Lebítanüxü̃arü puracüchiga 19
19
Togü i mugüchiga
1Nüma ga Cori ya Tupana rü Moichémaxã nidexa, rü ñanagürü nüxü̃:
2—¡Rü Iraétanüxü̃ i duü̃xü̃gümaxã nüxü̃ ixu i ñaa ore!: “Rü name nax pixüünegüxü̃ i pemax, erü choma ya perü Cori ya Tupana rü chaxüüne.
3Rü wüxíechigü i pema rü name i penatüxü̃ rü peéxü̃ pengechaü̃. Rü ñu̱xũchi name i mea penaxaure i chorü ngü̃chigaarü ngunexü̃. Erü choma nixĩ i perü Cori ya Tupana chixĩxü̃.
4¡Rü taxṹ i naxchicüna̱xãgüxü̃ picua̱xüü̃güxü̃! ¡Rü taxṹ i bróũchenaxca̱x i tupanachicüna̱xãgü pegüca̱x pexüxü̃! Erü choma nixĩ i perü Cori ya Tupana chixĩxü̃.
5Rü ngẽxguma Cori ya Tupanaca̱x ãmare piguxgu norü ngüxmüxẽẽruxü̃, rü ngẽma Cori ya Tupana naxwa̱xexü̃acü tá penaxü nax nüma namaxã nataãẽxü̃ca̱x.
6Rü ngẽma naeü̃ i ãmare i choxna pexãxü̃ rü name nax ngẽmatama ngunexü̃gu penangṍxü̃. Rü ñu̱xũchi marü name nax moxü̃ãcü rü ta penagṍxü̃. Natürü ngẽma norü tomaepü̱x i ngunexü̃gu íyaxüxü̃ rü tá peyagu.
7Natürü ngẽxguma norü tomaepü̱x i ngunexü̃gu penangõ̱xgu, rü Tupana rü tá pewa nüxü̃ naxo i ngẽma ãmare, rü taxũtáma pexü̃́ nanayaxu.
8Rü yíxema nangṍxẽ rü tá nitümaguãchi i ngẽma chixexü̃, rü ngẽmagagu tá tüxü̃ ípeta̱xüchi i petanüwa, erü nagu tayanachixexẽxẽ i ngẽma Cori ya Tupanaarü ãmare.
9Rü ngẽxguma perü nanetügüarü buxgüwa nagu̱xgu, rü tama name nax guxü̃ma cubuxuxü̃ i ngẽma cuanewa ngẽxmaxü̃. ¡Rü taxṹ i guxü̃nema ya trigu ya ngéma yaxügüne cudexü̃!
10¡Rü taxṹ i guxü̃ma i úbagü cubuxuxü̃ i ngẽma curü úbanecüwa! Rü tama name nax cunadexü̃ i ngẽma úbagü i rüyixü̃. ¡Ẽcü yíxema ngearü diẽruã̱xgüxeca̱x rü ñu̱xũchi yíxema to i nachixü̃anecüã̱xgüca̱x ngéma yaxüxẽxẽ! Erü choma nixĩ i perü Cori ya Tupana chixĩxü̃.
11¡Rü taxṹ i pengĩ́xü̃! ¡Rü taxṹ i pidoraexü̃! ¡Rü taxṹ i pegü pewomüxẽxẽgüxü̃!
12¡Rü taxũtáma chauégagu natüca̱xma texémaxã icuxuneta! Erü ngẽxguma ngẽmaãcü cunaxü̱xgu rü cunachixexẽxẽ i naéga ya curü Tupana. Rü choma nixĩ ya Iraétanüxü̃arü Cori ya Tupana.
13¡Rü taxṹ i cumücüxü̃ cuxãxũnexü̃ rü taxṹ i nüxna cunapuxü̃ i norü ngẽmaxü̃gü! ¡Rü taxṹ i curü puracütanüxü̃na cunachu̱xuxü̃ i norü diẽru nax moxü̃ãcüama nüxü̃́ cunaxütanüxü̃ca̱x!
14¡Rü taxṹ i chixexü̃ namaxã cuxueguxü̃ i ngẽma ngauxchiẽ̱xü̃! ¡Rü taxṹ i tüxü̃ quitoxyepe̱xexü̃ ya yíxema ngexetüxe! ¡Ẽcü Tupanaxü̃ nawe̱x nax nüxü̃ cungechaxü̃xü̃! Rü choma nixĩ ya Cori ya Tupana.
15Rü cumax, Pa Ãẽ̱xgacüx, ¡rü ngẽxguma poxcu cuxuegu̱xgu rü taxũtáma chixri cunaxü i ngẽma! ¡Rü taxũtáma naétüwa cuxü i ngẽma ngearü diẽruã́xü̃ ega aixcüma chixexü̃ naxü̱xgu! ¡Rü taxũtáma naga cuxĩnü i ngẽma diẽruã́xü̃! Rü cumax, Pa Ãẽ̱xgacüx, rü ngẽxguma poxcu cuxuegu rü name i ngẽma aixcüma guxchaxü̃ üxü̃maxã cunaxuegu i poxcu.
16¡Rü taxũtáma oregümaxã curü ĩanegü cunaxũane! Rü taxũtáma cumücüchiga doraxü̃ quixu nax ngẽmaãcü ãũcümaxü̃wa cunangexmaxẽẽxü̃ca̱x. Rü choma nixĩ ya Cori ya Tupana.
17¡Rü taxṹ i naxchi cuxaiechaxü̃ i cuenexẽ! ¡Rü naxuxcu̱xẽ i cumücü i ngẽxguma chixexü̃ naxü̱xgu rü taxṹ i norü chixexü̃gu cuxãxü̃!
18Rü tama name nax namaxã cunuxwa̱xexü̃ i cutanüxü̃ rü bai nax naxchi cuxaixü̃. ¡Rü cumücüxü̃ nangechaü̃, ñoma cugütama cungechaü̃xü̃rüxü̃! Rü choma nixĩ ya Cori ya Tupana.
19¡Ẽcü aixcüma nagu namaxü̃ i ngẽma chorü mugü! ¡Rü taxũtáma natoraxü̃xü̃ i naeü̃güxü̃ cunaxüxacüxẽxẽ i ngẽma cuxü̃nagü! ¡Rü taxũtáma naguxü̃raxü̃ne i naxchiremaxã cunato i ngẽma cuane! ¡Rü taxũtáma nagu quicu̱x i ngẽma naxchiru i naguxü̃raxü̃ne i tüwa üxü̃!
20Rü ngẽxguma wüxi i yatü ngĩmaxã ipexgu i wüxi i ngexe i mugüruxü̃ ixĩcü rü ngĩma rü wüxi ya yatümaxã ãtechaü̃gu, rü ngĩrü cori tama ngĩmaxã nataxegu rü tama ngĩxü̃ ínanguxuchixẽẽgu, rü ngẽma yatü i ngĩmaxã ipexü̃ rü ngĩma i ngẽma nge rü tá nicua̱i̱xgü. Natürü taũtáma yu ngẽma taxremaxã naxuegu erü ngĩma rü taxũta nüxna íinguxuchi i ngĩrü cori.
21Rü ngẽma yatü rü tá choxna nanamu i wüxi i carnéru i iyatüxü̃ nax norü pecaduarü ütanüruxü̃ yamáaxü̃ca̱x. Rü chopataarü ĩã̱xwa tá nanaga.
22Rü nüma ya chacherdóte rü tá cha̱u̱xca̱x nayama̱x i ngẽma carnéru i ngẽma yatü norü pecaduca̱x choxna muxü̃. Rü ngẽma chacherdóte tá choxna naxca̱x naca nax ngẽma yatüaxü̃́ nüxü̃ icharüngümaxü̃ca̱x i norü chixexü̃. Rü ñu̱xũchi i choma rü tá nüxü̃́ nüxü̃ charüngüma i ngẽma chixexü̃ i naxüxü̃.
23Rü ngẽxguma tá nagu pechocugu i ngẽma naane i tá pexna chaxãxü̃, rü ngẽxma penatogü i nanetügü i ori̱x, rü tomaepü̱x ya taunecü rü taxũtáma pengõ̱x i norü o.
24Rü yimá norü ãgümücü ya taunecügu rü tá penaxüchiga i ngẽma norü o. Rü guxü̃táma Cori ya Tupanana tá penana.
25Rü yimá norü wüxime̱e̱xpü̱x ya taunecügu tá nixĩ i marü namexü̃ nax penangṍxü̃ i ngẽma norü o. Rü ngẽmaãcü i ngẽma nanetü rü yexeraxacü tá namu i norü o. Erü choma nixĩ i perü Cori ya Tupana chixĩxü̃.
26¡Rü taxũtáma penangõ̱x i namachi i ãgüxü̃. ¡Rü taxũtáma yuüca̱x pengúe, rü taxũtáma naxca̱x pengúe i ngẽma ẽxü̃guxü̃ i yixcüra tá ngupetüxü̃!
27¡Rü taxũtáma boãcü pegü piyoeru, rü bai tá pegü ípeyoepe̱xechinagugü!
28¡Rü ngẽxguma nayu̱xgu i wüxi i petanüxü̃, rü taxũtáma perü ngechaü̃maxã pegü pewixtüxü̃ne! ¡Rü taxũtáma pegü pexümatüxü̃negü! Rü choma nixĩ ya Cori ya Tupana.
29¡Rü taxũtáma cuxacüxü̃ cuxucu̱xẽ nax naxü̃nemaxã nataxexü̃ca̱x! Rü taxü̃ i ngẽmaãcü chixexü̃maxã cuyapaxẽẽxü̃ i cuchixü̃ane.
Togü i mugü
30¡Rü penaxaure i chorü ngü̃xchigaarü ngunexü̃gü! ¡Rü mea nüxna pedau rü nüxü̃ pengechaü̃ ya yima chopata! Rü choma nixĩ ya Cori ya Tupana.
31¡Taxũtáma nüxna peyaca i ngẽma naãẽgü i yuuxü̃ namaxã puracüexü̃! ¡Rü taxũtáma nüxna peyaca i ngẽma nüxü̃ icuáxü̃ i ngẽma ẽxü̃guxü̃ i yixcüra tá ngupetüxü̃! ¡Rü taxũtáma ngẽmaãcü pegü pixãũãchixẽxẽ! Rü choma nixĩ i perü Cori ya Tupana chixĩxü̃.
32¡Rü ngẽxguma yaxegüpe̱xewa cungexmagu rü inachi rü inawe̱x nax nüxü̃ cungechaxü̃xü̃! ¡Rü inawe̱x nax nüxü̃ cungechaxü̃xü̃ ya curü Tupana! Rü choma nixĩ i Cori ya Tupana.
33¡Rü taxṹ i ngúxü̃ nüxü̃ pingexẽxẽxü̃ i ngẽma to i nachixü̃anecüã̱x i petanügu ãpataxü̃!
34Rü ngẽma to i nachixü̃anecüã̱x rü mea namaxã ipecua̱x! ¡Rü nüxü̃ pengechaü̃, erü nüma rü wüxi i petanüxü̃rüü̃tama nixĩ! ¡Rü taxṹ i nüxü̃ perüngü̃ma nax pema rü ta rü to i nachixü̃anecüã̱xgü pixĩgüxü̃ ga Equítuanewa! Rü choma nixĩ i perü Cori ya Tupana chixĩxü̃.
35¡Rü taxũtáma pengĩ̱x i ngẽma naanearü nguruü̃wa, rü ngẽma ngẽmaxü̃güarü yáruü̃wa, rü ngẽma ãchiü̃xü̃arü nguruü̃wa!
36Rü name nax ngẽma curü yáruxü̃ rü ngẽma curü ngugüruxü̃ rü aixcümama namexü̃. Rü choma nixĩ ya perü Cori ya Tupana ga Equítuanewa pexü̃ íchanguxü̃xẽẽxü̃.
37Rü ngẽmaca̱x chanaxwa̱xe nax aixcüma nagu pemaxẽxü̃ i ngẽma chorü mugü rü chorü ucu̱xẽgü. Rü name nax aixcüma peyanguxẽẽxü̃. Rü choma nixĩ ya Cori ya Tupana” —ñanagürü.
Currently Selected:
Lebítanüxü̃arü puracüchiga 19: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
