Iraétanüxü̃arü muxchiga 13
13
Moiché rü Canaáü̃anewa nanamugü ga 12 ga ngugütaeruü̃gü
(Dt. 1.19-25)
1Rü nüma ga Cori ya Tupana rü Moichémaxã nidexa rü ñanagürü:
2—¡Ẽcü, Canaáü̃anewa namugü i 12 i yatügü nax ngéma yangugütaegüxü̃ca̱x, erü ngẽma naane tá nixĩ i pexna chaxãxü̃ i pema i Iraétanüxü̃! ¡Rü wüxitücumüwachigü rü namuãchi i ngẽma norü ãẽ̱xgacü ixĩxü̃! —ñanagürü ga Tupana.
3Rü nüma ga Moiché rü yema chianexü̃ ga Paráü̃gu ãégaxü̃wa inanamuãchitanü ga yema ãẽ̱xgacügü yematama Tupana namaxã nüxü̃ ixuxü̃rüxü̃. Rü guxü̃ma ga yema 12 rü Iraétanüxü̃arü ãẽ̱xgacügü nixĩgü.
4Rü yema inamuãchitanüxü̃ rü ñaa nixĩgü: Rubéü̃tanüxü̃wa inamuãchi ga Chamúa ga Chacúx nane,
5rü Chimeóü̃tanüxü̃wa inamuãchi ga Chapáx ga Orí nane,
6rü Yudátanüxü̃wa inamuãchi ga Caréx ga Yeponé nane,
7rü Ichacátanüxü̃wa inamuãchi ga Igá ga Yúche nane,
8rü Efraíü̃tanüxü̃wa inamuãchi ga Ochéa#13.8 Yochué. ga Núü̃ nane,
9rü Bẽyamíü̃tanüxü̃wa inamuãchi ga Patí ga Rapú nane,
10rü Chaburóü̃tanüxü̃wa inamuãchi ga Gadié ga Chodí nane,
11rü Yúchetanüxü̃wa inamuãchi ga Gadí, ga Chuchí nane (rü guma rü Manachétanüxü̃ nixĩ),
12rü Dáü̃tanüxü̃wa inamuãchi ga Amié ga Guemarí nane,
13rü Achétanüxü̃wa inamuãchi ga Chetú ga Micaé nane,
14rü Netarítanüxü̃wa inamuãchi ga Nabí ga Baxchí nane,
15rü Gáxtanüxü̃wa inamuãchi ga Gueué, ga Maquí nane.
16Rü yemagü nixĩ ga naégagü ga yema yatügü ga Moiché Canaáü̃anewa mugüxü̃ ngugüanewa. Rü Ochéa ga Núü̃ nane rü Moiché rü to ga naégagu nanaxüéga. Rü Yochuégu nixĩ ga naxüégaaxü̃.
17Rü nüma ga Moiché rü nayamugü ga yema yatügü nax Canaáü̃anewa naxĩxü̃ca̱x rü yéma yangugütaegüxü̃ca̱x. Rü ñanagürü nüxü̃: —¡Ngẽma chianexü̃ i Négueguama pexĩ rü ínamáxpüxanexü̃wa pechopetü!
18Rü tá penangugü i ngẽma nachixü̃ane rü ngẽma duü̃xü̃gü i ngẽxma ãchiü̃güxü̃ rü aixcüma naporae rüe̱xna tama, rü aixcüma namu rüe̱xna tama.
19Rü tá penangugügü ya yimá norü ĩanegü rü aixcüma düxenügümare yixĩ rüe̱xna mea ínapoxegugü. Rü tá penangugügü i ngẽma naane i nawa nangẽxmagüxü̃ rü aixcüma mexü̃ i waixü̃mü yixĩ rüe̱xna tama.
20Rü tá penangugü rü aixcüma nawaxmüane rüe̱xna tama. Rü ngẽxgumarüxü̃ ta penangugü rü aixcüma nanaixnecüã́ rüe̱xna tama. ¡Rü taxṹ ipemuü̃exü̃! Rü nua tá penange i ngémacüã̱x i nanetüarü o —ñanagürü ga Moiché. Rü yema naanewa rü meama nüxíraxü̃xü̃ ga norü úbaarü o idauxgu nixĩ ga yexguma Moiché yéma namugügu ga yema yatügü ga ngugütaewa yéma ĩxü̃.
21Rü yema yatügü rü yéma naxĩ rü nayangugügü ga yema nachixü̃ane. Rü súrwaama ga chianexü̃ ga Chíü̃ íyexmaxü̃wa inanaxügüe ga nax nangugügüãxü̃ ga yema naane rü ñu̱xmata ĩane ga Reóxwa nangugü ga nórtewaama ga ĩane ga Amáarü ngaicamana.
22Rü yema chianexü̃ ga Néguewaama nachocu rü ñu̱xmata ĩane ga Ebróü̃wa nangugü. Rü guma ĩanegu nixĩ ga naxãchiü̃güxü̃ ga Aimáü̃tanüxü̃, rü Checháitanüxü̃ rü Tarmáitanüxü̃ ga Anáxtaagü ixĩgüxü̃. Rü guma ĩane ga Ebróü̃ rü marü nũxcüma naxü. Rü marü 7 ga taunecü nüxíra naxü naxü̃pa ga guma ĩane ga Choáü̃ ga Equítuanewa yexmane.
23Rü yema doxonexü̃ ga Ecúwa nangugü, rü yéma nayadaegü ga wüxi ga úbamaxü̃chacüxü ga ta̱xya̱xaarü oṍxü̃. Rü wüxi ga naiwa nayawe̱xgü rü yemaacü nügümaxã nayangetaü̃gü. Rü ori̱x ga igu rü ori̱x ga boxra rü ta ningegü.
24Rü yema doxonexü̃ rü Ecúgu nanaxüégagü naxca̱x ga yema úbaya̱xa ga yéma yadaegüxü̃ ga yema Iraétanüxü̃.
25-26Rü 40 ga ngunexü̃ ningegü nax nangugüanegüãxü̃. Rü yemawena rü Cadéca̱x nawoegu ga Paráü̃arü chianexü̃wa, yerü yéma nixĩ ga nayexmagüxü̃ ga Moiché rü Aróü̃ rü guxü̃ma ga Iraétanüxü̃. Rü nüma ga yema ngugütaewa ne ĩxü̃ rü nüxü̃ nixugügü ga guxü̃ma ga yema nüxü̃ nadaugüxü̃. Rü nüxü̃ nanawe̱xgü ga yema nanetüarü o ga yema nachixü̃anewa ne nangegüxü̃.
27Rü Moichémaxã nüxü̃ nixugüe rü ñanagürügü: —Marü nawa ne taxĩ i ngẽma naane i nawa toxü̃ cumugüxü̃. Rü aixcüma nixĩ i ngẽma naanewa rü guxü̃wama nangẽxmaxü̃ i nabüane i mexü̃ rü taguma nataxuxü̃. Rü ñaagü nixĩ i ngẽma nanetügü i ngéma muxü̃.
28Natürü ngẽma duü̃xü̃gü i ngẽxma ãchiü̃güxü̃ rü nipora, rü yimá norü ĩanegü rü nita rü meama ínipoxegugü. Rü to ga yéma nüxü̃ tadauxü̃ nixĩ ga gumá Anáxtaagü i naxrüü̃tama imáchanexü̃chixü̃.
29Rü ngẽma Négueanewa rü ngẽxma naxãchiü̃gü i ngẽma Amaréxtanüxü̃. Rü ngẽma ínamáxpü̱xanexü̃gu rü naxãchiü̃gü i ngẽma Itítanüxü̃ rü Yebuchéutanüxü̃ rü Amoréutanüxü̃. Rü márcutügu rü natü i Yudáü̃cutügu nixĩ i naxãchiü̃güxü̃ i Canaáü̃tanüxü̃ —ñanagürügü.
30Rü yexguma yema ngugütaeruxü̃ ga Caréx rü nanachianexẽxẽ ga yema duü̃xü̃gü ga Moichépe̱xewa yexmagüxü̃ rü ñanagürü: —¡Ngĩxã tóxrüxü̃ tayaxĩxẽxẽ i ngẽma naane, erü yixema rü tüxü̃́ natauxcha nax tóxrüxü̃ yaxĩxẽẽxü̃! —ñanagürü.
31Natürü ga yema togü ga namücügü rü nanangãxü̃gü rü ñanagürügü nüxü̃: —Tama nixĩ i namexü̃ nax namaxã yigü ida̱i̱xü̃ i ngẽma duü̃xü̃gü, erü nüma rü tá tüxü̃ narüporamaegü —ñanagürügü.
32Rü yexguma ga yema togü ga Caréxmücügü rü yema Iraétanüxü̃maxã nüxü̃ nixugüe nax nachixexü̃ ga yema naane rü ñanagürügü: —Rü ngẽma nachixü̃ane i nawa ngugütaewa ne taxĩxü̃ rü tama mexü̃ nixĩ. Rü ngẽma naane ga tayangugüxü̃ rü nachu̱xu rü ngẽmagagu muxü̃ma i ngẽma naanegu ãchiü̃güxü̃ i duü̃xü̃gü rü nayue. Rü ñu̱xũchi guxü̃ma ga yatüxü̃gü ga yéma nüxü̃ tadauxü̃ rü nitaxüchi.
33Rü nüxü̃ tadaugü ga Anáxtanüxü̃ ga itaxüchixü̃ rü máchanexü̃chixü̃. Rü yemaca̱x ga toma ga naxü̃tawa nax togü tadaugüxü̃ rü tanamunügüraxü̃mare. Rü nümagü rü ta yemaacütama toxü̃ nadaugü —ñanagürügü.
Currently Selected:
Iraétanüxü̃arü muxchiga 13: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
