2 KORINTUS 9
9
Batuan utuk Yerusalem
1Sebeneane coa perlu igai uku temulis ngen udi tetang batuan de gidong mbo ngen umat Allah neak Yudea. 2Uku namen udi galok mulung, ngen uku bi mujai udi ngen tun-tun neak Makedonia. Uku madeak ngen tobo'o, bahwo sejok taun de sudo saudaro-saudaro neak Akhaya bi siap utuk melei sumbangan. Ngen semangatnu bi menea tun dau kulo jijai semangat. 3Uyo uku mutus Titus ngen keduai saudaro o ngen udi supayo jano de keme mbangga tetang udi jibeak cuma omong kosong bae. Jijai, udi lokne bi siap, sebab uku madeak ngen tobo'o bahwo udi bi siap utuk o. 4Uku khawatir amen ade tun-tun Makedonia de milau besamo-samo uku be pado waktau uku teko ngen ko. Ngen amen tobo'o namen bahwo udi ati siap, woi, padeak selekne keme be, kerno bi madeak bahwo keme pecayo sekilai ngen udi! Ngen udi kulo bakea selek. 5Do'oba sebabne uku meraso perlu mutus tobo'o o ngenudi lebiak dute utuk murus sumbangan de udi janjai o. Uku nea o supayo be amen uku teko, pelei udi o bi siap. Ngen awei o, nyatoba bahwo peleinu o nelei ngen senang atei, iso kerno terpakso.
6Tingetba! Tun de tembea biniak didik, bakea mopoa asea de didik kulo. Tun de tembea biniak dau, bakea mopoa dau kulo. 7Lokba memasing melei ngen kerelaan ateine, jibeak ngen ibo atei atau terpakso, sebab Allah mengasihi tun de melei ngen sukocito. 8Allah bekuaso melei ngen udi berkat de kebiak dau, supayo udi temuan jano de udi perlu, bahkan udi bakea dapet lebiak utuk menea baik ngen beramal. 9#Mzm. 112:9 Awei ade tetulis:
“Allah magiak ngen tun-tun peset,
kebaik atei-Ne tep utuk sekeanne.”
10 #
Yes. 55:10
Allah de semiap biniak utuk penebea ngen kembuk utuk ite. Si kulo bakea semiap ngen nambeak dau jano de udi tenbea, supayo asea kemurahan ateinu betambeak kulo. 11Ngen awei o udi bakea serbo ade lem kute hal sehinggo udi bogoa dapet melei ngen mudeak atei. Ngen pelei-peleinu de keme magiak, sebab o dau tun madeak mokasiak ngen Allah. 12Sebab plep baik de udi nea yo iso cuma utuk gemnep de ku'ang ngen umat Allah bae, tapi kulo bakea jijai sebab tun dau mokasiak ngen Allah. 13Ngen kunei kebaikan de udi kemten o, dau tun Kristen neak Yudea bakea mujai Allah kerno tobo'o kemliak kesetiannu teadep Bito Baik tetang Kristus de udi totoa o. Kulo, tobo'o mujai Allah, kerno udi kebiak mue'ak atei utuk magiak ngen tobo'o ngen kute tun jano de ade ngen udi. 14Mako tobo'o bakea du'o udi ngen perasan kasih sayang kerno Allah kebiak baik atei ngen udi. 15Lokba ite bersyukur ngen Allah das pelei-Ne de luea biaso o.
Currently Selected:
2 KORINTUS 9: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
