Iraétanüxü̃arü muxchiga 20
20
Dexá ga nutawa yagoxü̃chiüxü̃
(Éx. 17.1-7)
1Rü gumá taunecüarü nüxíraü̃cü ga tauemacügu nixĩ ga Iraétanüxü̃ ga chianexü̃ ga Chíü̃wa nangugüxü̃. Rü nachica ga Cadégu narücho. Rü yexma nixĩ ga nayuxü̃ ga Moiché naeya̱x ga María. Rü yexma ngĩxü̃ nata̱xgü.
2Natürü ga duü̃xü̃gü rü nüxü̃́ nataxuma ga dexá, rü yemaca̱x nangutaque̱xegü rü Moichémaxã rü Aróü̃maxã narüxutagagü.
3Rü ñanagürügü Moichéxü̃: —Narümemae chi nixĩ ga wüxigu namaxã tayuexü̃ ga yema tatanüxü̃ ga Cori ya Tupana yuexẽẽxü̃.
4¿Rü tü̱xcüü̃ nixĩ i nua chianexü̃wa toxü̃ pegagüxü̃ i toma i Cori ya Tupanaarü duü̃xü̃gü nax tixĩgüxü̃? ¿Ẽ̱xna penaxwa̱xe nax nua tayuexü̃ wüxigu namaxã i toxü̃nagü?
5¿Rü tü̱xcüü̃ ga toxü̃ ípegaxü̃xü̃ ga Equítuanewa nax ñaa nachica i chixexü̃ rü ãũcümaxü̃wa toxü̃ pegagüxü̃ca̱x? Erü nua rü taxucürüwama ta̱xacü nuxã tato, rü nataxuma i igunecü, rü úba, rü boxra. Rü dexá rü nataxu i nawa ixaxexü̃ —ñanagürügü.
6Rü nüma ga Moiché rü Aróü̃ rü nüxna nixĩgachi ga yema duü̃xü̃gü, rü Tupanapataarü ücuchicawa naxĩ, rü yexma nanangücuchitanü. Rü yéma nixĩ ga Tupanaarü üüne ga naxca̱x nangóxü̃.
7-8Rü nüma ga Cori ya Tupana rü ñanagürü Moichéxü̃: —¡Nayaxu ya yima curü naixmena̱xã rü ñu̱xũchi cuenexẽ ya Aróü̃arü ngü̃xẽẽmaxã nangutaque̱xexẽxẽ i duü̃xü̃gü! ¡Rü ñu̱xũchi guxü̃pe̱xewa rü yimá ngéma ngẽxmacü ya nutamaxã nüxü̃ ixu nax dexá pexna naxãxü̃ca̱x! Rü tá nüxü̃ cudau nax yimá nutawa tá dexá yagoxü̃chiüxü̃ nax ngẽmawa naxaxegüxü̃ca̱x i nümagü i duü̃xü̃gü rü naxü̃nagü —ñanagürü ga Cori ya Tupana.
9Rü nüma ga Moiché rü Cori ya Tupanapatawa nanayaxu ga guma naixmena̱xã, yema nüma ya Tupana namuxü̃rüxü̃.
10Rü ñu̱xũchi ga Moiché rü Aróü̃ rü gumá nutape̱xegu nanangutaque̱xexẽxẽ ga duü̃xü̃gü. Rü Moiché rü ñanagürü nüxü̃: —¡Iperüxĩnüe, Pa Duü̃xü̃gü i Nue Wa̱xexü̃! ¿Penaxwa̱xe nax daa nutawa dexá pexca̱x tango̱xẽxẽxü̃ nax nawa pexaxegüxü̃ca̱x? —ñanagürü.
11Rü yema ñaxguwena ga Moiché rü guma naixmena̱xãmaxã naxunagüchacüxü, rü taxree̱xpü̱xcüna gumá nutawa nanacua̱i̱xca. Rü taxü̃ ga dexá yéma inayagoxü̃chíü. Rü yemaacü ga duü̃xü̃gü rü naxü̃nagü rü naxaxegü.
12Natürü nüma ga Cori ya Tupana rü Moichéxü̃ rü Aróü̃xü̃ ñanagürü: —Ñu̱xma nax tama aixcüma choxü̃́ peyaxõgüxü̃ rü tama choxü̃ picua̱xüü̃güxü̃ i nape̱xewa i ngẽma Iraétanüxü̃, rü ngẽmaca̱x i pema rü marü taxũtáma ñaa duü̃xü̃gümaxã nawa pengugü i ngẽma naane i pexna chaxãxü̃ —ñanagürü ga Tupana.
13Rü yema dexá ga nutawa yagoxü̃chiüxü̃ rü Meribá nixĩ ga naéga. Rü yema nachicawa nixĩ ga Iraétanüxü̃ ga Cori ya Tupanamaxã nanuexü̃. Rü yéma nixĩ ga Cori ya Tupana ga nügü inawéxü̃ nax nüma rü üünecü nax yixĩxü̃.
Edóü̃anearü ãẽ̱xgacü rü tama Iraétanüxü̃xü̃ namupetütanü
14Rü Moiché rü Cadéwa inanamuãchitanü ga ñuxre ga duü̃xü̃gü nax Edóü̃anearü ãẽ̱xgacümaxã nüxü̃ yanaxugüexü̃ca̱x ga ore ga ñaxü̃: —Cuenexẽgü i Iraétanüxü̃ rü ñaa ore cuxca̱x nua namugü: “Cuma rü meama nüxü̃ cucua̱x i ngẽma guxchaxü̃gü i nawa tachopetüxü̃.
15Rü nũxcümaü̃güxe ga tórü o̱xigü rü Equítuanewa taxĩ rü yexma taxãpatagü rü mucüma ga taunecü yéma tayexmagü. Natürü ga yema Equítuanecüã̱xgü rü chixri tümamaxã nachopetü ga guxema tórü o̱xigü rü ngẽxgumarüxü̃ ta i toma rü chixri tomaxã nachopetü.
16Rü yemaca̱x ga toma rü Cori ya Tupanana ngü̃xẽẽca̱x tacagü. Rü nüma ga Cori rü nüxü̃ naxĩnü nax naxca̱x aita taxüexü̃. Rü norü duü̃xü̃ i dauxü̃cüã̱x totanüwa namu rü yema nixĩ ga Equítuanewa toxü̃ ígaxü̃xü̃. Rü ñu̱xma rü nua daa ĩane ya Cadéwa nixĩ i tangexmagüxü̃ i curü naanearü üyeanewa.
17Rü ngẽmaca̱x cuxna tayaca nax curü naanewa toxü̃ cumupetütanüxü̃ca̱x. Rü curü naanegü i cunetügü rü cubügü nagu togüxü̃ rü úbanecügu rü taxũtáma nawa tachopetü. Rü ngẽma dexá i curü puchugüwa ngẽxmaxü̃ rü taxũtáma nawa taxaxegü. Rü ngẽma nama i taxü̃ i we̱xgu idaxü̃gu tá taxĩ rü tagutáma nüxna ítachocu ñu̱xmatata curü naanexü̃ tangupetütanü” —ñanagürü.
18Natürü nüma ga Edóü̃anearü ãẽ̱xgacü rü nanangãxü̃ rü ñanagürü: —Tama chanaxwa̱xe nax chorü naanewa pichopetüxü̃. Rü ngẽxguma tá nawa pechopetü̱xgu i chorü naane rü tá chorü churaragümaxã pepe̱xegu chayangu rü tá pexü̃ chadai —ñanagürü.
19Natürü ga Iraétanüxü̃ rü meama namaxã nüxü̃ nixugüama rü ñanagürügü: —Toma rü ngẽma nama i taxü̃ i we̱xgu idaxü̃guxica tá nixĩ i taxĩxü̃. Rü ngẽxguma tomagü rüe̱xna toxü̃nagü ngẽma perü dexá i perü puchuwa ngẽxmagüxü̃wa naxaxegügu, rü cuxü̃́ tá tanaxütanü. Rü ngẽma tanaxwa̱xexü̃xicatama nixĩ nax curü naanewa tachopetüxü̃ —ñanagürügü.
20Natürü ga Edóü̃anearü ãẽ̱xgacü rü nanangãxü̃ rü ñanagürü: —Pemaxã nüxü̃ chixu rü ¡taxũtáma chorü naanewa pechopetü! —ñanagürü. Rü norü churaragü ga iporaexü̃ rü meama ixãxnexü̃ Iraétanüxü̃pe̱xegu nayayi.
21Rü yexma nichiye ga Edóü̃anearü churaragü nax tama norü naanewa nachopetüxü̃ca̱x ga Iraétanüxü̃. Rü yemaca̱x ga Iraétanüxü̃ rü to ga namaca̱x nadaugü nax yemagu naxĩxü̃ca̱x.
Nayu ga Aróü̃
22Rü guxü̃ma ga duü̃xü̃gü ga Iraétanüxü̃ rü ínachoxü̃ ga Cadéwa rü ma̱xpǘne ga Ór íyexmaxü̃waama naxĩ.
23Rü Edóü̃anearü üyeanewa ga Cori ya Tupana rü Moichémaxã rü Aróü̃maxã nidexa rü ñanagürü:
24—Aróü̃ rü tá paxa nayu, rü ngẽmaca̱x taxũtáma nawa nangu i ngẽma naane i choma Iraétanüxü̃na chaxãxü̃, yerü yexguma natüxacü ga Meribáxü̃tawa peyexmagügu ga pema rü tama chauga pexĩnüe.
25¡Cumax, Pa Moichéx, rü Aróü̃maxã rü ñu̱xũchi nane i Ereachámaxã ma̱xpǘne ya Órgu naxĩnagü!
26¡Rü Aróü̃xü̃ ínacuxuchi i norü chacherdótechiru, rü nane ya Ereacháxü̃ nagu icu̱xẽxẽ! Rü nüma i Aróü̃ rü yima ma̱xpǘne ya Órgu tá nayu —ñanagürü.
27Rü Moiché rü nayanguxẽxẽ ga yema Cori ya Tupana namuxü̃. Rü nümagü ga Moiché rü Aróü̃ rü Ereachá, rü guxü̃ma ga Iraétanüxü̃pe̱xewa ínachoõchi nawa ga guma ma̱xpǘne ga Ór.
28Rü nüma ga Moiché rü guma ma̱xpǘnechitaeruwa rü Aróü̃xü̃ ínacuxuchi ga chacherdótechiru rü ñu̱xũchi Ereacháxü̃ nagu nicu̱xẽxẽ. Rü guma ma̱xpǘnechitaerugu nayu ga Aróü̃. Rü yemawena ga Moiché rü Ereachámaxã ínarüxĩgü nawa ga guma ma̱xpǘne.
29Rü yexguma Iraétanüxü̃ nüxü̃ icua̱xãchitanügu nax marü nayuxü̃ ga Aróü̃, rü 30 ga ngunexü̃ nangechaü̃gü rü naxca̱x naxauxe.
Currently Selected:
Iraétanüxü̃arü muxchiga 20: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
