KISAH RASUL-RASUL 19
19
Paulus neak Efesus
1Ketiko Apolos masiak neak Korintus, Paulus sudo kemliling daerah-daerah pelosok ngen sapei neak Efesus. Neak di si temau kekedau tun de sudo pecayo ngen Yesus. 2Paulus madeak ngen tobo'o, “Jano sudo udi temimo Roh Sucai, ketiko udi pecayo?”
Tapi, tobo'o jemawab si, “Ati, keme ati perneak temi'uk bahwo ade Roh Sucai.”
3Lajau Paulus madeak ngen tobo'o, “Amen awei'o, ngen baptisan de ipe udi bi dibaptis?”
Tobo'o jemawab, “Ngen baptisan Yohanes.”
4 #
Mat. 3:11; Mrk. 1:4, 7-8; Luk. 3:4, 16; Yoh. 1:26-27 Paulus madeak, “Baptisan Yohanes adeba baptisan tobat, si madeak ngen tun dau bahwo tobo'o harus pecayo ngen Si de teko sesudo kunei padone, adeba Yesus.”
5Waktau tobo'o temi'uk hal'o, tobo'o dibaptis lem gen Tuhan Yesus. 6Ketiko Paulus mpek tangenne neak das tobo'o, tu'unba Roh Sucai moi das tobo'o, ngen muloiba tobo'o madeak lem bahaso dileak ngen semapei bito kunei Allah. 7Tobo'o kute jumleakne kekiro duai belas tun.
8Selamo telau bulen Paulus teko moi umeak semyang neak di, miling ngen binai serto bedebat ngen tobo'o utuk supayo tobo'o yakin tetang Allah meriteak sebagai Rajo. 9Tapi ade kekedau tun de telo ateine. Tobo'o coa lok pecayo, tapi mupet ajaran Yesus neak adep tun dau. Kerno'o Paulus teminggea tobo'o ngen cem'ei penotoa-penotoane kunei tobo'o, tiep bilai miling neak ruang kuliah Tiranus. 10Hal yo neane selamo duai taun, sehinggo kute penduduk Asia temi'uk firman Tuhan, baik tun Yahudi atau tun Yunani.
Anok-anok Skewa
11Liwet tangen Paulus Allah menea mujizat-mujizat de luea biaso. 12Bahkan tun mbin setangen atau kain de perneak nakei Paulus ngen mpekne das tun-tun bolon, mako ka'enba tobo'o ngen kelueaba roh-roh kidek. 13Kekedau dukun Yahudi kulo de kemliling neak negrai o, cemubo makei gen Tuhan Yesus das tobo'o de pasuk roh-roh kidek, nadeakne, “Uku semupeak udi lem gen Yesus de nelei namen Paulus.” 14De menea hal o adeba tujuak tun, anok kunei suang imem kepalo Yahudi genne Skewa.
15Tapi roh kidek o jemawab, “Yesus uku kenal, Paulus uku namen, tapi udi api?”
16Lajau tun de kasuk roh kidek o melupat, kemuaso, maleak tobo'o kute, sehinggo tobo'o melilai kunei umeak tun o ngen bleseng ngen sileak. 17Hal o namen kute penduduk Efesus, baik tun Yahudi atau tun Yunani, mako sabenba tobo'o kute, ngen gen Tuhan Yesus tambeak nujai. 18Dau neak antaro tobo'o de sudo pecayo, teko ngen ngakau neak muko umum bahwo tobo'o perneak menea plep-plep awei o. 19Dau kulo neak antaro tobo'o, de perneak menea sihir, kemopoa kiteb-kitebne lajau nembemne neak adep kute tun. Go kiteb-kiteb o kekiro lemo puluak ribau caci pirok. 20Ngen ca'o yo, tambeak tesebeaba firman Tuhan ngen tambeak bekuaso.
Demetrius menea huru-hara neak Efesus
21Sesudo peristiwo o, Paulus temtep utuk lalau moi Yerusalem liwet Makedonia ngen Akhaya. Paulus madeak, “Sesudo moi di uku harus kemliak Roma kulo.” 22Lajau si meluak duai tun pembantaune, adeba Timotius ngen Erastus, ndutene moi Makedonia, tapi si suang tinggea kekedau an igai neak Asia.
23Kekiro pado waktau o tejijaiba huru hara lai tetang ajaran Yesus. 24Penyebabne adeba suang semanei genne Demetrius, suang tukang pirok, de menea umeak-umeak utuk dewi Artemis kunei pirok. Usahone o dapet asea de coa didik bagiak tukang-tukangne. 25Si kemopoa tobo'o besamo-samo ngen pekerjo-pekerjo luyen lem usaho de serai, si madeak, “Pasuak-pasuak, udi namen bahwo kemakmuran ite adeba asea usaho yo! 26Uyo udi suang kemliak ngen temi'uk, awei ipe Paulus, iso bae neak Efesus, tapi kulo gesea neak kute Asia bi mbujuk ngen semset dau tun ngen madeak bahwo jano de nea tangen manusio isoba diwo. 27Awei yo iso bae usaho ite bakea nino tun, tapi kulo umeak Dewi Artemis, Dewi lai'o, bakea nyep taine. Iso cuma do'o, Artemis suang, de senbeak kute Asia ngen kute dunio de beradap, bakea nyep kebesaranne.”
28Temi'uk'o atei tobo'o jijai panes, lajau tobo'o menggang, “Laiba Artemis dewi tun Efesus!” 29Kute kota jijai kacau ngen tobo'o rerami gemlumbung gedung kesenian serto me'et Gayus ngen Aristarkhus, keduaine tun Makedonia ngen kuat pemaneu Paulus. 30Paulus lok lalau moi tengeak-tengeak rakyat'o, tapi penotoa-penotoane coa melei izin. 31Bahkan kekedau pembesar Asia, de kuat ngen Paulus, kemirim pesen ngen demsok ne, supayo jibeak masuk moi gedung kesenian'o. 32Sementaro'o tun de bekopoa neak lem gedung'o menggang; de suang madeak dio, de luyen madeak do'o, sebab kupulan'o kacau balau, dau kunei tobo'o coa namen utuk jano tobo'o bekopoa. 33Lajau suang tun genne Aleksander tenulok moi muko tun-tun Yahudi. Si dapet keterangan kunei tun dau tetang jano detejijai. Segro si melei isyarat ngen tangenne, lok melei penjelasan sebagoi pembelaan neak adep rakyat'o. 34Tapi waktau tobo'o namen bahwo si tun Yahudi, menggangba tobo'o besamo-samo kekiro duai jam anne, “Laiba Artemis dewi tun Efesus!”
35Tapi, sekretaris kota temnang tun dau'o ngen madeak, “Hoi tun Efesus! Api neak dunio yo decoa namen bahwo kota Efesusba de miaro baik umeak dewi Artemis de maha lai atau patungne de tu'un kunei lenget? 36Hal'o coa dapet melawen, kerno'o lokba udi tenang ngen jibeakba gegulut betindak. 37Sebab udi bi mbin tun-tun yo moi piyo, kunyau tobo'o coa merapok umeak dewi te ngen coa nino genne. 38Jijai, amen Demetrius ngen pekerjo-pekerjone temuan pengaduan teadep suang tun, iso ade sidang-sidang pengadilan ngen ade gubernur. Moi di ba lokne keduai belah pihok mbin pekarone. 39Amen ade sesuaktau de luyen de udi kenlok, baikba kenloknu'o senlesei lem sidang rakyat de sah. 40Sebab ite ade lem bahayo bakea tenuduak bahwo ite menea huru-hara pado bilai yo, kerno coa ade alasan de dapet ite madeak utuk mbenea kupulan de kacau-balau yo.” 41Ngen kecek'o si meluak tun dau'o belek.
Currently Selected:
KISAH RASUL-RASUL 19: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
