Iraétanüxü̃arü muxchiga 17
17
Aróü̃arü naixmena̱xã rü narüxüatü rü ñu̱xũchi naxo
1Cori ya Tupana rü Moichémaxã nidexa rü ñanagürü nüxü̃:
2—¡Namaxã nüxü̃ ixu i Iraétanüxü̃tücumüarü ãẽ̱xgacügü rü wüxichigü nua nange ya norü naixmena̱xã! Rü guxü̃wama rü 12 tá nixĩ ya yima naixmena̱xãgü. Rü cuma rü wüxichigü i norü naixmena̱xãgu tá cuyaxügüéga.
3Rü yima naixmena̱xã ya Lebítanüxü̃tücumüarü ãẽ̱xgacüarü ixĩxü̃ne rü tá Aróü̃éga nagu cuxümatü. Rü ngẽma togü i Iraétanüxü̃tücumüarü ãẽ̱xgacügü rü norü naixmena̱xãchigügu tá cunaxümatü i naéga.
4Rü Tupanapatagu tá cuyanu nape̱xegu i ngẽma baú i chorü mugüpane nawa ngẽxmaxü̃ i ngextá choma pemaxã íchangexmaxü̃wa.
5Rü choma rü tá chanaxüatüxẽxẽ ya yima norü naixmena̱xã ya yimá choma nüxü̃ chaxunetacü nax nüma chorü duü̃xü̃gümaxã inacuáxü̃ca̱x. Rü ngẽmaãcü i ngẽma Iraétanüxü̃ rü taxũtáma chope̱xewa chixri pechiga nidexagü —ñanagürü.
6Rü nüma ga Moiché rü Iraétanüxü̃maxã nüxü̃ nixu ga yematama ore. Rü wüxichigü ga yema Iraétanüxü̃tücumüarü ãẽ̱xgacü rü wüxi ga naixmena̱xã Moichéna nixãchigü. Rü yemaacü 12 ga naixmena̱xã nixĩ ga guxü̃wama. Rü guma naixmena̱xãtanüwa nayexma ga Aróü̃arü naixmena̱xã.
7-8Rü nüma ga Moiché rü Tupanape̱xegu nayanu ga guma naixmena̱xãgü nawa ga gumá Tupanapata. Rü yexguma moxü̃ãcü Tupanapatawa naxũxgu, rü nüxü̃ nadau ga Aróü̃ yexma üxü̃ne ga naixmena̱xã ga Lebítanüxü̃arü ixĩxü̃ne ga nax naxãátüxü̃, rü naxãchacuxü̃ rü naxoxü̃ rü nadauxü̃ ga norü o ga alméü̃dragü.
9Rü nüma ga Moiché rü Tupanapatawa ínananuxü̃ ga guxü̃nema ga guma naixmena̱xãgü rü yema Iraétanüxü̃xü̃ nüxü̃ nadauxẽxẽ. Rü yexguma yema ãẽ̱xgacügü marü nüxü̃ nadaugüguwena rü wüxichigü rü nanayaxu ga norü naixmena̱xã.
10Rü yexguma ga Tupana rü Moichéxü̃ ñanagürü: —¡Yima Aróü̃arü naixmena̱xã rü wenaxarü ngẽma baú i chorü mugüpane nagu üxü̃pe̱xegu naxǘ! ¡Rü ngẽxma namaxã nanguxü̃ nax wüxi i ãũcümaxü̃ yixĩxü̃ca̱x naxca̱x i ngẽma duü̃xü̃gü i chomaxã nuexü̃! Rü ngẽmaãcü tá inarüxo nax chixri chauchiga yadexagüxü̃ rü taxũtáma nayue i ngẽma Iraétanüxü̃ —ñanagürü.
11Rü nüma ga Moiché rü nanaxü ga guxü̃ma ga yema Cori ya Tupana namaxã nüxü̃ ixuxü̃ãcü.
12-13Natürü ga nüma ga Iraétanüxü̃ rü Moichéxü̃ ñanagürügü: —Nuxãwaxi nixĩ i marü itarütauxexü̃. Rü guxãtáma i toma rü nuxã tá tayue. Rü guxãma ya yíxema Tupanapatana ngaixcamaxe rü tayue. ¿Ẽ̱xna guxãma i yixemagü rü tá tayue? —ñanagürügü.
Currently Selected:
Iraétanüxü̃arü muxchiga 17: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
