FILIFI 3
3
Kebenaran de Sejati
1Akherne, Saudaro-saudaroku, lokba udi riang kerno udi bi jijai do ngen Tuhan. Uku coa meding saro utuk temulis igai jano de sudo uku temulis ngen udi ayokne; sebab hal o baik utuk keselamatan udi. 2Teateiba te'adep tun-tun de menea hal-hal de kidek, tun-tun de patas senbut ‘kuyuk’. Tobo'o demsok supayo tun-tun senunat. 3Padahal iteba tun-tun de sudo temimo sunat de sejati, iso tobo'o. Ite sembeak Allah ngen bimbingan Roh Allah suang, ngen ite bersyukur kerno ite idup jijai do ngen Kristus Yesus. Ite coa begatung ngen upacara-upacara de sifetne laher. 4Sebeneane uku pacok bae begatung ngen upacara-upacara o. Sebab amen ade suang tun meding si ade alasan utuk begatung ngen upacara-upacara de sifetne laher, uku lebiak igai. 5#Rm. 11:1; Kis. 23:6, 26:5 Uku senunat waktau beromor lapen bilai. Uku laher sebagoi tun Israel, kunei suku bangso Benyamin; uku tun Ibrani asli. Lem hal taat ngen hukum-hukum agamo Yahudi, uku adeba anggota golongan Farisi. 6#Kis. 8:3, 22:4, 26:9-11 Uku malah tambeak semangat sehinggo uku semikso jemaat. Amen kenliak kunei segi hukum agamo Yahudi, uku suang tun de baik de coa cacet. 7Tapi kerno Kristus, mako kutene de bel'o uku manggap sebagoi sesuaktau de mbin utung, uyo jijai sesuaktau de menea rugai. 8Iso bae hal-hal o; tapi kute sesuaktau uku manggap sebagoi hal-hal de cuma jijai rugai bae. De uku temuan uyo yo adeba lebiak bego: adeba kemnal Kristus Yesus, Tuhanku. Kerno Kristus, mako uku bi temanggea kekutene. Uku anggap kutene o sebagoi sampah bae, supayo uku dapet Kristus, 9ngen benea-benea jijai do ngen Si. Hubungan de baik ngen Allah coa igai uku usaho suang ngen ca'o taat ngen hukum agamo. Uyo uku temuan hubungan de baik ngen Allah, kerno uku pecayo ngen Kristus. Jijai, hubungan de baik o teko kunei Allah, das dasar pecayo ngen Kristus Yesus. 10Do-done de uku lok adeba supayo uku kemnal Kristus, ngen meding kuaso de midup Si kunei matei. Uku lok milau saro ngen Si ngen jijai serai awei Si lem hal kematian-Ne. 11Ngen uku ma'ep bahwo uku suang bakea nidup igai kunei matei.
Melilai mencapai tujuan
12Uku coa madeak bahwo uku bi berhasil, atau bi jijai sempurno. Tapi uku terus bae berusaho mbut hadiah de seniap Kristus Yesus. Utuk do'oba Si bi mbut uku ngen jemijai uku de Si temuan. 13Pasetne, Saudaro-saudaro, uku sesungguakne coa meding bahwo uku sudo berasea mbut hadiah o. Bakea tapi ade do hal de uku mbut, adeba uku mlupo jano de ade neak belakang uku ngen sungguak-sungguak berusaho utuk dapet jano de ade neak adep uku. 14Do'o sebabne uku melilai terus sapei moi tujuan akhir utuk dapet kemenangan, adeba idup neak surgo; utuk do'oba Allah menok ite liwet Kristus Yesus.
15Ite kute de sudo dewasa seca'o rohani, harusba sikep awei o. Tapi amen neak antaro udi ade de madeak luyen, mako Allah bakea jemlasne kulo ngen udi. 16Tapi hal yo lokba udi kemliak: Ite harus tep idup temurut peraturan de sudo ite totoa sapei uyo.
17 #
1Kor. 4:16, 11:1 Saudaro-saudaro, totoaba teladan uku. Keme bi melei teladan de benea, sebab o kenliakba bebaik tun-tun de motoa teladan keme o. 18Uku bi cet melei namen ngen udi, ngen uyo uku mulangne igai ngen ca'o ngindoi, bahwo ade dau tun de idupne musak tai mateine Kristus senalib. 19Idup tun-tun awei o bakea berakhir ngen kehancuran, sebab Tuhan tobo'o adeba tenei tobo'o, kemulioan tobo'o adeba aib tobo'o, pekeran tobo'o cuma ngen perkaro duniawi. 20Tapi ite adeba warga negara surgo. Kunei diba kulo ite mbot Tuhan Yesus Kristus sebagoi Juruselamat. 21Awokte de lemah ngen dapet ajua yo, Kristus bakea mubeak jijai awei awok-Ne suang de mulio. Si dapet menea o kerno Si temuan kuaso utuk maleak kute sesuaktau.
Currently Selected:
FILIFI 3: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
