Ínachoxü̃xü̃chiga 33
33
Cori ya Tupana rü Moichémaxã nüxü̃ nixu nax inaxĩamaxü̃ca̱x ga Iraétanüxü̃
1Rü nüma ga Cori ya Tupana rü Moichéxü̃ ñanagürü: —¡Inaxũãchi namaxã i ngẽma duü̃xü̃gü ga Equítuanewa ícugaxü̃xü̃! ¡Rü nawa naxũ i ngẽma naane ga Abraáü̃maxã, rü Ichaámaxã, rü Acóbumaxã nüxü̃ chixuxü̃ nax nataagüna tá chanaxãxü̃!
2Rü choma rü tá cupe̱xegu chayaxũxẽxẽ i chorü orearü ngeruxü̃ i dauxü̃cüã̱x nax cumaxã inacuáxü̃ca̱x. Rü ngẽma naanewa tá íchanawoxü̃ i ngẽma Canaáü̃tanüxü̃, rü Amoréutanüxü̃, rü Itítanüxü̃, rü Ferechéutanüxü̃, rü Ebéutanüxü̃, rü Yebuchéutanüxü̃.
3Rü nawa pexĩ i ngẽma naane i ngextá lechi rü ira rü ñoma dexárüxü̃ taguma ítaxuxü̃wa. Natürü i choma rü taxũtáma petanügu chaxã erü pema rü duü̃xü̃gü i tama ixĩnüechaxü̃xẽ pixĩgü rü ngẽmaca̱x ngürüãchi chi namagu pexü̃ chadai —ñanagürü ga Cori ya Tupana.
4Rü yexguma yema dexaxü̃ naxĩnüegu ga yema duü̃xü̃gü rü poraãcü narümaachitanü rü taxuxü̃ma nügü nanga̱xãẽgüchaü̃ norü ngã̱xãẽruü̃gümaxã.
5Yerü nüma ga Cori ya Tupana rü marü Moichémaxã nüxü̃ nixu rü nüxü̃ ñanagürü: —¡Iraécüa̱xgümaxã nüxü̃ ixu rü: “Pemax rü duü̃xü̃gü i tama ixĩnüechaxü̃xẽ pixĩgü. Rü ngẽxguma chi woo paxaãchi petanüwa changexmagu rü wüxiü̃cüxü chi pexü̃ chadai. Rü ñu̱xmatama pegüwa penade i ngẽma perü ngã̱xãẽruü̃gü, rü ngẽmawena tá nagu charüxĩnü nax ta̱xacü tá pemaxã chaxüxü̃!” —ñanagürü.
6Rü yemaacü ga yema Iraétanüxü̃ rü guma ma̱xpǘne ga Oréxwa inanaxügüe nax tama nügü nanga̱xãẽgüxü̃ namaxã ga norü ngã̱xãẽruü̃gü.
Ĩpata ga Tupanamaxã nawa yadexáne ga Moiché
7Rü nüma ga Moiché rü nayange ga guma norü tügümüne ga napata ga nawa Tupanamaxã yadexaxü̃ne. Rü yema Iraétanüxü̃ íyexmaxü̃arü yáxü̃guxüra nayatügümü. Rü ñu̱xũchi Tügümüne ya Ĩpata ya Tupanamaxã Nawa Yadexaxü̃negu nanaxüéga. Rü yexguma texé Tupanamaxã idexachaü̃gu rü guma tügümünewa nixĩ ga taxũxü̃ ga duü̃xü̃gü íyexmagüxü̃arü yáxü̃guxüra üxü̃ne.
8Rü yexguma Moiché guma tügümüne ga Tupanamaxã nawa yadexaxü̃newa naxũũxgu, rü guxü̃ma ga yema duü̃xü̃gü, rü guma noxrütama tügümünearü ĩã̱xgu ínachixü̃. Rü meama Moichéwe narüdaunü ñu̱xmata guma tügümüne ya Tupanamaxã nawa yadexaxü̃negu yaxücu.
9Rü yexguma Moiché nagu üxcugu ga guma tügümüne rü norü ĩã̱xgu ínarüxĩẽma ga yema caixanexü̃. Rü yéma nayachaxãchiema ga yexguma Tupana rü Moichémaxã íyadexayane.
10Rü yexguma duü̃xü̃gü nüxü̃ daugügu ga yema caixanexü̃ nax guma tügümüne ga nawa Tupanamaxã yadexánearü ĩã̱xwa nax yachaxãchiemaxü̃, rü wüxichigü ga yema duü̃xü̃ rü guma noxrütama tügümünearü ĩã̱xgu nacaxã́pü̱xügü. Rü yemaacü Cori ya Tupanaxü̃ nicua̱xü̃gü.
11Rü nüma ga Cori ya Tupana rü Moichémaxã nidexa, ñoma texé wüxi i tümamücümaxã ídexaxü̃rüxü̃. Rü yemawena ga Moiché rü yema Iraétanüxü̃ íyexmagüxü̃wa naxũ. Natürü gumá norü ngü̃xẽẽruxü̃ ga ngextü̱xücü ga Yochué ga Núü̃ nane rü taguma ínaxũxũ nawa ga guma tügümüne.
Tupana rü Moichéxü̃ nügü nawe̱x
12Rü nüma ga Moiché rü Cori ya Tupanaxü̃ ñanagürü: —Dücax, cuma choxü̃ cumu nax ñaa duü̃xü̃gümaxã ichacuáxü̃ca̱x, natürü tama chomaxã nüxü̃ quixu nax texé tá chowe tüxü̃ curümuxü̃ nax choxü̃ taxümücüxü̃ca̱x. Rü ngẽxgumarüxü̃ ta chomaxã nüxü̃ quixu nax chaugu cuyaxõxü̃ rü ngẽmaca̱x chomaxã cutaãxẽ.
13Rü ngẽxguma chi aixcüma yixĩxgux i ngẽma ¡rü choxü̃ nüxü̃ nacua̱xẽxẽ i ngẽma nagu curüxĩnüxü̃, nax ngẽmaãcü cuxü̃́ chayaxõxü̃ca̱x, rü ngẽmaãcü taguma iyanaxoxü̃ca̱x nax chomaxã cutaãẽxü̃! ¡Rü nagu rüxĩnü rü cuxrü nax yixĩxü̃ i ñaa duü̃xü̃gü! —ñanagürü.
14Rü yexguma ga Tupana rü Moichéxü̃ nangãxü̃ rü ñanagürü: —Chomatátama cuxü̃ chaxümücü, rü tá cuxü̃ charüngü̃xẽxẽxü̃ —ñanagürü.
15Natürü nüma ga Moiché rü nanangãxü̃ rü ñanagürü: —Ngẽxguma cuma tama toxü̃ íquixümücügux, rü ¡taxṹ i toxü̃ ícuchoxü̃xẽxẽxü̃ i nua!
16Erü ngẽxguma cuma tama toxü̃ íquixümücügux ¿rü ñuxãcü tá nüxü̃ tacua̱x nax cuma rü tomaxã cutaãxẽxü̃? Natürü ngẽxguma toxü̃ íquixümücügux rü choma rü ñaa curü duü̃xü̃gü rü aixcüma tá nüxü̃ tacua̱x nax cupe̱xewa tama ngẽma togü i ñoma i naanecüã̱xrüxü̃ tixĩgüxü̃ —ñanagürü.
17Rü yexguma ga Cori ya Tupana rü nanangãxü̃ rü ñanagürü: —Ngẽma ñu̱xma nüxü̃ quixuxü̃ rü tá chanaxü, erü cugu chayaxõ rü marü cumaxã chataãxẽ. Rü aixcüma nixĩ i ngẽma cumaxã nüxü̃ chixuxü̃ —ñanagürü ga Cori ya Tupana.
18Rü yexguma ga Moiché rü Tupanaxü̃ ñanagürü: —Chanaxwa̱xe i choxü̃ cunawe̱x i ngẽma curü üüne —ñanagürü.
19Natürü nüma ga Cori ya Tupana rü Moichéxü̃ nangãxü̃ rü ñanagürü: —Ñu̱xma rü tá cuxü̃ chanawe̱x nax ñuxãcü chamecümaxü̃chixü̃ rü cupe̱xewa tá nüxü̃ chixu nax ta̱xacü yixĩxü̃ i chauéga. Rü choma rü tá choxü̃́ tangechaü̃tümüü̃gü ya yíxema woetama choxü̃́ ngechaü̃tümüxü̃güxe. Rü tá choxü̃́ taxãũãchitümüxü̃ ya yíxema woetama choxü̃́ auxãchitümüxü̃güxe.
20Natürü cumaxã nüxü̃ chixu rü taxucürüwatama chauchiwe cudau. Rü yíxema chauchiwe dauxe rü taxucürüwa tamaxecha —ñanagürü.
21Rü ñanagürü ta ga Tupana: —Dücax, nua chauxü̃tawa nangẽxma ya wüxi ya nuta. ¡Rü ẽcü yimáétügu nachinagü!
22Rü ngẽxguma ngéma chaxüpetügux, rü yimá nutaarü ãxmaxü̃gu tá cuxü̃ chimucuchi. Rü cho̱xme̱xmaxã tá cuxü̃ charütütaxü̃ ñu̱xmatáta changupetü.
23Rü ngẽmawena rü tá chixũgachime̱xẽ nax cha̱u̱xca̱xwexü̃ cudauxü̃ca̱x. Natürü chauchiwe rü taxucürüwama nüxü̃ cudau —ñanagürü.
Currently Selected:
Ínachoxü̃xü̃chiga 33: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
