FILEMON 1
1
1Saudaro Filemon, kuat keme! Uku, Paulus, suang tahanan kerno Kristus Yesus, besamo ngen saudaro ite Timotius, temulis su'et yo ngen ko 2#Kol. 4:17 ngen jemaat de bekopoa neak umeaknu; kulo ngen kuat ite Apfia ngen Arkhipus.
3Keme ma'ep supayo Allah Bapa ite ngen Tuhan Yesus Kristus melei berkat ngen sejahtera ngen ko.
Kasiak ngen imen Filemon
4Tiep kilai uku bedu'o, uku sembut gen Saudaro ngen mucep mokasiak ngen Allah. 5Sebab uku temi'uk bahwo Saudaro sungguak-sungguak pecayo ngen Tuhan Yesus, mengasihi kute umat Allah. 6Uku bedu'o semoga persaudaraan ite sebagoi tun-tun pecayo bakea dapet asea pengertian de lebiak lai das kute berkat de ite temuan kerno jijai do ngen Kristus. 7Saudaro Filemon, kasiaknu te'adep kute umat Allah, bi menea uku jijai riang ngen kuet. Kute umat Tuhan jijai riang kerno Saudaro.
Paulus minoi ngen Filemon
8Kerno o, sebagai suang saudaro do imen, uku nam bae meriteak saudaro utuk menea jano de harus saudaro menea. 9Tapi kerno uku mengasihi saudaro, uku cuma minoi bae. Uku yo tun tu'ai ngen uyo dong nasuk sel kerno Kristus Yesus. 10#Kol. 4:9 Uku, Paulus, minoi ngen ko tetang Onesimus, anok uku de lem Kristus. Sebab neak lem sel yo uku bi jijai bak aketne. 11Bel'o si coa ade guno utuk nu, tapi uyo si ade gunone, iso bae utuknu, tapi utukku kulo.
12Uyo tun de uku kasihi o uku mbo igai ngenko. 13Sebeneane uku lok tema'en si besamo uku sebagai giteiko, selamo uku tena'en lem sel yo kerno melei namen Bito Baik kunei Allah. 14Tapi uku coa lok menea jejano amen uku ati minoi ngen ko. Uku lebiak galok amen ko meneane ngen rela; uku coa lok makso ko.
15Mukin Onesimus ce'ei kunei saudaro utuk sementaro waktau supayo Saudaro nam dapet si igai utuk selamone. 16Uyo si iso cuma suang hamba utuk saudaro; si lebiak kunei o. Si adeba sesamo tun Kristen de tecito. Si beguno sekilai utuk ku, jano igai utuknu! Paset si beguno sekilai baik sebagai hamba atau sebagai saudaro neak lem Tuhan!
17Kerno Saudaro manggap uku kuat sesamo Kristen, temimoba igai Onesimus serai awei saudaro temimo uku. 18Amen si besaleak atau ade utang ngen ko, kunyauba uku de temanggung kutene. 19Nah, baikba uku temulisne suang neak piyo: Uku, Paulus, bakea masen kutene. (Paset coa perlu uku minget bahwo Saudaro suang temuan utang ngen uku, adeba kehidupannu de blau sebagai tun Kristen.) 20Sebab o, demi Tuhan cuboba tulung uku, riangba ateiku sebagai saudaro neak lem Kristus.
21Uku temulis su'et yo kerno yakin bahwo Saudaro bakea menea jano de uku minoi. Bahkan uku namen Saudaro bakea menea lebiak kunei o. 22Sementaro o, tulung sedio kamar utuk uku neak umeaknu, sebab uku ma'ep Allah kemabul du'o Saudaro-saudaro kutene ngen mbin uku belek ngen udi.
Salam terakhir
23 #
Kol. 1:7, 4:12 Epafras, de ade besam uku lem sel kerno Kristus Yesus, mbo salamne ngenko. 24#Kis. 12:12, 25, 13:13, 15:37-39, 19:29, 27:2; Kol. 4:10, 4:14; 2Tim. 4:10, 11 Temimoba kulo salam kekuatku: Markus, Aristarkhus, Demas ngen Lukas.
25Semoga Tuhan Yesus Kristus melei berkat ngen udi.
Hormat keme, Paulus
Currently Selected:
FILEMON 1: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
