1 TIMOTIUS 6
6
1Tun-tun Kristen de jijai hamba, harus manggep bahwo tuan tobo'o patut tobo'o hormat, supayo tun coa dapet kemidek gen Allah atau ajaran te. 2Hamba-hamba de tuanne tun Kristen, coa buliak manggap remeh tuanne kerno tobo'o samo-samo tun Kristen. Malah tobo'o seharusne melayan tuan tobo'o ngen lebiak baik igai, sebab tuan de nelayan ngen baik o adeba samo-samo tun pecayo de dikasihi.
Ajaran de coa benea ngen kekayaan de sejati
Najeaba ngen meleiba nasihat kutene o. 3Api de majea ajaran de luyen kunei o ngen coa tujau ngen ajaran de benea kunei Tuhan te Yesus Kristus, ngen ajaran agamo te, 4si adeba tun ombong ngen coa namen jejano! Plepne adeba galok selisiak ngen tekea tetang istilah-istilah sehinggo timboa iri atei, perpecahan, fitneak, curiga ngen de coa baik, 5ngen selisiak de coa sudo-sudone. Dalen pekeran tun-tun o bi kepak ngen coa benea igai. Sako tobo'o nam kayo kunei agamo.
6Memang agamo melei utung de lai, amen tun pues ngen jano de temuanne. 7Sebab coa ade sesuaktau kulo de ite mbin moi lem dunio yo, ngen coa ade sesuaktau kulo de dapet ite mbin moi luea! 8Jijai, amen ade kembuk ngen keracok, do'o bi cukup. 9Tapi tun de lok jijai kayo, tergoda ngen terjerat mecem-mecem kelok de bodong ngen musak. Kelok-kelok o menea tun jijai ajua ngen celako. 10Kerno bogoa meker caci, timboa kute mecem kejahatan. Ade pa'o tun mesoa caci sehinggo bi coa temurut igai ajaran Kristen, lajau tobo'o keno dau penderitaan de majua atei tobo'o.
Pesen penutup
11Tapi ko adeba tun de Allah temuan, jijai ko harus meu'ak kutene o. Berusahoba jijai tun de benea neak matai Allah, de mengabdi ngen Allah, pecayo ngen Kristus, mengasihi sesamo, tabah lem penderitaan, ngen bersikep lemah lembut. 12Berjuangba sungguak-sungguak utuk idup sebagai tun Kristen supayo ko mbut hadiah sejati ngen kekal. Sebab utuk o ba Allah menok ko pado waktau ko ngakau neak adep dau tun bahwo ko pecayo ngen Kristus. 13#Yoh. 18:37 Ngen uyo, neak adep Allah de melei nyabai ngen kute sesuaktau, ngen neak adep Kristus Yesus de melei kesaksian de benea ngen Pontius Pilatus, uku minoi dio kunei ko: 14Taatba ngen kute periteak o seca'o murni ngen baik sapei pado bilai Tuhan te Yesus Kristus teko igai. 15Allah suang de bakea tentau tekone Si pado waktau de tepat. Siba do-done Penguaso; Si agung, Rajo kunei kute rajo, ngen Tuhan kunei kute tuan, 16Siba do-done de coa nam kenuaso maut; Si idup neak lem cahayo de coa dapet na'ok api bae kulo. Coa ade suang manusio kulo de perneak kemliak Si, atau dapet kemliak Si. Bagiak-Neba hormat ngen kuaso de kekal! Amin.
17Ngen tun-tun kayo neak dunio yo, lokba ko minoi supayo tobo'o jibeak ombong ngen jibeak ma'ep pado sesuaktau de coa tau awei kekayaan. Tobo'o harus ma'ep ngen Allah de melei kute sesuaktau ngen ite utuk ite nikmati. 18Meleiba nasihat ngen tobo'o supayo menea de baik, jijai kayo lem plep de baik, mu'eak atei ngen galok melei. 19Ngen awei o tobo'o melungguk hok de jijai modal de baik utuk masa depan. Utuk dapet idup de sebeneane, adeba idup de sejati.
20Hoi Timotius, jenagoba jano de sudo cayo ngen ko. Ne'uakba kecek-kecek de coa beguno ngen selisiak-selisiak tetang hal-hal de seca'o keliru de senbut “Pengetahuan”. 21Seba ade tun-tun de madeak bahwo tobo'o temuan pengetahuan o, sehinggo nyeleweng kunei ajaran-ajaran Kristen de sudo tobo'o pecayo.
Semoga Tuhan memberkati Saudaro-saudaro.
Hormat keme, Paulus
Currently Selected:
1 TIMOTIUS 6: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
