanüxü̃anewa ne nada. Rü yema natü nixĩ ga norü üyeane ga Moátanüxü̃ rü Amoréutanüxü̃.
14Rü ngẽmachigaxü̃ nixĩ i yaxuxü̃ i ngẽma popera i Tupanaarü Daipanewa ngóxü̃ i ñaxü̃:
—Baxéwa tachopetü ga Chufáarü naanewa,
rü natü ga Arnóü̃wa tichoü̃.
15Rü yema natüpechinügu taxĩ ñu̱xmata Áranewa tangugü.
Rü yemaacü Moátanüxü̃arü naanearü üyeanewa tangugü
—ñaxü̃.
16Rü natü ga Arnóü̃wa inaxĩãchi rü ñu̱xmata Beéxwa nangugü. Rü Beéxwa nixĩ ga nayexmaxü̃ ga gumá puchu ga Cori ya Tupana Moichémaxã nawa idexacü ga yexguma Moichéxü̃ ñaxgu: —¡Nangutaque̱xexẽxẽ i guxü̃ma i duü̃xü̃gü, rü choma rü tá dexá nüxna chaxã! —ñaxgu.
17Rü yema ngunexü̃gu nixĩ ga Iraétanüxü̃ ga ñaãcü nawiyaegüxü̃:
—¡Nagoxü̃chiü̃ i dexá i puchuwa!
¡Puchuégagu pewiyaegü!
18Rü ãẽ̱xgacügü nixĩ i norü naixmena̱xãmaxã yacaxmagüxü̃,
rü yatügü i tachigaxü̃ nixĩ i norü naixmena̱xãmaxã yawãxnagüxü̃
—yemaacü nawiyaegüxü̃. Rü nümagü ga Iraétanüxü̃ rü yema chianexü̃wa inaxĩãchi rü inaxĩ rü Matanáwa nangugü.
19Rü Matanáwa inaxĩãchi rü Nayaliéwa nangugü. Rü yéma inaxĩãchi rü ñu̱xmata Bamúxwa nangugü,
20Rü Bamúxwa inaxĩãchi rü ngate ga Moátanüxü̃arü naanewa ngẽxmaxü̃wa nangugü. Rü yéma rü inaxĩãma rü ñu̱xmata ma̱xpǘne ga Picháchitaeruwa nangugü. Rü guma ma̱xpǘnechitaeruwa nüxü̃ tadau ga yema chianexü̃.
Iraétanüxü̃ rü ãẽ̱xgacü ga Chióü̃xü̃ narüporamaegü
(Dt. 2.26-37)
21Rü Iraétanüxü̃ rü Amoréutanüxü̃arü ãẽ̱xgacü ga Chióü̃xü̃tawa nanamugü ga ñuxre ga orearü ngeruü̃gü. Rü ñanagürügü nüxü̃:
22—¿Namexü̃ ega curü naanewa tachopetügu? Rü ngẽma nanetügü i peanegu petogüxü̃ rü taxũtáma nüxü̃ tadáu, rü woo ngẽma perü úbanecüarü o rü taxũtáma nüxü̃ tadáu. Rü ngẽxgumarüxü̃ ta i ngẽma dexá i perü puchuwa ngẽxmaxü̃ rü taxũtáma nawa taxaxegü. Rü ngẽma nama i taxü̃ i we̱xgu idaxü̃gu tá nixĩ i taxĩxü̃ ñu̱xmata nüxü̃ tachopetü i curü naane —ñanagürügü.
23Natürü ga Chióü̃ rü tama Iraétanüxü̃xü̃ norü naanewa nachopetüxẽẽchaü̃. Rü nüma ga Chióü̃ rü guxü̃ma ga norü churaragüxü̃ nanutaque̱xe, rü chianexü̃wa Iraétanüxü̃xü̃ narünguxẽxẽ. Rü yexguma ĩane ga Yaáchawa nangugügu ga Iraétanüxü̃ rü Chióü̃ rü yexma Iraétanüxü̃maxã nügü nadai.
24Natürü ga Iraétanüxü̃ rü nügü ínapoxü̃güama rü nüxü̃ narüporamaegü, rü Chióü̃arü churaragüxü̃ nadai. Rü noxrüxü̃ nanayauxgü ga yema naane ga natü i Arnóü̃wa ixügüxü̃ rü ñu̱xmata natü i Yabóxgu yacuá. Rü yemaacü nanayauxgü ga guxü̃ma ga yema naane ñu̱xmata Amóü̃tanüxü̃anearü üyewa nangu. Rü yema üyeane rü meama ínapoxegu.
25Rü yemaacü ga Iraétanüxü̃ rü Amoréutanüxü̃arü ĩanegu nachocu. Rü guma ĩane ga nagu nachocune rü Ebóü̃ nixĩ rü ñu̱xũchi guma ĩanexacügü ga íxragüne ga norü ngaicamawa yexmagüne. Rü gumawa nayexmagü̃.
26Rü guma ĩane ga Ebóü̃gu nixĩ ga naxãpataxü̃ ga Amoréutanüxü̃arü ãẽ̱xgacü ga Chióü̃. Rü ü̃paacü ga Chióü̃ rü nüxíraü̃cü ga Moátanüxü̃arü ãẽ̱xgacümaxã nügü nadai, rü nüxna nanapu ga guxü̃ma ga yema norü naane rü ñu̱xmata natü ga Arnóü̃gu yacuáxü̃.
27Rü yemaca̱x nixĩ ga Chióü̃chiga ñagüxü̃ ga yema poperaarü ümatüruü̃gü:
—¡Nua ĩane ya Ebóü̃wa pexĩ, ĩane ya ãẽ̱xgacü ya Chióü̃ nagu ãpatanewa!
¡Rü peyamexẽgü ya norü ĩpatagü, rü ípenadaxẽxẽ i ngẽma norü poxeguxü̃tápü̱x ya yima ĩane!
28Rü Ebóü̃ ya Chióü̃arü ĩanewa inaxügü nax yayauraxü̃ ya üxü rü ñu̱xmata Moátanüxü̃arü ĩane ya Árwa nangu rü ñu̱xmata Arnóü̃arü ma̱xpǘnegüwa nangu.
29Pa Moátanüxü̃x, rü ngẽma rü wüxi i taxü̃ i ngechaü̃ nixĩ i pexca̱x.
Nuxã nixĩ i perüxoxü̃ i pema i tupananeta i Quemóxarü duü̃xü̃güx.
Rü nüma i perü tupananeta nixĩ ga Amoréutanüxü̃arü ãẽ̱xgacü ga Chióü̃axü̃́ natauxchaxẽẽãxü̃ nax ínayauxü̃xãxü̃ i cunegü rü cuxacügü.
30Natürü i ñu̱xma i toma i Iraétanüxü̃ rü marü tanadai.
Rü ĩane ya Ebóü̃wa itanaxügü rü ñu̱xmata Dibóü̃gu yacuáx.
Rü nagu tapogüe ya norü ĩanegü rü ñu̱xmata Nopágu rü Medebágu yacuáx
—ñagüxü̃.
Iraétanüxü̃ rü Bacháü̃anearü ãẽ̱xgacü ga Óxü̃ narüporamaegü
(Dt. 3.1-11)
31Rü yemaacü nixĩ ga Iraétanüxü̃ ga Amoréutanüxü̃arü naanegu nachocuxü̃ nax yexma naxãpatagüxü̃ca̱x.
32Rü Moiché rü nanamuãchitanü ga ñuxre ga yatügü nax ĩane ga Yachéxwa ngugütaewa naxĩxü̃ca̱x. Rü yexguma ga Iraétanüxü̃ rü nanapugü ga guma ĩanegü ga Yachéna ngaicamagüne. Rü ínanawoxü̃ ga yema Amoréutanüxü̃ ga guma ĩanegügu ãpatagüxü̃.
Iraétanüxü̃ rü ãẽ̱xgacü ga Óxü̃ narüporamaegü
33Rü yemawena ga Iraétanüxü̃ rü nügü Bacháü̃anewaama naxĩ. Natürü ga Óx ga Bacháü̃anearü ãẽ̱xgacü rü guxü̃ma ga norü churaragümaxã Edréiwa naxũ nax yexma Iraétanüxü̃maxã nügü nada̱i̱xü̃ca̱x.
34Rü yexguma ga Cori ya Tupana rü Moichémaxã nidexa rü ñanagürü nüxü̃: —¡Taxṹ i nüxü̃ cumuü̃xü̃! Erü choma rü tá cuxme̱xgu chananguxẽxẽ i Óx wüxigu namaxã i guxü̃ma i norü churaragü rü norü duü̃xü̃gü. Rü ngẽmaãcü yema Chióü̃ ga Amoréutanüxü̃arü ãẽ̱xgacü ga Ebóü̃gu ãpataxü̃maxã cuxüxü̃ tátama nixĩ i Óxmaxã cuxüxü̃ —ñanagürü.
35Rü yemaacü nixĩ ga Iraétanüxü̃ ga Óxü̃ yama̱xgüxü̃ rü nanegüxü̃ nada̱i̱xü̃ rü guxü̃ma ga norü churaragüxü̃ nada̱i̱xü̃. Rü taxuxü̃ma ga Óxarü duü̃xü̃gü namaxẽ. Rü yema Iraétanüxü̃ rü Óxarü naane rü nügüaxü̃́ nanayauxgü.
Currently Selected:
Iraétanüxü̃arü muxchiga 21: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
