Ore i mexü̃ ga Matéu ümatüxü̃ 20

Ore ga puracütanüxü̃gu ixuxü̃

1Rü ngẽma Tupana ãẽ̱xgacü ixĩxü̃wa rü nanangẽxgumaraxü̃ ga wüxi ga úbanecüarü yora ga pa̱xmama puracütanüxü̃ca̱x yadaucü nax norü úbanecüwa napuracüexü̃ca̱x.

2Rü yema puracütanüxü̃maxã nanamexẽxẽ nax wüxitachinü ga diẽru tá nüxü̃́ nax naxütanüãxü̃ ga wüxichigü ga ngunexü̃. Rü ñu̱xũchi norü úbanecüwa nanamugü nax yéma yapuracüexü̃ca̱x.

3Rü yixcama ga 9 arü oragu rü wenaxarü plazawa ínayadau. Rü yexma nüxü̃ nayangau ga ñuxre ga yatügü ga ngearü puracüxã́xü̃.

4Rü ñanagürü nüxü̃: “¡Ngéma chorü úbanecüwa peyapuracüe! Rü mea tá pexü̃́ chanaxütanü”, ñanagürü. Rü nümagü rü yéma naxĩ.

5Rü yema úbanecüarü yora rü tocuchigu rü wenaxarü togü ga puracütanüxü̃ca̱x nayadau. Rü 3 arü oragu ga yáuanecü rü wenaxarü ta nayadau.

6Rü yixcama ga 5 arü oragu ga yáuanecü rü wenaxarü plazawa ínayadau. Rü yexma nüxü̃ nayangau ga ñuxre ga yatügü ga ngearü puracüã́xü̃. Rü ñanagürü nüxü̃: “¿Tü̱xcüü̃ i pema rü nuxã perüchomare i guxü̃ i ñoma i ngunexü̃gu, rü tama pepuracüe?” ñanagürü.

7Rü nümagü nanangãxü̃gü, rü ñanagürügü nüxü̃: “Tama tapuracüe erü taxúema toxca̱x tadau nax tüxü̃́ tapuracüexü̃ca̱x”, ñanagürügü. Rü yexguma ga yema úbanecüarü yora rü ñanagürü nüxü̃: “¡Pema rü ta ngéma chorü úbanecüwa pexĩ rü peyapuracüe! Rü mea tá pexü̃́ chanaxütanü”, ñanagürü.

8Rü yexguma marü nachütagu rü yema úbanecüarü yora, rü naxca̱x naca ga norü puracütanüxü̃arü dauruxü̃, rü ñanagürü nüxü̃: “¡Naxca̱x naca i ngẽma puracütanüxü̃. Rü nüxíra nüxü̃́ naxütanü i ngẽma wixwena ngéma ĩxü̃, rü nawa tá icuyacua̱xẽxẽ i ngẽma nüxíra ngéma puracüexü̃!” ñanagürü.

9Rü yéma naxĩ ga yema puracütanüxü̃ ga 5 arü oragu ga yáuanecü inaxügüexü̃ nax napuracüexü̃. Rü wüxichigü ngĩxü̃ nayauxgü ga wüxitachinü ga diẽru.

10Rü yemawena rü yéma naxĩ ga yema puracütanüxü̃ ga nüxíra puracüexü̃. Rü nümagü nagu naxĩnüegu rü yexera tá ngĩxü̃ nayauxgü ga diẽru, natürü nümagü rü ta ngĩxü̃ nayauxgü ga wüxitachinü ga diẽru ga wüxichigü.

11Rü yexguma ngĩxü̃ nayauxgügu, rü inanaxügüe ga chixri nax yadexagüxü̃ nachiga ga yema úbanecüarü yora.

12Rü nügümaxã ñanagürügü: “Yixema rü guxü̃ i ngunexü̃gu üa̱xcüxetüwa tapuracüe, natürü i ñaa puracütanüxü̃ i wixwena íngugüxü̃ rü wüxi i oratama napuracüe. Natürü ngẽma tüxü̃́ naxütanüxü̃e̱xpü̱xtama nüxü̃́ nanaxütanü”, ñanagürügü.

13Natürü ga yema úbanecüarü yora rü wüxi ga yema puracütanüxü̃xü̃ nangãxü̃, rü ñanagürü nüxü̃: “Pa Chomücüx, tama cuxü̃́ changĩ̱x. ¿Tama ẽ̱xna i wüxitachinügu yixĩxü̃ ga chomaxã cunamexẽẽxü̃ nax cuxü̃́ chanaxütanüxü̃ i ngẽma puracü?

14¡Ñaa nixĩ i curü diẽru, rü íxũ! Natürü ngẽma puracütanüxü̃ i wüxi i oratama puracüexü̃, rü choma nüxna ngĩxü̃ chaxãxchaü̃ i ngẽma cuxna ngĩxü̃ chaxãcüe̱xpü̱x.

15¿Tama ẽ̱xna name i ngẽma choma chanaxwa̱xexü̃ãcü ngĩmaxã nax chaxüxü̃ i chorü diẽru? ¿Rü ẽ̱xna quixãũxãchi erü ngẽmaãcü chamecüma?” ñanagürü.

16Rü yíxema ñu̱xma duü̃xü̃gü wixweama tüxü̃ ügüxexẽ́xẽ, rü daxũguxü̃ i naanewa rü Tupana tá wixpe̱xewa tüxü̃ naxǘgüxẽxẽ. Rü yíxema ñu̱xma duü̃xü̃gü wixpe̱xewa tüxü̃ ügüxexẽ́xẽ rü daxũguxü̃ i naanewa rü Tupana tá wixweama tüxü̃ naxǘgüxẽxẽ. Erü Tupana rü muxũchiena naxu, natürü noxretama tixĩ ya yíxema tüxü̃ nadexe —ñanagürü ga Ngechuchu.

Ngechuchu rü wenaxarü nanaxunagü ga norü yuxchiga

(Mr. 10.32-34; Lc. 18.31-34)

17Rü yexguma namagu yaxũxgu ga Ngechuchu ga Yerucharéü̃wa nax naxũxü̃ rü nüxrüwama naxca̱x naca ga yema 12 ga norü ngúexü̃gü, rü ñanagürü nüxü̃:

18—Pema nüxü̃ pecua̱x nax marü yangaicaxü̃ nax Yerucharéü̃wa ingugüxü̃. Rü ngéma rü tá chacherdótegüarü ãẽ̱xgacügüna rü ngúexẽẽruü̃gü i mugüwa ngu̱xẽẽtaegüxü̃na nanamugü ya yimá Tupana Nane ya duü̃xü̃xü̃ ixĩcü. Rü nümagü rü tá chomaxã nanaxuegugü nax chayuxü̃ca̱x.

19Rü tá to i nachixü̃anecüã̱xna nanamugü. Rü tá nüxü̃ nacugüe rü nanacua̱i̱xgü rü ñu̱xũchi tá curuchawa nayapotagü nax ngẽxma nayuxü̃ca̱x. Natürü tomaepü̱x i ngunexü̃guwena rü tá wenaxarü namaxü̃ —ñanagürü.

Wüxi ga ngü̃xẽẽca̱x íica ga Chantiáguarü rü Cuáü̃arü mama

(Mr. 10.35-40)

20Rü yéma iyexma ga naé ga Chantiágu rü Cuáü̃ ga Chebedéu nanegü. Rü ngĩma rü Ngechuchuca̱x iyaxũ namaxã ga yema taxre ga ngĩnegü. Rü Ngechuchupe̱xegu iyacaxã́pü̱xü, rü wüxi ga ngü̃xẽẽca̱x nüxna iyaca.

21Rü nüma ga Ngechuchu rü ngĩxna naca, rü ñanagürü: —¿Ta̱xacü nixĩ i cunaxwa̱xexü̃? —ñanagürü. Rü ngĩma inangãxü̃ rü ngĩgürügü: —Pa Corix, ngẽxguma ãẽ̱xgacüxü̃ quingucuchigu rü chanaxwa̱xe i cunamu nax wüxi i ñaa chaune rü curü tügünecüwawa nax natoxü̃, rü ngẽma to i curü to̱xwecüwawa nax natoxü̃ —ngĩgürügü.

22Natürü Ngechuchu ngĩxü̃ nangãxü̃ rü ñanagürü: —Pema rü tama nüxü̃ pecua̱x nax ta̱xacüca̱x ípecaxü̃. ¿Namaxã chi peporaexü̃ i ngẽma ngúxü̃ i tá chingexü̃? —ñanagürü. Rü nümagü nanangãxü̃gü rü ñanagürügü: —Ngẽmáacü namaxã tá taporae —ñanagürügü.

23Rü Ngechuchu nanangãxü̃ rü ñanagürü nüxü̃: —Aixcüma tá nixĩ i chauxrüxü̃ ngúxü̃ pingegüxü̃. Natürü ngẽma chorü tügünecüwawa rü chorü to̱xwecüwawa nax perütogüxü̃ca̱x, rü tama cho̱xme̱xwa nangẽxma nax pexna chanaxãxü̃. Rü Chaunatüme̱xẽwa nixĩ nax nangẽxmaxü̃ i ngẽma, rü nüma tá tüxna nanaxã ya yíxema tümaca̱x íyixĩxẽ —ñanagürü.

24Rü yexguma yemaxü̃ naxĩnüegu ga yema togü ga 10 ga Ngechuchuarü ngúexü̃gü, rü Chantiágumaxã rü Cuáü̃maxã nanue.

25Natürü Ngechuchu naxca̱x naca rü ñanagürü nüxü̃: —Pema nüxü̃ pecua̱x rü ngẽma nachixü̃anegüarü ãẽ̱xgacügü rü tama nüxü̃ nangechaxü̃ãcüma namaxã inacua̱x i norü duü̃xü̃gü. Rü ngẽma duü̃xü̃gü i pora nüxü̃́ ngẽxmagüxü̃ rü duü̃xü̃güétüwa nügü naxügüxẽxẽ.

26Natürü taxũtáma ngẽmaãcü nixĩ i petanüwa. Rü ngẽxguma texé i petanüwa naxwa̱xegu nax togüétüwa tangexmaxü̃, rü name nax guxãarü ngü̃xẽẽruxü̃ tixĩxü̃.

27Rü ngẽxguma texé i petanüwa naxwa̱xegu nax tümamücügüétüwa tangexmaxü̃, rü name nixĩ i tümamücügüarü mugüruxü̃ tixĩ.

28Yerü Tupana Nane ya duü̃xü̃xü̃ ixĩcü rü tama nüxü̃ nangü̃xẽẽgüxü̃ca̱x núma naxũ. Natürü núma naxũ nax duü̃xü̃güxü̃ yanangü̃xẽẽxü̃ca̱x rü naxca̱x inaxããxü̃ca̱x i norü maxü̃, nax ngẽmaãcü muxü̃ma i duü̃xü̃güarü maxü̃ naxütanüxü̃ca̱x —ñanagürü.

Ngechuchu nanameexẽxẽ ga taxre ga ngexetügüxü̃

(Mr. 10.46-52; Lc. 18.35-43)

29Rü yexguma Ngechuchu norü ngúexü̃gümaxã Yericúarü ĩanewa íchoxü̃gu, rü muxü̃ma ga duü̃xü̃gü nawe narüxĩ.

30Rü yéma namacüwawa narütogü ga taxre ga ingexetüxü̃. Rü yexguma nüxü̃ naxĩnüegu nax Ngechuchu yéma üpetüxü̃, rü tagaãcü Ngechuchuna nacagüe, rü ñanagürügü: —Pa Corix, Pa Dabítanüxü̃x, ¡Cuxü̃́ tangechaü̃tümüxü̃gü! —ñanagürügü.

31Rü yema duü̃xü̃gü ga Ngechuchuwe rüxĩxü̃ rü nayangagü nax iyanangea̱xgüxü̃ca̱x. Natürü nümagü ga yema ingexetüxü̃ rü yexeraãcü Ngechuchuna nacagüe, rü ñanagürügü: —Pa Corix, Pa Dabítanüxü̃x, ¡cuxü̃́ tangechaü̃tümüxü̃gü! —ñanagürügü.

32Rü yexguma ga Ngechuchu rü yéma nayachaxãchi rü naxca̱x naca ga yema ingexetüxü̃. Rü nüxna naca rü ñanagürü: —¿Ta̱xacü penaxwa̱xe nax pexca̱x chaxüxü̃? —ñanagürü.

33Rü nümagü nanangãxü̃gü rü ñanagürügü: —Pa Corix, tanaxwa̱xe nax toxü̃ quidauchigüxẽẽxü̃ —ñanagürügü.

34Rü yexguma ga Ngechuchu rü nüxü̃́ nangechaü̃tümüxü̃gü, rü naxetügügu ningõgü. Rü yexgumatama nidauchigü, rü Ngechuchuwe narüxĩ.

Currently Selected:

Ore i mexü̃ ga Matéu ümatüxü̃ 20: tcaP

Highlight

Compare

Copy