Iraétanüxü̃arü muxchiga 16
16
Coré rü Moichémaxã nanu
1-2Moichémaxã nanu ga wüxi ga Lebítanüxü̃ ga Corégu ãégaxü̃. Rü nüma ga Coré ga Ichá nane rü Queáxtaxa nixĩ. Rü Coréwa naxügü ta ga tomaepü̱x ga yatügü ga Rubéü̃tanüxü̃ ga Datáü̃, rü Abiráü̃ ga Eriá nanegü, rü Óü̃ ga Pérex nane. Rü yemawaama nügü naxügüxẽxẽ ga 250 ga Iraétanüxü̃ ga ãẽ̱xgacügü ixĩgüxü̃ ga duü̃xü̃gümaxã icua̱xgüxü̃ rü duü̃xü̃gü mea naga ĩnüexü̃.
3Rü guxü̃ma ga yemagü rü nangutaque̱xegü rü Moichémaxã rü Aróü̃maxã narüxutagagü rü ñanagürügü: —Marütama nax pexica tomaxã ipecuáxü̃. Yerü ga Tupana rü guxãxü̃ma nixĩ ga nadexü̃ rü ngẽmaca̱x ya Cori ya Tupana rü tamaxã nanuxma i guxãma i yixemax. ¿Rü tü̱xcüü̃ i pemax i Tupanaarü duü̃xü̃güétüwa pegü pexügüxẽxẽchaü̃? —ñanagürügü.
4-5Rü yemaxü̃ naxĩnügu ga Moiché rü ñaxtüanegu nayangücuchi rü Coréxü̃ rü yema nawe rüxĩxü̃xü̃ ñanagürü: —Moxü̃ pa̱xmama rü nüma ya Cori ya Tupana rü tá tüxü̃ nüxü̃ nacua̱xẽxẽ rü texé tixĩ ya noxrü ixĩxẽ rü tüxü̃ naxunetaxe nax nape̱xewa tayaguxü̃ca̱x i ãmaregü. Rü yíxema Tupana tüxü̃ unetaxexicatama tá nixĩ i namexü̃ nax nape̱xewa tayaguxü̃ i ãmaregü.
6-7Rü ñaa tá pexü i cumax, Pa Coréx, rü cumücügü: “Rü nua tá penana i perü pumarate̱xearü guruü̃gü i ã́xwe ya naicü nawa ngẽxmaxü̃. Rü yimáétügu tá penagü i pumarate̱xe rü moxü̃ pa̱xmama Cori ya Tupanape̱xegu tá peyanu. Rü yimá yatü ya nüma ya Cori ya Tupana nüxü̃ naxunetacü tá nixĩ ya nüma nayauxãcü. Rü pemax, Pa Lebítanüxü̃x, rü marü pengupetü nax guxchaxü̃ pexüxü̃” —ñanagürü.
8-9Rü yemawena ga Moiché rü Coréxü̃ ñanagürü: —¡Choxü̃ iperüxĩnüe, Pa Lebítanüxü̃x! ¿Tama ẽ̱xna namaxã petaãxẽ nax Cori ya Iraétanüxü̃arü Tupana pexü̃ idexechixü̃ natanüwa i guxü̃ma i ngẽma Iraétanüxü̃ nax nua napatawa nüxü̃́ pepuracüexü̃ca̱x rü ngẽmaãcü guxü̃ma i duü̃xü̃güxü̃ perüngü̃xẽxẽgüxü̃ca̱x nawa i ngẽma puracü i pexüxü̃?
10Rü nüma ya Cori ya Tupana rü nanaxwa̱xe nax cuma rü ñu̱xũchi cumücügü i Lebítanüxü̃ nax norü ngaicamawa pengẽxmagüxü̃. ¿Rü tü̱xcüü̃ penaxwa̱xe nax pematama chacherdótegü pixĩgüxü̃?
11Rü natüca̱xma nixĩ i Aróü̃chiga chixri pidexagüxü̃ erü nüma i Aróü̃ rü taxuxü̃ma nixĩ. Rü aixcüma pemaxã nüxü̃ chixu rü yima namaxã penuecü i cuma rü cumücügü, rü Cori ya Tupana nixĩ —ñanagürü.
12Rü ñu̱xũchi ga Moiché rü naxca̱x nangema ga Datáü̃ rü Abiráü̃ ga Eriá nanegü. Natürü ga nümagü rü Moichéxü̃tawa namugagü rü ñanagürügü: —Tama cuxü̃tawa taxĩxchaü̃.
13¿Ẽ̱xna cuxca̱x rü wüxi ga ĩnüca nixĩ ga toxü̃ nax ícugaxü̃xü̃ nawa ga Equítuane ga mexü̃ ga õna taguma ítaxuxü̃wa nax nuxã ínachianexü̃gu toxü̃ cuyuexẽxẽxü̃ca̱x? ¿Rü ngẽmaãcü naétü cunaxwa̱xe nax torü ãẽ̱xgacü quixĩxü̃?
14Rü tama aixcüma nixĩ i nawa toxü̃ cugagüxü̃ i ngẽma naane i mexü̃ i õna taguma ítaxuxü̃wa, rü tama toxna cuyaxãchigü i torü naane rü úbanecügü. ¿Rü cuma nagu curüxĩnügu rü ñaa duü̃xü̃gü rü ningexetü nax cuma ícunaxwa̱xexü̃wa cunagagüxü̃ca̱x? Rü taxũtáma cuxü̃tawa taxĩ —ñanagürügü.
15Rü yexguma ga Moiché rü poraãcü nanu, rü Cori ya Tupanaxü̃ ñanagürü: —Tama chanaxwa̱xe i nüxü̃́ cunayaxu i ngẽma duü̃xü̃güarü ãmaregü. Erü choma rü taguma ñuxgu wüxi i norü búru nüxna chayaxu, rü bai i ñuxgu wüxíemaxã chixexü̃ chaxü —ñanagürü.
16Rü ñu̱xũchi Coréxü̃ ñanagürü: —Moxü̃arü ngunexü̃gu rü chanaxwa̱xe i nua Cori ya Tupanape̱xewa cuxũ namaxã i cumücügü. Rü Aróü̃ rü tá ta nangẽxma.
17Rü guxãma i pema i 250 i duü̃xü̃gü pixĩgüxü̃, rü name nixĩ i wüxichigü nua penange i perü pumarate̱xearü guruxü̃ i pumarate̱xemaxã pexüãcuxü̃. Rü cuma rü Aróü̃ rü ta ngẽxgumarüxü̃ tátama nua penange i perü pumarate̱xearü guruü̃gü rü tá ngẽma 250 i pumarate̱xearü guruü̃güxü̃tagu penanu i Cori ya Tupanape̱xewa —ñanagürü.
18Rü yemaacü wüxichigü nanayaxu ga norü pumarate̱xearü guruxü̃. Rü ã́xwe ga naicümaxã nayaxüãcu rü ñu̱xũchi pumarate̱xe naétü nagügü. Rü yemaacü Tupanapataarü ĩã̱xgu nayachigü namaxã ga Moiché rü Aróü̃.
19Rü nüma ga Coré rü Moichémaxã rü Aróü̃maxã nananuexẽxẽ ga duü̃xü̃gü. Rü yemaca̱x Tupanapatape̱xegu nangutaque̱xegü ga guxü̃ma ga yema duü̃xü̃gü. Rü Tupanaarü üüne rü naxca̱x nango̱x.
20-21Rü nüma ga Cori ya Tupana rü Moichéxü̃ rü Aróü̃xü̃ ñanagürü: —¡Pixĩgachi natanüwa i ngẽma duü̃xü̃gü! Erü ñu̱xmatatama chanadai —ñanagürü.
22Natürü nüma ga Moiché rü Aróü̃ rü Tupanape̱xegu ñaxtüanegu nanangücuchitanü rü ñanagürügü nüxü̃: —Pa Tupanax, cuma nax cunamaxẽxẽẽxü̃ i guxü̃ma i duü̃xü̃gü, rü tama name i wüxitama i duü̃xü̃arü chixexü̃gagu rü guxü̃ma i duü̃xü̃gümaxã cunu —ñanagürügü.
23-24Rü nüma ga Cori ya Tupana rü Moichéxü̃ nangãxü̃ rü ñanagürü: —¡Namaxã nüxü̃ ixu i guxü̃ma i Iraétanüxü̃ rü ínachoxü̃ nawa ya yimá napatagü ya Coré rü Datáü̃ rü Abiráü̃ nawa ngẽxmagüne! —ñanagürü.
25Rü yexguma ga Moiché rü inaxũãchi nax Datáü̃ rü Abiráü̃ íyexmagüxü̃wa naxũ. Rü nawe narüxĩ ga Iraétanüxü̃arü ãẽ̱xgacügü.
26Rü ñu̱xũchi nüma ga Moiché rü duü̃xü̃gümaxã nüxü̃ nixu rü ñanagürü: —¡Nüxna pixĩgachi ya napatagü i ngẽma duü̃xü̃gü i chixexü̃gu rüxĩnüexü̃! ¡Rü taxũtáma nüxü̃ pedau i norü ngẽmaxü̃gü nax tama naxrüxü̃ norü chixexü̃gagu peyuexü̃ca̱x! —ñanagürü.
27Rü guxü̃ma ga duü̃xü̃gü rü nixĩgachitanü nawa ga yema nachica ga Coré, rü Datáü̃ rü Abiráü̃ nawa yexmagüxü̃. Rü nüma ga Datáü̃ rü Abiráü̃ rü naxma̱xgümaxã rü naxacügümaxã napatagü ga naxchirunaxca̱xarü ĩã̱xwa nayexmagü.
28Rü nüma ga Moiché rü nidexachigüama rü ñanagürü: —Rü ñaa i ñu̱xma tá nüxü̃ pidauxü̃wa tá pexü̃ chanawe̱x nax Cori ya Tupana yixĩxü̃ ya choxü̃ mucü nax chanaxüxü̃ca̱x i guxü̃ma i ta̱xacü i chaxüxü̃, rü tama i chomatama chorü ngúchaü̃maxã yixĩxü̃ nax chanaxüxü̃.
29Rü ngẽxguma ñaa yatügü rü mea tá nayuemaregu, ngexü̃rüüxü̃ i duü̃xü̃rüxü̃, rü ngẽmawa tá nüxü̃ pecua̱x nax tama Cori ya Tupana yixĩxü̃ i choxü̃ naxüxẽẽcü i ngẽma chaxüxü̃.
30Natürü ngẽxguma Cori ya Tupana rü ngürüãchimare ta̱xacü ngupetüxẽẽgu, rü yange̱xgu i waixü̃mü rü ngẽmagu nayicugu i ngẽma duü̃xü̃gü guxü̃ma i norü ngẽmaxü̃gümaxã, rü ngẽmaãcü maxẽxü̃ma waixü̃mü ingexü̃gü nayicugu, rü ngẽmawa tá nüxü̃ pecua̱x nax ngẽma yatügü yixĩxü̃ i Cori ya Tupanamaxã nuexü̃ —ñanagürü.
31Rü yexguma Moiché yagúegagu ga nax yadexaxü̃, rü ga waixü̃mü rü ninge̱x natüü̃wa ga yema duü̃xü̃gü.
32Rü yexma nayicu ga yema duü̃xü̃gü ga Coréweama rüxĩxü̃, wüxigu namaxã ga naxacügü rü naxma̱xgü rü guxü̃ma ga norü yemaxü̃gü.
33Rü maxẽxü̃ma yema waixü̃mü ga ingexü̃gü nayicu namaxã ga norü yemaxü̃gü. Rü ñu̱xũchi ga yema waixü̃mü rü nügüna naxũ. Rü yemaacü Iraétanüxü̃tanüwa inayarüxo ga yema duü̃xü̃gü.
34Rü yema duü̃xü̃gü ga waixü̃mü ga ingexü̃gü yixcuxü̃ rü aixta naxüe. Rü yexguma yemaxü̃ naxĩnüegu ga yema Iraétanüxü̃ ga yéma irüdaunüxü̃ rü nibuxmü rü ñanagürügü: —Tama tanaxwa̱xe i tomagü rü ta waixü̃mü ingexü̃gü nax tayicuxü̃ —ñanagürügü.
35Rü ñu̱xũchi nüma ga Cori ya Tupana rü üxüema yéma namu, rü ínanagu ga yema 250 ga yatügü ga norü pumarate̱xe Cori ya Tupanaca̱x yéma igugüxü̃.
36Rü Cori ya Tupana rü Moichémaxã nidexa rü ñanagürü nüxü̃:
37—¡Aróü̃ nane ya Ereacháxü̃ namu nax nadeaxü̃ca̱x i ngẽma pumarate̱xearü guruü̃gü i ngẽma duü̃xü̃gü ixaexü̃wa! ¡Rü ngẽma pumarate̱xearü guruü̃güwa ngẽxmagücü ya ã́xwe rü yáxü̃wa yawogüã erü ngẽma pumarate̱xearü guruxü̃gü rü naxüüne!
38Rü ngẽma norü pumarate̱xearü guruü̃gü i ngẽma yatügü i norü pecadugagu yuexü̃, rü nixüüne erü marü cha̱u̱xca̱x pumarate̱xe nawa nigugü. ¡Rü ngẽma norü pumarate̱xearü guruü̃gü rü peyapomügü nax naxãtachinüxü̃ca̱x! ¡Rü ngẽma natachinümaxã penatüxüne i ngẽma ãmarearü guruxü̃ nax ngẽma rü wüxi i cua̱xãchiruxü̃ yixĩxü̃ca̱x naxca̱x i Iraétanüxü̃! —ñanagürü.
39Rü nüma ga chacherdóte ga Ereachá rü nanade ga yema pumarate̱xearü guruü̃gü ga bróũchenaxca̱x ga yéma nanaxü̃ ga yema yatügü ga ixaexü̃. Rü ñu̱xũchi duü̃xü̃güxü̃ namu nax yaxütachinüãxü̃ca̱x nax yemamaxã natüxünegüãxü̃ca̱x ga ãmarearü guruxü̃.
40Rü yema nixĩ ga wüxi ga cua̱xruxü̃ naxca̱x ga Iraétanüxü̃ nax tama namexü̃ nax toguemare ga duü̃xẽ ya tama Aróü̃tanüxü̃ ixĩxẽ pumaraarü guruü̃na tangaicamaxü̃ nax Cori ya Tupanaca̱x pumarate̱xe tiguxü̃. Erü texé ya nüxna ngaixcamaxe rü yema Coré rü namücügüxü̃ ngupetüxü̃rüxü̃ tá tüxü̃ nangupetü. Rü nüma ga Ereachá rü nanaxü ga guxü̃ma ga yema Cori ya Tupana Moichéwa namaxã nüxü̃ yaxuxü̃ãcü.
41Rü yemaarü moxü̃ãcü rü guxü̃ma ga yema Iraétanüxü̃ rü inanaxügüe ga Moiché rü Aróü̃chiga nax chixri yadexagüxü̃. Rü ñanagürügü: —Pema rü penadaimare i ñaa Cori ya Tupanaarü duü̃xü̃gü —ñanagürügü.
42Rü guxü̃ma ga yema duü̃xü̃gü rü Moichéxü̃ rü Aróü̃xü̃ ínachomaeguãchi rü yéma ninuü̃gatanücüxü. Natürü ga nüma ga Moiché rü Aróü̃ rü Tupanapatawaama naxĩ. Rü yexgumatama yema caxixü̃ ga Cori ya Tupana nawa yexmaxü̃ rü napataétügu ínarüxĩ, rü norü üünemaxã nayadüxü.
43-44Rü nüma ga Moiché rü Aróü̃ rü Tupanapatape̱xewa nangugü rü yexma nayachigü. Rü nüma ga Cori ya Tupana rü Moichéxü̃ ñanagürü:
45—¡Pixĩgachi natanüwa i ngẽma duü̃xü̃gü, erü ñu̱xma tátama chanadai! —ñanagürü. Rü nüma ga Moiché rü Aróü̃ rü yexgumatama ñaxtüanegu nayangücuchitanü.
46Rü nüma ga Moiché rü Aróü̃xü̃ ñanagürü: —¡Nua nange i curü pumarate̱xearü guruxü̃, rü ã́xwe i naxü̃nagüarü guruü̃wa cuyaxucümaxã naxüãcu, rü ñu̱xũchi pumarate̱xe ngẽxma ta nagü! ¡Rü ñu̱xũchi paxa duü̃xü̃gü íngẽxmagüxü̃wa naxũ rü ngéma duü̃xü̃güca̱x nüxna nachogü ya Tupana nax nüxü̃́ nüxü̃ nangümaxü̃ca̱x i norü chixexü̃gü! Erü nüma ya Cori ya Tupana rü poraãcü nanuxũchi, rü ngẽma da̱xaweane i namaxã nadaiaxü̃ rü marü inaxügü —ñanagürü.
47Rü nüma ga Aróü̃ nanaxü ga yema Moiché namaxã nüxü̃ ixuxü̃. Rü paxa inañaãchi rü yema duü̃xü̃gü íngutaque̱xexü̃wa naxũ. Rü yema da̱xaweane ga Tupana yéma muxü̃ rü marü natanüwa nangu ga duü̃xü̃gü rü marü muxü̃ma nayue. Rü yexguma ga nüma ga Aróü̃ rü yema pumarate̱xearü guruü̃gu nanagü ga pumarate̱xe, rü Tupanana naca nax duü̃xü̃güaxü̃́ nüxü̃ yanangümaxü̃ca̱x ga norü chixexü̃gü.
48Rü ñu̱xũchi ga nüma ga Aróü̃ rü yema maxẽxü̃ rü yema marü yuexü̃arü ngaxü̃gu nachi. Rü yexguma ínayachaxãchi ga yema da̱xaweane.
49Natürü marü 14,700 ga duü̃xü̃gü nixĩ ga yuexü̃ namaxã ga yema da̱xaweane. Rü naétü nixĩ ga yema nüxíra marü yuexü̃ ga Coréwe rüxĩxü̃ ga tama Moichéga ĩnüechaü̃xü̃.
50Rü yexguma marü iyanaxoxgu ga yema da̱xaweane, rü nüma ga Aróü̃ rü wenaxarü Tupanapataca̱x nataegu ga Moiché íyexmaxü̃wa.
Currently Selected:
Iraétanüxü̃arü muxchiga 16: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
