2 KORINTUS 2
2
1Uku bi mok keputusan neak lem ateiku bahwo uku coa bakea teko igai ngen ko, amen tekone uku menea ko ibo. 2Sebab, amen uku menea ateinu ibo, api igai de dapet menea uku jijai riang amen iso tun de uku menea ibo o. 3Do'ba maksud su'etku o, adeba supayo amen uku teko, jibeak uku ibo kerno tobo'o de seharusne menea uku jijai riang. Sebab uku yakin tetang udi kutene bahwo keriangku adeba kulo keriangnu. 4Uku temulis ngen udi ngen atei de kebiak temes, gis ngen kemluea dau bioa matai, iso supayo udi sedih, tapi supayo udi namen kebiak laine kasihku ngen udi kutene.
Melei apun utuk tun de saleak
5Amen ade tun de jijai sebab kesedihan, mako hal o si menea iso teadep uku, tapi teadep saudaro kutene atau paling coa teadep pao kunei Saudaro. Uku coa lok terlalu makso teadep si. 6Bagiak tun de awei o cukupba hukuman ngen pao kunei udi. 7Uyo udi harus mapun si ngen melei semangat igai ngen si supayo si jibeak terlalu sedih sapei putus asa. 8Sebab o uku melei nasihat, supayo udi kemten igai ngen si bahwo udi benea-benea sayang ngen si. 9Uku temulis su'et o ngen udi, maksudne utuk tes udi, jano udi bogoa motoa petunjuk-petunjuk kunei uku. 10Amen udi melei apun ngen tun de sudo menea saleak teadepnu mako uku kulo mapun tun o. Sebab de sudo uku mapun – amen memang ade de perlu napun – do'o uku mapun neak adep Kristus utuk kebaikan udi. 11Uku menea o supayo Iblis jibeak mok kesempatan utuk kemuaso ite; sebab ite namen rencano-rencanone.
Kekhawatiran Paulus neak Troas
12 #
Kis. 20:1
Ketiko uku sapei neak Troas utuk melei namen Bito Baik tetang Kristus, Tuhan sudo mukok dalen utuk uku, utuk kerjo neak penan o. 13Tapi ateiku coa tenang, kerno uku coa temau ngen Titus saudaro do imen. Mako uku pamit ngen tun-tun neak di o lajau lalau moi Makedonia.
Kemenangan kerno Kristus
14Tapi syukur ngen Allah! Si bogoa mipin keme neak dalen kemenangan Kristus. Allah makei keme supayo bito tetang Kristus tesebea awei aroma de um moi ipe bae. 15Sebab bagiak Allah keme adeba aroma de um kunei Kristus neak tengeak-tengeak tobo'o de senlamat ngen neak antaro tobo'o de benaso. 16Teadep tun-tun de gidong moi kehancuran, keme yo awei mbon kematian de menea matei; tapi teadep tun-tun de gidong senlamat, keme awei mbon um de mbin kehidupan. Nah, api de dapet maneu tugas yo? 17Keme coa awei dau tun de mesoa utung kunei bito Allah awei barang dagangan bae. Tujuan-tujuan keme adeba benea, sebab keme nelei tugas ngen Allah. Ngen Allah suang kemliak bahwo keme semapei bito o sebagai hamba-hamba Kristus.
Currently Selected:
2 KORINTUS 2: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
