Ínachoxü̃xü̃chiga 25
25
Ãmaregü naxca̱x ya Tupanapata
(Éx. 35.4-9)
1Rü nüma ga Cori ya Tupana rü Moichémaxã nidexa rü ñanagürü nüxü̃:
2—¡Namaxã nüxü̃ ixu i ngẽma Iraétanüxü̃ nax cha̱u̱xca̱x nanutaque̱xeãxü̃ca̱x i norü ãmaregü! Rü guxü̃ma i ngẽma duü̃xü̃gü i aixcüma norü ngúchaü̃maxã inaxãgüchaü̃xü̃ rü name nixĩ i natanüwa cunadexü̃ i ngẽma ãmaregü.
3Rü ñaa tá nixĩ i ngẽma pedexü̃: Úiru, rü diẽrumü, rü cobre,
4rü carnéruta̱xa ya waxranütane rü yáuxranütane rü daunütane rü tünüta ya mexẽchine ya línuchi rü tünüta ya cabrata̱xa,
5rü carnérucha̱xmüxü̃gü i dauxü̃maxã ichagüxü̃, rü togü i naxcha̱xmüxü̃ i mexẽchixü̃, rü mürapewagü i acáchianaxca̱x,
6rü chíxü̃ i omüwa mexü̃, rü pumara i chíxü̃maxã ãéü̃xü̃ i baeruwa mexü̃, rü pumarate̱xe i yixixü̃ i guwa mexü̃,
7rü nutagü ya nga̱xãẽruxü̃ ya cornalina rü naigü ya nutagü ya nga̱xãẽruxü̃wa mecü nax chacherdótegüarü ãẽ̱xgacüarü efóxwa rü norü türemüxü̃wa nanucuxü̃ca̱x.
8¡Rü cha̱u̱xca̱x penaxü ya wüxi ya chopata nax yimawa duü̃xü̃gütanüwa changexmaxü̃ca̱x!
9Natürü yima chopata ya nawa tá changexmane, rü guxü̃ma i norü ngẽmaxü̃gü rü tá ngẽma cuxü̃ nüxü̃ chadauxẽxẽxü̃ãcü cunaxü.
Baú i Tupanaarü mugüchixü̃
(Éx. 37.1-9)
10¡Ẽcü naxü i wüxi i baú i mürapewa i acáchianaxca̱x! Rü wüxi ya metru rü 10 chentímetru tá nixĩ i norü ma̱x, rü 65 chentímetru tá nixĩ i norü tatachinü, rü 65 chentímetru tá nixĩ i norü máchane.
11¡Rü naxü̃mawa rü úirumaxã natüxüma! Rü norü düxétüwa rü ngẽxgumarüxü̃ tá ta úirumaxã cunatüxüne. ¡Rü norü guxü̃cüwawa úirumaxã naxübera!
12¡Rü naxü i ãgümücü i naxmachinügü i úirunaxca̱x, rü wüxichigü ya naparawa nanucu, rü taxre i wüxicüwawa rü taxre i tocüwawa!
13¡Rü ngẽxgumarüxü̃ ta naxü ya taxremena̱xã ya naxpawerugü ya nai ya acáchianaxca̱x, rü ñu̱xũchi úirumaxã yatümena̱xã!
14¡Rü yima naxpawerugü rü naxmachinügü i baúcüwawa nucuxü̃wa yawe̱xgü nax yimamaxã yangetaxü̃xü̃ca̱x i ngẽma baú!
15Rü yima naxpaweru rü marü taxũtáma cunade. Rü nüe tátama ngẽma baúmachinüwa nangẽxmagüecha.
16Rü ngẽma baúgu tá cunanucu i ngẽma nutatachinügü i nagu naxümatüxü̃ i ngẽma mugü i tá cuxna chaxãxü̃.
17¡Rü ẽcü naxü i wüxi i naxã́taxü̃ i úirunaxca̱x ixĩxü̃! Rü norü ma̱x rü wüxi ya metru rü 10 chentímetru tá nixĩ, rü norü tatachinü rü 65 chentímetru tá nixĩ.
18Rü ngẽma baúátaü̃ i úirunaxca̱xarü wüxipe̱xewachigü tá cunapoxochi i taxre i dauxü̃cüã̱xchicüna̱xãgü i ixãxpe̱xatüxü̃.
19Rü ngẽma naxã́taxü̃wa tátama cunapoxochi i ngẽma taxre i daxũcüã̱xchicüna̱xãgü i ixãxpe̱xatüxü̃. Rü wüxi rü tá norü wüxipe̱xewa nangẽxma rü ngẽma to rü norü tope̱xewa tá nangẽxma.
20Rü ngẽma taxre i daxũcüã̱xchicüna̱xãgü rü tá nügüarü to̱xma̱xtawa nangẽxmagü. Rü naxã́taü̃étügu tá narüdaunü. Rü yima naxpe̱xatügü rü tá naxã́taü̃étügu narüxunü. Rü ngẽmaãcü tá nayadüxü i ngẽma baúátaü̃.
21¡Rü ngẽma nutatachinügü i nagu naxümatüxü̃ i chorü mugü i tá cuxna chaxãxü̃ rü ngẽma baúgu nanucu! ¡Rü ñu̱xũchi yaxǘcuchiã́taxü̃!
22Rü ngẽma baúátaü̃étüwa tá nixĩ i cuxca̱x changexmaxü̃ rü cumaxã chidexaxü̃ i norü ngãxü̃tanüwa i ngẽma taxre i dauxü̃cüã̱xchicüna̱xãgü i ixãxpe̱xatüxü̃. Rü ngéma tá nixĩ i cumaxã nüxü̃ chixuxü̃ i ngẽma chorü ucu̱xẽgü naxca̱x i ngẽma Iraétanüxü̃.
Mecha i paũ i üünegüxü̃arü nuchicaxü̃
(Éx. 37.10-16)
23¡Rü naxü i wüxi i mecha i mürapewa i acáchianaxca̱x! Rü 90 chentímetru tá nixĩ i norü ma̱x, rü 45 chentímetru i norü tatachinü rü 65 chentímetru i norü máchane.
24Rü úirumaxã tá cunatütachinü, rü úirumaxã tá ícunaxüã́ẽgupechinü.
25Rü ngẽma mecha rü tá cunaxübera i naétüwa rü 7 chentímetru tá nixĩ i norü tatachinü i ngẽma nabera. Rü ngẽma naberaétüwa rü tá úirumaxã ícunaxüã́ẽgubera.
26¡Rü naxü i ãgümücü i naxmachinügü i úirunaxca̱x, rü wüxichigü ya naparacüwawa nanucu!
27Rü ngẽma naberaxü̃tawa tá cunanucu i ngẽma naxmachinügü nax ngẽmawa yawe̱xgüãxü̃ca̱x ya yima naxpawerugü ya norü ngetaxü̃ruxü̃ i ngẽma mecha.
28Rü yima naxpawerugü norü ngetaxü̃ruxü̃, rü nai ya acáchianaxca̱x tá cunaxü. Rü guxü̃wama úirumaxã tá cuyatümena̱xãgü.
29Rü úiruwa tá cunaxü i ngẽma norü poratugü rü cuyeragü rü baeruü̃gü rü axepáü̃gü i ngẽma ãchiü̃xü̃ i ãmareca̱x ixĩxü̃.
30Rü name nixĩ i ngẽma mechaétügu cunanu i ngẽma paũ i üünexü̃ i cha̱u̱xca̱x ixĩxü̃ nax guxü̃gutáma chope̱xewa nangẽxmaxü̃ca̱x.
Omüpaweru i úirunaxca̱x
(Éx. 37.17-24)
31Rü úiru i pomüxü̃wa naxü i wüxi i omüpaweru! Rü nachipatü rü namena̱xã rü nachacüügü rü norü ngã̱xãẽruü̃gü i naputüragüraxü̃xü̃ rü nanagugü i naputüragüraxü̃xü̃ rü guxü̃ma i ngẽma rü nawa tátama cunaxüxüchigü.
32Rü ngẽma omüpaweru rü tá nüxü̃́ nangẽxma i 6 i nachacüügü. Rü wüxicüwawa tá nangẽxma i tomaepü̱x i nachacüxü, rü tocüwawa i to i tomaepü̱x i nachacüxü.
33Rü ngẽma 6 i nachacüügü i ngẽma omüpaweru rü wüxichigü tá nüxü̃́ nangẽxma i tomaepü̱x i copu i naputürachacuraxü̃xü̃ i norü nga̱xãẽruxü̃.
34Rü nüma i nane i omüpaweru rü tá nüxü̃́ nangẽxma i ãgümücü i copu i norü nga̱xãẽruxü̃ i naputürachacugüraxü̃xü̃.
35Rü natüü̃wa i ngẽma 6 i nachacüxü, rü ngẽma namücümaxã i nanewa ínadagüxü̃wa rü tá nüxü̃́ nangẽxma i norü copu i norü nga̱xãẽruxü̃.
36Rü guxü̃ma i ngẽma nanagugü rü nachacüügü rü napaweruwa tátama nanaxüxüchigü. Rü guxü̃ma i ngẽma rü úiruxüchi i pomüxü̃naxca̱x tá nixĩ.
37¡Rü naxü i 7 i chíxü̃paxü̃gü rü ngẽma omüpawerunaguwa nanucu nax wixpe̱xegu nabáixgüxü̃ca̱x!
38Rü ngẽma omüarü mexẽẽchiraxü̃ruxü̃ rü ngẽma poratuxacügü i naxü̃paca̱x ixĩxü̃ rü nanaxwa̱xe nax úiruxüchinaxca̱x yixĩxü̃.
39Rü 33 quíru naguxü̃ i úiruwa tá cunaxü i ngẽma omüpaweru rü guxü̃ma i norü ngẽmaxü̃gü.
40Rü ngẽmatama ma̱xpǘnewa cuxü̃ chawéxü̃ãcü tá mea cunaxü —ñanagürü ga Tupana.
Currently Selected:
Ínachoxü̃xü̃chiga 25: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
