1 TIMOTIUS 4
4
Gu'au-gu'au palsu
1Roh Allah seca'o tegas madeak bahwo pado maso-maso de bakea teko, ade tun de bakea murtad, lajau temotoa roh-roh de menea tun jijai sesat ngen ajaran-ajaran Iblis, 2de senapei liwet tun-tun munafik de mike. Atei nurani tun-tun o bi kelem. 3Tobo'o majea tun utuk coa nikeak ngen coa mbuk kembuk kunei Allah. Padahal kembuk o nea Allah utuk nembuk ngen mucep mokasiak ngen tun-tun de sudo pecayo ngen Kristus ngen bi kemnal ajaran de benea kunei Allah. 4Kerno kute de cenipto Allah o baik ngen coa ade do kulo de haram, amen tenimo ngen mucep syukur ngen Allah. 5Sebab kutene o kunei Allah ngen du'o menea kembuk o jijai halal.
Pelayanan Yesus Kristus de bekerjo ngen baik
6Amen ko majea kutene o ngen Saudaro-saudaro do imen, ko bakea jijai pelayan Kristus Yesus de bekerjo ngen baik. Ngen ko bakea mupuk batinnu ngen kecek Allah de ite pecayo, ngen ajaran-ajaran de benea de sudo tenotoanu ke'an yo. 7Ne'uakba cerito-cerito takhayul de coa beguno. Lokba ko latih dirainu utuk beribadah. 8Latihan jasmani didik bae gunone, tapi latihan rohani beguno lem kute hal, sebab mengandung janjai utuk idup pado maso uyo ngen maso de bakea teko. 9Hal o benea ngen patut tenimo sepenuakne. 10Do'oba sebabne ite berjuang ngen kerjo keras, sebab ite ma'ep sepenuakne ngen Allah de idup; Siba penyelamat kute tun, terutamo tun-tun de pecayo.
11Najeaba kutene o ngen neluakba tun-tun temotoane. 12Jibeak suang tun kulo manggap ko rendeak kerno ko u'ai. Sebelekne, lokba ko jijai teladan bagiak tun-tun pecayo lem keceknu ngen plepnu, lem ca'o ko mengasihi sesamo ngen pecayo ngen Yesus Kristus, lem kesetiaannu ngen lem kemurnian. 13Sementaro o, sapei uku teko be, ko harus sungguak-sungguak mbaco Alkitab ngen tun-tun ngen majeane. 14Jibeak ko laloi makei karunio kunei Roh Allah de nelei ngen ko pado waktau pemipin-pemipin jemaat pek tangen tobo'o neak das ulaunu, ngen nebai-nebai semapei pesen Allah tetang dirainu. 15Kerjoba kutene o ngen sungguak-sungguak supayo kemajuannu kenliak kute tun. 16Ko harus ngawas diraine suang ngen ajarannu. Lokba ko setia menea kutene o, sebab ngen awei o ko bakea selamat baik dirainu suang atau tun-tun de temi'uk ko.
Currently Selected:
1 TIMOTIUS 4: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
