KISAH RASUL-RASUL 18
18
Paulus neak Korintus
1Sesudo'o Paulus teminggea Atena, lajau lalau moi Korintus. 2Neak di si temau ngen suang Yahudi genne Akwila, asalne kunei Pontus. Si tembei teko kunei Italia ngen Priskila, ngenyanne, kerno kaisar Klaudius bi meriteak, supayo kute tun Yahudi teminggea Roma. Paulus singgeak neak umeak tobo'o. 3Kerno tobo'o menea kerjo de serai, si tinggea besamo-samo tobo'o. Tobo'o kerjo besamo-samo, kerno tobo'o sesamo tukang menea kemah. 4Tiep bilai Sabat Paulus miling lem umeak semyang ngen berusaho supayo tun-tun Yahudi ngen tun-tun Yunani pecayo ngen Yesus.
5Ketiko Silas ngen Timotius teko kunei Makedonia, Paulus muloi ngen sepenuakne melei namen bito kunei Allah, saksai ngen tun-tun Yahudi bahwo Yesusba Rajo Penyelamat. 6Tapi ketiko tun-tun o melawen si ngen minone, si mersi debu kunei keracokne. Paulus madeak ngen tobo'o, “Kunyauba daleaknu tupeak neak das ulaune suang; uku bersih, coa saleak. Muloi uyo uku bakea lalau ngen bangso-bangso luyen.” 7Si keluea kunei di, lajau lalau moi umeak suang tun genne Titius Yustus, de saben ngen Allah, de umeakne neak depeak umeak semyang. 8Tapi Krispus, pemipin umeak semyang o, jijai pecayo ngen Tuhan besamo-samo ngen kute si'ing umeakne, dau kunei tun-tun Korintus, de temi'uk bito de senapei Paulus, jijai pecayo ngen dibaptis.
9Pado suaktau kelmen Tuhan madeak ngen Paulus neak lem pengeliak, “Jibeak saben! Terusba melei namen firman ngen jibeak diem! 10Kerno uku semerto ko ngen coa ade suang kulo de bakea menea de kidek ngen ko, kerno dau umat-Ku neak kota yo.” 11Lajau tinggaba Paulus neak di detaun tengeak ngen si majea firman Allah neak antaro tobo'o.
12Tapi, sesudo Galio jijai gubernur neak Akhaya, tun-tun Yahudi bersatu melawen Paulus, lajau mbin Paulus moi pengadilan. 13Tobo'o madeak, “Si yo berusaho menea tun nyembeak Allah ngen ca'o de bertentangan ngen Hukum Taurat.”
14Ketiko Paulus lok muloi miling, Galio madeak ngen tun-tun Yahudi o, “Hoi tun-tun Yahudi, sekirone pengaduannu tetang suaktau pelanggaran atau kejahatan, bi sepatutne uku temimo perkaronu. 15Tapi amen hal o adeba selisiak tetang kecek, gen atau hukum de belakau neak antaro udi, mako lokba udi suang semleseine; uku coa lok jijai hakim das perkaro de awei yo.” 16Sudo o si musir tobo'o kunei ruang pengadilan. 17Lajau tobo'o kute temakep Sostenes, pemipin umeak semyang, lajau mokoane neak adep pengadilan o. Tapi Galio samo sekilai coa dulai hal o.
Paulus belek moi Antiokhia
18 #
Bil. 6:18
Paulus tinggea kekedau bilai igai neak Korintus. Lajau si pamit ngen tun-tun de pecayo neak di, ngen belayea moi Siria, sesudo si metok bukne neak Kengkrea, kerno si bi janjai. Priskila ngen Akwila semerto si. 19Lajau sapeiba tobo'o neak Efesus. Paulus teminggea Priskila ngen Akwila neak di. Si suang masuk moi umeak semyang, miling ngen tun-tun Yahudi. 20Tobo'o minoi ngen si utuk tinggea lebiak an neak di, tapi si coa lok. 21Si pamit ngen madeak, “Uku bakea teko igai ngen udi, amen Allah kemlokne.” Lajau Paulus terus lalau moi Efesus.
22Sesudo sapei neak Kaisarea, Si lalu moi Yerusalem utuk melei salam ngen jemaat neak dilajau terus moi Antiokhia. 23Sesudo tinggea kekedau an neak di, si berakat igai lajau jemlajeak kute taneak Galatia ngen Frigia utuk kemu'et atei kute tun-tun pecayo.
Apolos neak Efesus ngen Korintus
24Sementaro'o tekoba moi Efesus suang Yahudi genne Apolos. Si asalne kunei Aleksandria. Si pacok miling ngen kebiak paham tetang Kiteb Sucai. 25Si sudo temimo ajaran tetang ajaran Yesus. Ngen semangat si miling, ngen teliti si majea tetang Yesus, tapi si cuma namen baptisan Yohanes. 26Si muloi binai majea neak umeak semyang. Tapi sesudo Priskila ngen Akwila temi'ukne, tobo'o mbin si moi umeak tobo'o, ngen teliti jemlas ngen si Dalen Allah. 27Kerno Apolos lok nyeb'ang moi Akhaya, tun-tun pecayo neak Efesus kemirim su'et ngen penotoa-penotoa neak di, supayo tobo'o semambut si. Sapeine neak Akhaya, si jijai kebiak beguno bagiak tun-tun de pecayo ngen Anugrah Allah. 28Kerno ngen penuak semangat si mbanteak tun-tun Yahudi neak adep umum ngen melei bukti kunei Kiteb Sucai bahwo Yesusba Rajo Penyelamat.
Currently Selected:
KISAH RASUL-RASUL 18: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
