Ínachoxü̃xü̃chiga 24
24
Tupana rü Iraétanüxü̃maxã inaxüga
1Cori ya Tupana rü Moichéxü̃ ñanagürü: —Ngẽma nachica i nawa changexmaxü̃gu namaxã naxĩnagü i Aróü̃, rü Nadáx, rü Abiú, rü ñu̱xũchi ngẽma 70 i Iraétanüxü̃arü ãẽ̱xgacü. Natürü yáxü̃waxü̃ra tátama nayachaxãchigü, rü ngẽxma tá nacaxã́pü̱xügü.
2Rü cuxica tátama nixĩ i cha̱u̱xca̱x quixũxü̃, rü ngẽma cumücügü rü taxũtáma chauxü̃tawa naxĩ. Rü ngẽma togümare i Iraétanüxü̃ rü taxũtáma cuwe dauxü̃ naxĩgü —ñanagürü.
3Rü nüma ga Moiché rü natanüwa naxũ ga yema Iraétanüxü̃ rü namaxã nüxü̃ nixu ga guxü̃ma ga yema ore ga Cori ya Tupana namaxã nüxü̃ ixuxü̃. Rü nümagü ga Iraétanüxü̃ rü guxü̃ma wüxigu Moichéxü̃ nangãxü̃gü rü ñanagürügü: —Ngẽmáacü tá tayanguxẽxẽ i guxü̃ma i ngẽma mugü ya Tupana toxü̃ muxü̃ —ñanagürügü.
4Rü nüma ga Moiché rü nanaxümatü ga guxü̃ma ga yema ore ga Cori ya Tupana nüxü̃ ixuxü̃. Rü moxü̃ãcü pa̱xmama ínarüda rü ma̱xpǘnepechinügu nanaxü ga wüxi ga ãmarearü guruxü̃. Rü 12 ga nutamaxã nanaxü naégagu ga yema 12 ga Iraétücumügü.
5Rü ñu̱xũchi nanamu ga ñuxre ga ingextü̱xü̃gü ga Iraétanüxü̃ nax nadaiaxü̃ca̱x ga wocagü ga iyatüxü̃ rü Tupanaca̱x nax ínaguaxü̃ca̱x. Rü yemawa inanawe̱xgü nax aixcüma wena Tupanaga naxĩnüexü̃.
6Rü nüma ga Moiché rü ngãxü̃gu nayabaye ga gumá nagü. Rü gumá wüxiarü ngãxü̃ rü ñuxre ga naxpáü̃gu nanabacu. Rü gumá naiarü ngãxü̃ rü ãmarearü guruxü̃ namaxã namaxcu.
7Rü yemawena rü nanayaxu ga yema popera ga Tupanaarü uneta nagu ümatüxü̃, rü yema duü̃xü̃güca̱x tagaãcü nüxü̃ nadaumatü. Rü nümagü rü ñanagürügü: —Guxü̃ma i ngẽma Cori ya Tupana nüxü̃ ixuxü̃ rü aixcüma tá mea tayanguxẽxẽ rü tá naga taxĩnüe —ñanagürügü.
8Rü yexguma ga Moiché rü nanayaxu ga gumá nagü ga togü ga naxpáü̃gu nabacuãcü rü gumámaxã duü̃xü̃güxü̃ namaxcutanü, rü ñanagürü: —Ñu̱xma nax pexna naxããxü̃ i norü mugü rü daa nagü nixĩ ya perü cua̱xruxü̃ nax aixcüma yixĩxü̃ i guxü̃ma i ngẽma Cori ya Tupana pemaxã nüxü̃ ixuxü̃ —ñanagürü.
9Rü yexguma ga Moiché, rü Aróü̃maxã, rü Nadáxmaxã, rü Abiúmaxã, rü ñu̱xũchi yema 70 ga Iraétanüxü̃arü ãẽ̱xgacügümaxã guma ma̱xpǘnegu naxĩnagü,
10rü yéma Iraétanüxü̃arü Tupanaxü̃ nadaugü. Rü yema guma nacutügütüxü̃wa rü nayexma ga wüxi ga yéma iya̱u̱xracüüxü̃ ñoma wüxi ga chafírutachinürüxü̃ ga ñoma daxũguxü̃ ga naanerüxü̃ ngóonexü̃.
11Natürü ga Tupana rü tama nanadai ga yema yatügü ga Iraétanüxü̃arü ãẽ̱xgacügü ga nüxü̃ daugüxü̃. Rü nümagü rü wüxigu nachibüe rü naxaxegü.
Moiché rü ma̱xpǘne ga Chinaígu naxĩnagü
12Cori ya Tupana rü Moichéxü̃ ñanagürü: —Ẽcü nagu naxĩnagü ya daa ma̱xpǘne ya nawa changexmane rü ngéma choxü̃ nanguxẽxẽ! Erü tá cuxna chanaxã i nutatachinügü i chorü mugü rü ucu̱xẽgü nagu chaxümatüxü̃ nax Iraétanüxü̃xü̃ nawa cungúexẽẽxü̃ca̱x —ñanagürü.
13Rü nüma ga Moiché rü inachi rü guma ma̱xpǘne ga Tupana nawa yexmanegu naxĩnagü wüxigu namaxã ga norü ngü̃xẽẽruxü̃ ga Yochué.
14Rü nüma ga Moiché rü yema Iraétanüxü̃arü ãẽ̱xgacügüxü̃ ñanagürü: —¡Núatama ñaa nachicawa toxü̃ penangu̱xẽxẽ rü ñu̱xmatáta pexca̱x tawoegu! Rü Aróü̃ rü Úru rü tá pemaxã nuxã narücho. Rü ngẽxguma chi texé guxchaxü̃ tüxü̃́ ngẽxmagux rü name nixĩ i Aróü̃maxã rü Úrumaxã nüxü̃ tixu —ñanagürü.
15Rü yexguma yema orexü̃ namaxã yaxuxguwena, rü nüma ga Moiché rü guma ma̱xpǘnegu naxĩnagü. Rü wüxi ga caixanexü̃ nayadüxü.
16Rü Cori ya Tupanaarü üüne rü guma ma̱xpǘne ga Chinaígu ínarüxĩ. Rü 6 ga ngunexü̃ rü yema caixanexü̃ nayadüxü ga guma ma̱xpǘne. Rü yema norü 7 ga ngunexü̃gu rü nüma ga Cori ya Tupana rü yema caixanexü̃wa Moichéca̱x naca.
17Rü yema Cori ya Tupanaarü üüne rü yema Iraétanüxü̃ca̱x nango̱x nawa ga guma ma̱xpǘne ga ngextá yexeraãcü ínachuchitaeruxü̃wa. Rü ñoma wüxi ga üxüema ga nawa ixaxü̃nerüxü̃ nixĩ ga nüxü̃ nadaugügu.
18Rü nüma ga Moiché rü naxĩnagü nawa ga guma ma̱xpǘne rü yema caixanexü̃gu nayaxücu. Rü yéma nayexma ga 40 ga ngunexü̃ rü 40 ga chütaxü̃.
Currently Selected:
Ínachoxü̃xü̃chiga 24: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
