Ínachoxü̃xü̃chiga 34

Ngexwaca̱xü̃xü̃ i nutatachinügü i Tupanaarü mugü nagu ümatüxü̃

(Dt. 10.1-5)

1Rü nüma ga Cori ya Tupana rü Moichéxü̃ ñanagürü: —¡Ẽcü, cumatama naxü i taxre i nutatachinügü i ngẽma nanoxriraxü̃xü̃tama, nax ngẽmagu chanaxümatüxü̃ca̱x i ngẽma chorü mugü ga yema quipuexẽẽxü̃ ga nutatachinügügu chaxümatüxü̃!

2¡Rü ngẽxgumarüxü̃ ta cugü namexẽxẽ nax moxü̃ pa̱xmama dauxü̃ cuxĩxü̃ca̱x nawa ya daa ma̱xpǘne ya Chinaí! ¡Rü ngẽma yexeraãcü ínachuchitaeruxü̃wa naxũ nax ngéma chope̱xewa cungexmaxü̃ca̱x!

3¡Rü taxúetama cuwe dauxü̃ taxĩ! Rü tama chanaxwa̱xe nax texé nüxna ngaicamaxü̃ ya daa ma̱xpǘne, rü woo carnérugü, rü woo wocagü rü tama chanaxwa̱xe nax norü ngaicamana maxẽ nangõ̱xgüãxü̃ —ñanagürü ga Tupana.

4Rü nüma ga Moiché rü nanaxü ga yema taxre ga nutatachinügü ga yema nanüxíraxü̃xü̃güraxü̃xü̃tama. Rü moxü̃ãcü pa̱xmama rü nanade ga yema taxre ga nutatachinügü rü namaxã dauxü̃ naxĩ nawa ga guma ma̱xpǘne ga Chinaí, yema Cori ya Tupana namaxã nüxü̃ ixuxü̃ãcü.

5Rü nüma ga Cori ya Tupana rü wüxi ga caixanexü̃gu ínarüxĩ rü Moichémaxã yéma nayexma, rü nüxü̃ nixu ga naéga.

6Rü Moichépe̱xewa naxüpetü rü tagaãcü ñanagürü: —Chomax rü Cori chixĩ. Chomax rü Cori chixĩ. Rü choma nixĩ ya Tupana ya mecümacü rü ngechaü̃wa̱xecü, rü yáxna ĩnüwa̱xecü, rü aixcüma ngechaü̃cü choxü̃́ ngẽxmacü rü aixcümaxü̃ ixucü chixĩ i chomax.

7Rü choma rü guxü̃guma tüxü̃ changechaü̃ rü tüxü̃́ nüxü̃ ichayarüngüma ya tümaarü pecadu rü tümaarü chixexü̃ ya yíxema aixcüma chauga ĩnüexe. Natürü taxũtáma tüxü̃ chaxüpetümare ya yíxema chixexü̃ üxe. Rü tá tüxü̃ chapoxcu ñu̱xmata tümanegüwa rü tümataagüwa —ñanagürü.

8Rü yemaca̱x ga Moiché rü yexgumatama yexma ñaxtüanegu nanangücuchi rü Tupanaxü̃ nicua̱xüxü̃.

9Rü ñanagürü: —¡Pa Corix, Pa Corix, rü ngẽxguma aixcüma yixĩxgu nax chomaxã cutaãẽxü̃ rü ẽcü toxü̃ íixümücü! Rü aixcüma nixĩ i tama inaxĩnüechaxü̃xü̃ i ñaa duü̃xü̃gü. ¡Natürü toxü̃́ nüxü̃ irüngüma i torü pecadugü rü chixexü̃gü, rü toxü̃ nade nax curü duü̃xü̃gü tixĩgüxü̃ca̱x! —ñanagürü.

Tupana rü wenaxarü duü̃xü̃gümaxã inaxuneta

(Dt. 7.1-5)

10Rü Tupana rü Moichéxü̃ ñanagürü: —¡Choxü̃́ irüxĩnü! Rü guxü̃ma i curü duü̃xü̃güpe̱xewa tá chanaxü i wüxi i uneta rü tá pexü̃ charüngü̃xẽxẽxü̃. Rü tá chanaxü i mexü̃gü i taguma togü i nachixü̃ane i ñoma i naanewa ngẽxmagüxü̃wa chaxüxü̃. Rü guxü̃ma i curü duü̃xü̃gü i Iraétanüxü̃ tá nüxü̃ nadaugü i ngẽma mexü̃ i tá pemaxã chaxüxü̃ i choma ya Cori ya Tupana.

11Rü ngẽxguma tá naga pexĩnüegu i ngẽma ñu̱xma pexü̃ chamuxü̃, rü tá pepe̱xewa íchanawoxü̃ i ngẽma Amoréutanüxü̃ rü Canaáü̃tanüxü̃, rü Itítanüxü̃, rü Ferechéutanüxü̃, rü Ebéutanüxü̃, rü Yebuchéutanüxü̃ nax norü naanegü pexna chaxãxü̃ca̱x.

12Rü ngẽma naanegü i nagu tá pichocuxü̃arü duü̃xü̃gü i ngéma maxẽxü̃ rü tama name i ta̱xacürü uneta namaxã pexü nax tama nacümagü i chixexü̃gu peyixü̃ca̱x.

13Rü chanaxwa̱xe nax nagu nüxü̃́ pepogüexü̃ i ngẽma norü ãmarearü guruü̃gü rü noxtacüma peyanaxoxẽẽxü̃ i ngẽma norü nutagü rü naigü i namaxã natupanaã̱xgüxü̃.

14Rü tama chanaxwa̱xe i ta̱xacürü tupananetaxü̃mare picua̱xüü̃gü erü choma ya pexrü Cori ya Tupana rü inuxwa̱xecü chixĩ rü ngẽmatama nixĩ i chauéga.

15Rü tama name i ta̱xacürü uneta namaxã pexü i ngẽma duü̃xü̃gü i ngẽma naanewa maxẽxü̃. Erü ngẽxguma ngẽma duü̃xü̃gü norü ngúchaü̃ inaxügügu nape̱xewa i norü tupanagü rü ãmaregü nüxna naxãgügu, rü tá pexna naxu nax penaxümücügüxü̃ca̱x i ngẽxguma nangõ̱xgüãgu i ngẽma õna i norü tupanagüxü̃ namaxã yacua̱xüü̃güxü̃.

16Rü ngẽxgumarüxü̃ ta i ngẽxguma ngẽma penegü rü naxacügümaxã yaxãxma̱xgu rü ngẽma naxma̱xgü norü ngúchaü̃ inaxügügu nape̱xewa i norü tupanagü rü tá nanamu i penegü nax nümagü rü ta naxrüxü̃ naxügüã̱xü̃ca̱x nax ngẽmaãcü norü tupanaxü̃ yacua̱xüü̃güxü̃.

17Rü tama name i pegüca̱x penaxü i ta̱xacürü naxchicüna̱xã i úirunaxca̱x rüe̱xna diẽrumünaxca̱x nax ngẽmaxü̃ picua̱xüü̃güxü̃ca̱x —ñanagürü ga Tupana.

Wüxichigü ya taunecüarü petagü

(Éx. 23.14-19; Dt. 16.1-17)

18Rü Moichéxü̃ ñanagürü ga Tupana: —¡Rü penaxüchiga i ngẽma paũ i ngearü pu̱xẽxẽruxü̃ã́xü̃! Rü 7 i ngunexü̃ tá nixĩ i penangṍxü̃ i ngẽma paũ i ngearü pu̱xẽẽruü̃ã́xü̃, ngẽma pexü̃ chamuxü̃ãcü. Rü yimá tauemacü ya nagu tá penaxüchigaxü̃ i ngẽma petachiga rü Abíarü tauemacügu tá nixĩ, yerü gumá tauemacügu nixĩ ga Equítuarü naanewa ípechoxü̃xü̃.

19Rü guxü̃ma i ngẽma penegü i nüxíraxü̃güxü̃ rü tá choxna penamugü. Rü ngẽxgumarüxü̃ ta ega nayatüxgu i ngẽma nüxíraxü̃xü̃ i naxacü i ngẽma perü wocagü, rü perü carnérugü, rü perü cabragü rü tá choxna penamugü.

20Natürü ngẽxguma wüxi i búru rü nayatügu i ngẽma nüxíraxü̃xü̃ i naxacü rü tá wüxi i carnéruxacü rüe̱xna wüxi i cabraxacü nachicüü choxna pemu. Natürü ngẽxguma tama ngẽma búruchicüxü choxna penamuxchaü̃gu i wüxi i carnéruxacü rüe̱xna wüxi i cabraxacü rü name i noxtacüma peyabüyenaxã rü peyama̱x i ngẽma búruxacü. Rü ngẽxgumarüxü̃ ta nachicüü ya yima nüxíraü̃cü ya pene rü tá choxna penamu i wüxi i ãmare. Rü taxucürüwa texé chope̱xewa tangu ega tama tümaarü ãmare cha̱u̱xca̱x ngéma tagaxgu.

21Rü 6 i ngunexü̃ tá nixĩ i pepuracüexü̃, natürü ngẽma norü 7 i ngunexü̃gu rü tá iperüngügü. Rü woo ngẽxguma nanetügüarü oarü buxchigawa nanguxgu rüe̱xna toechigawa nanguxgu rü tá perüngü̃gü.

22¡Rü penaxüchiga i Yüxügüarü Peta i nagu peyabugüxü̃ i ngẽma nüxíraxü̃xü̃ i norü o i penetü i peanegu petoxü̃ rü ñu̱xũchi taunecüarü gu̱xgu peyabugü i ngẽma nawa iyacuáxü̃ i norü o!

23Rü choma ya Iraétanüxü̃arü Tupana nax chixĩxü̃ rü chanaxwa̱xe i wüxichigü ya taunecügu tomaepü̱xcüna cha̱u̱xca̱x naxĩ i guxü̃ma i yatügü.

24Rü choma rü tá íchanawoxü̃ i ngẽma togü i nachixü̃anegücüã̱x nax ngẽmaãcü nataxü̃ca̱x i ngẽma perü naane. Rü ngẽmaãcü i ngẽxguma chope̱xewa pexĩxgu, rü choxü̃ picua̱xüü̃gügu rü taxúetama pexna tanapu i ngẽma perü naane.

25Rü ngẽxguma naxü̃nagü cha̱u̱xca̱x peda̱i̱xgu rü ípenaguxgu, rü tama chanaxwa̱xe ya yimá nagü rü paũ i pu̱xẽẽruxü̃ã́xü̃maxã wüxigu choxna cunaxã. Rü ngẽxgumarüxü̃ ta tama name i to i ngunexü̃ca̱x ípeyaxüxẽxẽ i ngẽma naxü̃namachi i Üpetüchigaca̱x daixü̃.

26Rü ngẽma nüxíraxü̃xü̃ i norü o i ngẽma penetügüwa pibuxgüxü̃, rü name nixĩ i chopatawa penana i ngẽma rümemaegüxü̃. ¡Rü taxũtáma naégünenixü̃wa penamuxra i ngẽma cabraxacügü! —ñanagürü ga Tupana.

Moiché rü nutatachinügu nanaxümatü ga Tupanaarü mugü

27Rü Tupana rü Moichéxü̃ ñanagürü: —¡Naxümatü i ñaa oregü! Erü ngẽmawa nixĩ i nüxü̃ yaxuxü̃ i ngẽma uneta i cumaxã rü Iraétanüxü̃maxã chaxüxü̃ —ñanagürü ga Tupana.

28Rü nüma ga Moiché rü 40 ga ngunexü̃ rü 40 ga chütaxü̃ Cori ya Tupanamaxã nayexma ga guma ma̱xpǘnewa. Rü taguma nachibü rü taguma naxaxe. Rü yéma nixĩ ga Moiché nutatachinügu naxümatüxü̃ ga yema Tupanaarü uneta. Rü yema nixĩ ga yema 10 ga norü mugü.

29Rü yemawena ga Moiché rü guma ma̱xpǘne ga Chinaíwa ínarüxĩ namaxã ga yema taxre ga nutatachinügü ga Tupanaarü mugü nagu ümatüxü̃. Natürü yexguma inaxĩxgu, rü tama nügü nacua̱x ga nax bexma yaya̱xaurachametücüüxü̃ yerü Tupanamaxã nidexa.

30Rü yexguma ga Aróü̃ rü guxü̃ma ga Iraétanüxü̃ nüxü̃ daugügu ga Moiché ga nax yaya̱xaurachametücüüxü̃, rü namuü̃e, rü tama nüxna nangaicamagüchaü̃.

31Natürü nüma ga Moiché rü naxca̱x naca. Rü nüma ga Aróü̃ rü guxü̃ma ga yema duü̃xü̃güarü ãẽ̱xgacügü rü Moichéca̱x naxĩ. Rü nüma rü namaxã nidexa.

32Rü yemawena rü guxü̃ma ga Iraétanüxü̃ rü Moichéca̱x naxĩ. Rü nüma ga Moiché rü namaxã nüxü̃ nixu ga yema mugü ga Cori ya Tupana namaxã nüxü̃ ixuxü̃ ga ma̱xpǘne ga Chinaíwa.

33Rü yexguma marü nüxü̃ nachauxgu nax duü̃xü̃gümaxã yadexaxü̃, rü nügü natüchametü.

34Rü yexguma Moiché guma napata ga tügümünegu naxücuxü̃gu nax Tupanamaxã yadexaxü̃ca̱x rü nügü ínangegüchametü. Rü yemaacü namaxã nidexa ñu̱xmata ínaxũxũ. Rü ñu̱xũchi yema Iraétanüxü̃maxã nüxü̃ nixu ga yema mugü ga Cori ya Tupana namaxã nüxü̃ ixuxü̃.

35Rü yexguma yema Iraétanüxü̃ nüxü̃ daugügu ga nax yaya̱xaurachametücüüxü̃, rü nüma ga Moiché rü nügü natüchametü. Rü yemaacü nügü nixĩxẽxẽ ñu̱xmata wena Tupanamaxã yanadexa.

Currently Selected:

Ínachoxü̃xü̃chiga 34: tcaP

Highlight

Copy

Compare